وسى ماقالانى جازباس بۇرىن وبلىس ورتالىعىنداعى دۇيسەنوۆ كوشەسى 177 ۇيدە اقادىلوۆتەرگە ارنالعان مەموريالدىق تاقتا الدىنا باردىم. تاقتادا وتان سوعىسىنا قاتىسقان پارتيزان وتباسى جىلبەك پەن جامال, ورتالارىندا قىزدارى مايا بەينەلەنگەن. سونىمەن بىرگە, قالاداعى داڭق الاڭى مەموريالدىق تاقتاسىنا دا اقادىلوۆتەردىڭ ەسىمدەرىن جازىپ, كوشە بەرىپ, ەسكەرتكىش ورناتساق دەگەن وي كەلدى.
كەزىندە جازۋشى اعامىز ءادي