استانادا اتىراۋ, جامبىل جانە شىعىس قازاقستان وبلىستارىنىڭ كۇندەرى ءوتتى

ەلدىڭ لەبى ەلوردادان سەزىلەدى

اتىراۋلىقتار اسقان اسۋ كونەدەن تولقىن تارتقان كارى كاسپيدىڭ قۇت قويناۋىندا قونىس تەپكەن مۇنايلى ولكەنىڭ تاۋەلسىز ەلى­مىزدىڭ قارقىندى دامىعان ەكونومي­كاسىندا الاتىن ورنى ەرەكشە. اتىراۋ جەرىنەن قارا تەڭىز جاعالاۋىنا تىكەلەي تارتىلعان مۇناي قۇبىرى ارقىلى ەكسپورتقا ايدالىپ جاتقان قارا التىننىڭ ەل يگىلىگىن ەسەلەۋگە قوسقان ۇلەسى ولشەۋسىز. مەملەكەت باسشىسى نۇرسۇلتان نازارباەۆ «اتىراۋ – قار­قىندى وركەندەپ, ءوسىپ كەلە جاتقان ايماقتاردىڭ ءبىرى. ءالى دە قارقىندى دامۋ ءۇردىسى جالعاسا بەرەدى», دەپ اتاپ كورسەتكەن بولاتىن. ەلباسىنىڭ تىكەلەي تاپسىرماسى­مەن تاۋەلسىزدىكتىڭ 20 جىلدىعىنا بايلانىستى جاسالعان جالپىۇلتتىق جوسپارعا سايكەس بەكىتىلگەن شارالار شەڭبەرىندە استانا قالاسىندا وتكى­زىلگەن اتىراۋ وبلىسىنىڭ كۇندەرىندە ءوڭىر جەتىستىگى بار قىرىنان پاش ەتىلدى. مۇنايلى ولكەنىڭ جيىرما جىلداعى دامۋ ءۇردىسى ەل تاۋەلسىزدىگىنىڭ 20 جىلدىق وراسان جەتىستىكتەرىمەن ورايلاس ءوربىدى. ماسەلەن, اتىراۋ وبلى­سىنىڭ 20 جىلداعى وڭىرلىك جالپى ءونىمىنىڭ ءوسۋى 1991 جىلعى 4,6 ميلليارد تەڭگەدەن 2010 جىلدىڭ قورى­تىندىسىندا 2,8 تريلليون تەڭگەگە نەمەسە 600 ەسەگە ارتقان. بۇگىندە اتىراۋ – تاۋەلسىز قازاقستاننىڭ جەتەكشى ونەركاسىپتىك, يندۋستريالى وبلىسى. ەگەر 1991 جىلى وبلىستىڭ ونەركاسىپ ءونىمىنىڭ كولەمى نەبارى 30 ميلليارد تەڭگەنى قۇراسا, 20 جىل ىشىندە ول 3 تريلليون 119 ميلليارد تەڭگەگە دەيىن ءوستى. وبلىس ەلىمىزدەگى ينۆەستيتسيا تارتۋ سالاسىنداعى كوش­باسشى بولىپ تابىلادى. 1991 جىلى وبلىسقا تارتىلعان ينۆەستيتسيا 24 ميلليارد تەڭگە بولسا, 2010 جىلى بۇل كورسەتكىش 1 تريلليون 105 ميلليارد تەڭگەگە جەتتى. 2010 جىلى وبلىستا 30 ميلليون توننا مۇناي, 13,6 ميلليارد تەكشە مەتر ىلەسپە گاز ءوندىرىلىپ, 1991 جىلدىڭ كورسەتكىشىنەن تيىسىنشە 8 جانە 20 ەسە ارتىق وسىمگە قول جەتكىزىلدى. وڭىردە مۇناي ونىمدەرىن وڭدەۋ,  ماشينە جاساۋ, قۇرىلىس يندۋسترياسى, حيميا ونەركاسىبى, مينەرالدى تىڭايت­قىشتار, رەزينا جانە پلاستماسسا بۇيىمدار شىعارۋ سياقتى ءوندىرىس قارقىندى دامۋدا. جالپى, 20 جىلدا ونەركاسىپ سالاسىندا 130 ءوندىرىس ورنى اشىلىپ, 30 مىڭ جاڭا جۇمىس ورنى قۇرىلدى. تاۋەلسىزدىگىمىزدىڭ 20 جىلى ىشىندە اتىراۋ وبلىسىندا 110 ەلدى مەكەن اۋىز سۋمەن قامتاماسىز ەتىلدى. ەگەر 1991 جىلى تۇرعىنداردىڭ 27 پايىزى عانا تازا اۋىز سۋ تۇتىناتىن بولسا, قازىر بۇل كورسەتكىش 99 پايىزعا جەتىپ وتىر. سونىمەن بىرگە, تاۋەلسىزدىك جىلدارى 120 ەلدى مەكەن «كوگىلدىر وتىنعا» قول جەتكىزىپ, تابي­عي گازدى تۇتىناتىن حالىقتىڭ ۇلەسى وسى كەزەڭدە 11 پايىزدان 96 پايىزعا دەيىن ءوستى. مۇنايلى دا ءوندىرىستى وڭىردە اۋىل شارۋاشىلىعىن دامىتۋعا دا بارىنشا كوڭىل ءبولىنىپ كەلەدى. ماسەلەن, اۋىل شارۋاشىلىعىنىڭ كولەمى 1991 جىلمەن سالىستىرعاندا 40 ەسە, سونىڭ ىشىندە مال باسى 1,3 ەسە ءوستى. وڭىردە ازىق-ت ۇلىك قاۋىپسىزدىگىن قامتاماسىز ەتۋ ماقسا­تىندا 17 جىلىجاي, 24 كوكونىس ساقتاۋ قويماسى, اۋىلشارۋاشىلىق تسەحتارى جانە بورداقىلاۋ الاڭدارى ىسكە قوسىلعان. وبلىستىڭ 12 شارۋاشى­لىعىندا تامشىلاتىپ سۋارۋ تەحنو­لوگياسى قولدانىلادى. وسىنىڭ ناتيجە­سىندە قازىر وبلىس كوكونىس ونىمدەرى بويىنشا سۇرانىمنىڭ 60-70 پايىزىن قامتاماسىز ەتىپ وتىر. بالىق اۋلاۋ كولەمى جىلدان-جىلعا ارتىپ كەلەدى. 1991 جىلمەن سالىستىرعاندا بۇل سالا 1,4 ەسە وسىمگە قول جەتكىزدى. وعان استانا قالاسىنىڭ تۇرعىندارى مەن قوناقتارى 8-9 قىركۇيەك كۇندەرى ەلوردادا وتكىزىلگەن اتىراۋ وبلىسى كۇندەرى شەڭبەرىندەگى «وتان-انا» مونۋمەنتى الاڭىندا قانات جايعان وبلىس اۋىل شارۋاشىلىعى ونىمدەرىنىڭ ءجار­مەڭ­كەسىندە انىق كوز جەتكىزدى. اتىراۋ وبلىسى اكىمىنىڭ ورىنباسارى اسقار كەرىموۆتىڭ ايتۋىنشا, وبلىستىڭ بالىق شارۋاشىلىقتارى استاناداعى جارمەڭ­كەگە 15 توننا بالىق جەتكىزىپتى. اس­تانالىقتار ونىڭ 10 تونناسىن ءجار­مەڭكەنىڭ ءبىرىنشى كۇنى-اق ساتىپ الىپتى. سوعان بايلانىستى اتىراۋدان قوسىمشا تاعى دا 5 توننا بالىق جەتكىزىلگەن كورىنەدى. اتىراۋلىق كاسىپكەرلەر استانا قالاسىندا وتكەن جارمەڭكەدە شىنىمەن-اق مارتتىك تانىتتى. الاڭدا قاز-قاتار قونىس تەپكەن اقشاڭقاي شاتىرلارداعى ساۋدا بارىنشا قىزىپ تۇردى. ونىڭ سەبەبى دە مول ەدى. اتىراۋلىقتار ۇيىم­داستىرعان جارمەڭكەدە قوي ەتى 800 تەڭگەدەن, پياز  45 تەڭگەدەن, قىرىققابات 25 تەڭگەدەن, ءسابىز 55 تەڭگەدەن, قيار – 45, قاربىز – 20, قاۋىن – 35, كارتوپ – 45, الما 150 تەڭگەدەن ساۋدالاندى. اقيقاتىن ايتساق, اتىراۋ وبلى­سىنىڭ جارمەڭكەسىنە كەلگەن ەلوردا تۇرعىندارى بالىق جانە بالىق ءونىم­دەرىنە ءبىر جارىپ قالدى. استانالىق­تاردىڭ جوعارى سۇرانىسىنا يە بولعان كەپتىرىلگەن جانە تۇزدالعان بالىق­تاردىڭ 300 گرامى 400 تەڭگەدەن, توڭازىتىلعان تابان بالىقتىڭ 1 كيلوسى 200, ارنايى وسىرىلگەنى 250, ال 1 كيلو لاقانىڭ جون ەتى 500 تەڭگەدەن ساتىلدى. جىلقىباي جاعىپار ۇلى.   اۋليەاتا الەۋەتى ەل تاۋەلسىزدىگىنىڭ 20 جىلدىق مەرەيلى مەرەكەسى قارساڭىنداعى شارالار تىزبەگىندە العاش رەت استانادا وتكەن وبلىس كۇندەرى اياسىندا جامبىل وبلىسىنىڭ «حان شاتىر» ساۋدا ورتالىعى الاڭىندا ۇيىمداستىرعان جارمەڭكەسى دە قالا جۇرت­شىلىعىنىڭ كوڭىلىن ەرەكشە اۋداردى. اۋليەاتا جەرىنەن جەتكەن كوكونىس, باۋ-باقشا ونىمدەرى, بالىق, ەت جانە ءسۇت ونىمدەرىنە دەگەن سۇرانىس باسىم بولدى. جالپى, جامبىل وبلىسى بۇل كۇندەرى استانا قالاسىنىڭ تۇرعىندارى مەن قوناقتارىنا ءوڭىردىڭ 20 جىل ىشىندە قول جەتكىزگەن جەتىستىكتەرىن تولىعىمەن تانىتا ءبىلدى. ءيا, كونە اۋليەاتا ءوڭىرىنىڭ تابىسى دا تاۋەلسىزدىگىمىزدىڭ 20 جىلدىعى ىشىندە تولايىم بولعانى انىق. ماسەلەن, وبلىستا اۋىل شارۋاشىلىعىنىڭ جال­پى ءونىمى 1994 جىلمەن سالىستىرعاندا 13 ەسە ارتقان. ەگەر ول 1994 جىلى 5 ميلليارد تەڭگە بولسا, 2010 جىلى 68,5 ميلليارد تەڭگەگە جەتكەن.  وبلىستىڭ اگرارلىق سالاسىنا تارتىلعان ينۆەستيتسيا كولەمى 2010 جىلى 8,3 ميلليارد تەڭگەگە جەتىپ, 1994 جىلمەن سالىس­تىرعاندا 35 ەسە وسكەن. وبلىستا كارتوپ ءوسىرۋ دەڭگەيى 1991 جىلعى 3,8 مىڭ گەكتاردان 2011 جىلى 7,2 مىڭ گەكتارعا دەيىن, كوكونىس جانە باقشا داقىلدارىنىڭ كولەمى 1991 جىل­عى 6,8 مىڭ گەكتاردان 29,8 مىڭ گەكتارعا دەيىن, جەمىس-جيدەك جانە جۇزىمدىكتەر كولەمى 1991 جىلعى 818,9 گەكتاردان, 2011 جىلى 2852,5 گەكتارعا دەيىن ارتقان. مال شارۋاشىلىعىندا 1991 جىل­مەن سالىستىرعاندا ءسۇت ءوندىرۋ 2,9 ەسە, ەت ءوندىرۋ 1,7 ەسە ارتقان. وبلىس شارۋا­شىلىقتارى 2001-2006 جىلدار ارا­لىعىندا جالپى قۇنى 1,4 ميلليارد تەڭگەنى قۇرايتىن 659 بىرلىك اۋىل­شارۋاشىلىق تەحنيكالارىن ساتىپ السا, تەك 2011 جىلدىڭ 8 ايىندا عانا 2,5 ميلليارد تەڭگەگە 232 بىرلىك جاڭا تەحنيكا العان. جىلىجاي شارۋا­شىلىق­تارىنىڭ كولەمى 2001 جىلمەن سالىس­تىرعاندا 2,1 ەسەگە ارتقان. قازىر وبلىستا جالپى اۋماعى 21,2 گەكتاردى قۇرايتىن 304 جىلىجاي جۇمىس ىستەيدى. بيىلعى جىلى تاعى دا جالپى اۋماعى 5 گەكتار 100 جىلىجاي قۇرىلىسىن سالۋ جوسپارلانىپ وتىر. «حان شاتىر» ساۋدا ورتالىعى الا­ڭىندا ورنالاسقان جامبىل وبلىسىنىڭ جارمەڭكەسىنەن وسى جەتىستىكتەر شىنى­مەن كورىنىس تاپتى. ءبىز تۇرار رىسقۇلوۆ اۋدانىنداعى «بەرەكە اسىل تۇقىمدى مال شارۋاشىلىعى» شارۋا قوجالىعى­نىڭ جەتەكشىسى عابيت سۇلتانباەۆتى اڭگىمەگە تارتتىق. – مەن كوپتەن بەرى اسىل تۇقىمدى مال وسىرۋمەن اينالىسىپ كەلەمىن. نەگىزىنەن شارۋاشىلىعىمىزدا قازاقتىڭ ەتتى اقباس سيىرلارى مەن قىلشىق ءجۇندى قازاقى قويلارى وسىرىلەدى. سوناۋ ءبىر تاۋەلسىزدىگىمىزدىڭ تاڭى ەندى عانا ارايلاپ اتقان جىلدارى وراسان قيىن­دىق­تارعا تاپ بولعانىمىز دا راس. قيىندىق قانشاما قابىرعامىزعا باتسا دا, شارۋا­شىلىعىمىزداعى اسىل تۇقىم­دى مال باسىن جوعالتپاۋعا بارلىق كۇش-جىگەرىمىزدى سالدىق. ارينە, شىعىنسىز بولعان جوق. قازىر شارۋاشىلىعىمدا 3 مىڭ باس قازاقى قىلشىق ءجۇندى قوي تۇقىمى وسىرىلەدى. بۇل قويدىڭ ءجۇنى ساپالى, ەتى مول ەكەنىن ءاربىر قازاق بالاسى بىلسە كەرەك. تاۋبە, سوڭعى كەزدە مەملەكەت باسشىسىنىڭ شىنايى قام­قورلىعىنىڭ ارقاسىندا اقتىلى قويى­مىزدى ءوز ءتولى ەسەبىنەن كوبەيتۋگە دەن قويدىق. قازىر شارۋاشىلىق مالشىلارى 200 باس قازاقتىڭ ەتتى اقباس سيىرلارىن ءوسىرىپ وتىر. بۇل تۇقىمنىڭ اسىلدىعىن اتا-بابامىز ەرتە باستان-اق تانىعان. بۇل سيىرلار كۇي تالعامايدى. جايى­لىمدا ءجۇرىپ-اق توننالاعان ەت بەرەدى. سونىمەن قاتار, 1700 گەكتار جەرگە ەگىن ەگەمىز. قازىر شارۋا قوجالىعىندا 20-عا جۋىق ادام تۇراقتى تۇردە جۇمىسپەن قامتىلعان. سونىمەن قاتار, تاراز قالاسىندا اسحانا ۇستايمىن, الماتى – تاشكەنت – تەرمەز باعىتىنداعى تاسجول بويىندا ءدامحانالار اشتىم. زايىبىم گۇلميرا ەكەۋمىز 6 بالا ءوسىرىپ, شارۋاشىلىعىمىزدى دوڭگەلەتىپ كەلەمىز, دەيدى قاراپايىم شارۋا قوجا­لىعىنىڭ جەتەكشىسى عابيت سۇلتانباەۆ.   شىعىس شىرايى شىنىمەن شىعىستىقتار استانا قالاسى اكىمدىگى الدىنداعى ورتالىق الاڭنىڭ ەكى كۇن بويى شىرايىن كىرگىزىپ-اق جىبەردى. كۇمبىرلەگەن كۇي, اۋەزدى ءان, ۇزاقتى كۇن ءبىر تولاس تاپپاي, اقشاڭقان شاتىرلارداعى ساۋدا سورەلەرىنە قويىلعان ازىق-ت ۇلىك تاۋارلارىن الۋعا كەلگەن استانالىق تۇرعىنداردىڭ كوڭىلىن كوتەرىپ, جۇرەكتەرىنە ەل تاۋەلسىزدىگىنىڭ 20 جىلدىعى ىشىندە جەتكەن جەتىستىكتەر مەن بەرەكە-بىرلىكتىڭ اسەرىن پاش ەتتى. 2009 جىلى شىعىس قازاقستان وبلىسىنىڭ اكىمى «تۋعان جەرگە تاعزىم» اتتى پاتريوتتىق اكتسياعا ۇيىتقى بولعان ەكەن. سودان بەرى بۇل وڭىردە «تۋعان جەر – التىن بەسىگىم» اتتى وبلىستىڭ اۋداندارى مەن قالالارىنىڭ مادەنيەت كۇندەرىن تۇراقتى وتكىزىپ تۇرۋ داستۇرگە اينالىپتى. ءوڭىر باسشىسى ەل تاۋەلسىزدىگىنىڭ 20 جىلدىعى قارسا­ڭىندا وبلىستا 20 جارقىن ءىس باس­تاماسىن كوتەرىپتى. بۇل باستاما ءاربىر قالا مەن اۋدان, اۋىل مەن مەكەمە, كاسىپورىن مەن فيرمالاردا جالعاسىن تاۋىپ كەلەدى. وسىنىڭ ناتيجەسىندە مىڭداعان الەۋمەتتىك مازمۇنداعى ءما­سەلەلەر شەشىمىن تاپقان. شىعىس قا­زاقستان وبلىسى كاسىپكەرلەرىنىڭ كومە­گىمەن بريۋسسەل, سەمەي قالالارىندا, قاينار اۋىلىندا يادرولىق سىناق قۇرباندارىنا ارنالعان ەسكەرتكىشتەر بوي كوتەردى. اباي اۋدانىنىڭ قاراۋىل اۋىلىندا مەكتەپ-ينتەرناتقا كۇردەلى جوندەۋ جۇمىستارىن جۇرگىزدى. ءۇرجار اۋدانىنىڭ ماقانشى اۋىلىندا ورتا­لىق اۋرۋحانا بوي كوتەردى. وبلىستىڭ ءىرى قالاسى – سەمەي تاۋەلسىزدىگىمىزدىڭ 20 جىلدىعىمەن ورايلاس بيىل يادرولىق سىناق پوليگو­نىنىڭ ەلباسى جارلىعىمەن جابىلۋى­نىڭ 20 جىلدىعىن اتاپ ءوتتى. وسى ماڭىزدى داتاعا بايلانىستى شارالار وبلىستا ءالى جالعاسىن تابۋدا. الدى­مىزداعى قاراشا ايىندا سەمەيدە حالىقارالىق يادرولىق قارۋعا قارسى فورۋم وتكىزىلمەك. جاقىندا شىعىس قازاق­ستاندا وبلىس اكىمدىگى مەن «تۇركسوي» تۇركى مادەنيەتى حالىقارالىق ۇيىمى­نىڭ باستاماسىمەن «التاي – تۇركى الەمىنىڭ التىن بەسىگى» اتتى تۇڭعىش حالىقارالىق فورۋم وتكەنى بەلگىلى. شىعىس قازاقستان وبلىسىنىڭ استانا قالاسىنداعى كۇندەرى اياسىندا ۇيىمداستىرىلعان شارالار شىن ءمانىن­دە تارتىمدىلىعىمەن, اۋقىمدىلىعى­مەن كەلۋشىلەردى ءتانتى ەتتى. استانا قالاسى اكىمدىگى الدىنداعى ورتالىق الاڭدا بىرنەشە التى قانات كيىز ۇيلەر بوي كوتەرىپتى. ءسانى مەن سالتاناتى جاراسقان كيىز ۇيلەرگە كوڭىل اۋدارۋ­شىلار دا كوپ ەكەن. ءبىز وسى كيىز ۇيلەر الدىندا ۇيىمداستىرۋشىلىق شارالا­رىمەن اينالىسىپ جۇرگەن شىعىس قازاقستان وبلىستىق ءبىلىم باسقارما­سىنىڭ باستىعى نازىگۇل سەيسەمبينانى اڭگىمەگە تارتتىق. – ەلوردادا وتكىزىلىپ جاتقان وبلىس كۇندەرى باعدارلاماسى شەڭبەرىندە ۇيىمداستىرىلعان شارالارىمىز اۋ­قىم­دى. وبلىس باسشىسى بەردىبەك ساپارباەۆتىڭ تىكەلەي تاپسىرماسىمەن بىرنەشە قايىرىمدىلىق شارالارىن وتكىزىپ جاتىرمىز. استانا قالاسىندا 204 اتا-اناسىز قالعان جەتكىنشەكتەر تاربيەلەنەتىن جەتىم بالالار ءۇيى بار ەكەن. ءوڭىر باسشىسى وسى جەتىم بالالار ۇيىنە 1 فلياگا بال, ەت جانە جۇزدەگەن كيلو قاربىز جونەلتتى. ارقا توسىندە ورنالاسقان باس قالا­مىزعا كەلىپ وتىرعاننان كەيىن شى­عىستىڭ شىرايلى داستارقانىنان ءدام تاتقىزۋ – ءبىر پارىز. ونىڭ سىرتىندا وبلىس باسشىسىنىڭ تاپسىرماسىمەن جەتىم بالالار ۇيىندەگى بۇلدىرشىندەرگە جانە استانا  قالاسىنداعى قارتتار ءۇيىن­دەگى ۇلكەندەرگە قايىرىمدىلىق داستارقانىن جايىپ, تۇسكى اس ءمازىرىن جاسادىق. – ءيا, شىعىس قازاقستان وبلىسى كۇندەرى اياسىندا وتكىزىلىپ جاتقان قا­يىرىمدىلىق شارالارعا ءبىزدىڭ قارت­تارىمىز شىنايى العىس سەزىمىن بىلدىرۋدە, – دەدى وسى ساتتە سوزگە ارالاسقان استانا قالالىق ارداگەرلەر كەڭەسىنىڭ حاتشىسى قىدىرباي بەيسەنوۆ. – جەتىم بالالار ءۇيىنىڭ تاربيەلەنۋشىلەرى مەن قارتتار ءۇيىنىڭ ۇلكەندەرىنەن باسقا, ەكى كۇننەن بەرى وسى التى قانات اقبوز ۇيلەردەگى بەرەكەلى داستارقاننان قالامىزداعى ۇلى وتان سوعىسىنا قاتىسۋشىلار مەن ءبىر­قاتار ارداگەرلەر دە ءدام تاتتى. ۇلكەندى سىيلا­عاننىڭ ۇنەمى مەرەيى ءۇس­تەم بولماق. ەندەشە, ءوڭىر باسشىسىنا, شىعىس­قا­زاق­ستاندىقتارعا ايتار العى­سىمىز شەكسىز. اكىمدىك الدىنداعى ورتالىق الاڭدا تاۋەلسىز­دىگىمىزدىڭ 20 جىلدىعىنا بايلانىستى شارالار اۋ­قى­مىندا وتكىزىلىپ جاتقان وبلىس كۇندەرىنە بايلا­نىستى استانا قالاسىنىڭ اكىمى يمانعالي تاسما­عامبەتوۆ پەن شىعىس قا­زاقستان وبلىسىنىڭ اكىمى بەردىبەك ساپارباەۆ وسى شارالاردى جارىققا شىعارىپ جۇرگەن جۋرناليستەرمەن بريفينگ وتكىزدى. – ءبىز شىعىس قازاقستان وبلى­سىنىڭ كۇندەرى اياسىندا وتكىزىلىپ وتىرعان جارمەڭكەگە 500 توننادان استام ازىق-ت ۇلىك  تاۋارلارى مەن اۋىل­شارۋاشىلىق ونىمدەرىن اكەلدىك. وڭىرىمىزدە شىعارىلاتىن تەحنيكالار مەن وندىرىستىك تاۋارلاردىڭ كورمە­لەرىن ۇيىمداستىردىق. شىعىس قول ونەرى مەن مادەنيەتىنىڭ جەتىستىكتەرى دە وسى كورمەلەردە كورىنىس تاپقان. ءبىزدىڭ ماقساتىمىز, وبلىس كۇندەرىن وتكىزۋ كەزىندە ءوڭىرىمىزدىڭ ەكونومي­كالىق جەتىستىكتەرىن كورسەتىپ, ءجار­مەڭكە ۇيىمداستىرۋمەن شەكتەلۋ ەمەس. وزدەرىڭىز كۋا بولىپ وتىر­عانداي, ەكى كۇننەن بەرى شىعىس ءوڭىرىنىڭ ايتۋلى ونەر ساڭلاقتارى ساحنالاردان وزدەرىنىڭ اۋەزدى اندەرى مەن قۇيقىلجىعان كۇيلەرىن تارتۋ ەتۋدە. بۇل – وڭىرلەر اراسىنداعى رۋحاني بايلانىستى نىعايتۋ, ەل تاۋەلسىز­دىگىنىڭ 20 جىل ىشىندەگى بەرەكە-بىرلىگىنىڭ تولايىم جەتىستىكتەرىن پاش ەتۋ, – دەدى ءباسپاسوز بريفينگىندە شىعىس قازاقستان وبلىسىنىڭ اكىمى بەردىبەك ساپارباەۆ. – ەكى كۇننەن بەرى ەلىمىزدىڭ باس قالاسىندا ايتۋلى مەرەكە ورىن الدى. ساۋدا جارمەڭكەسى ۇيىمداستىرىلعان الاڭداردا ساۋدا-ساتتىقپەن قاتار, ماڭىزدى دا مازمۇندى مادەني شارالار ۇيىمداستىرىلۋدا. وزدەرىڭىز كورىپ تۇرعانداي, جارمەڭكەگە جينال­عان جۇرتتىڭ جۇزىنەن قۋانىش پەن ريزالىقتىڭ لەبى ەسەدى. بۇل – وڭىرلەر جەتكەن تابىس تارتۋى, بۇل – ەل ءبىرلى­گىنىڭ جەمىسى. بۇل – تاۋەلسىزدىكتىڭ 20 جىلدىعىندا ەلباسى نۇرسۇلتان نازارباەۆتىڭ سارا باسشىلىعىمەن تۇتاس ەلىمىز جەتكەن زور جەتىستىكتىڭ ايعاعى. تاۋەلسىزدىكتىڭ 20 جىلدىق مەرەيلى مەرەكەسى قارساڭىنداعى شارالار اۋقىمىندا وتكىزىلىپ وتىرعان اتىراۋ, جامبىل, شىعىس قازاقستان وبلىستارىنىڭ كۇندەرى وتە تابىستى ءوتتى, – دەدى استانا قالاسىنىڭ اكىمى يمانعالي تاسماعامبەتوۆ جۋرناليستەرمەن بولعان جۇزدەسۋدە. – الايدا, باسقا ەكى وبلىسقا قاراعاندا شىعىس قازاقستان وبلىسىنىڭ وسى شارا اياسىندا اتقارعان اۋقىمدى جۇمىسىن اتاپ كورسەتۋىمىز كەرەك. وبلىس بۇل ماڭىزدى شاراعا شىن مانىندە ۇلكەن دايىندىقپەن, شىنايى ۇيىمداس­تىرۋ­شىلىق بەلسەندىلىكپەن كەلگەن. وبلىس كۇندەرى شەڭبەرىندە وتكىزىلىپ جاتقان شارالاردىڭ ءبارى اۋقىمدى دا مازمۇندى. سوندىقتان شىعىسقازاق­ستاندىقتارعا, ءوڭىر باسشىسى بەردىبەك ساپارباەۆقا استانا قالاسى جۇرتشىلىعى اتىنان العىسىمدى بىلدىرگىم كەلەدى. باس قالامىزدا وبلىس كۇندەرىن وتكىزۋ بۇل شارالارمەن عانا شەكتەلمەيدى. بەرەكە-بىرلىگىمىزدى جاراستىرا وتىرىپ, بولاشاقتا دا بۇل ءداستۇرلى شارانى لايىقتى جالعاستىرامىز. لايىم, ەل بىرلىگى نىعايىپ, بەرەكەمىز تولايىم بولسىن! ەل تاۋەل­سىزدىگىنىڭ 20 جىلدىق تورقالى تويى اۋقىمىندا جۇزدەسەر مەرەيلى دە ماۋەلى جۇزدەسۋلەرىمىز جالعاسا بەرسىن! سۋرەتتەردى تۇسىرگەن ورىنباي بالمۇرات.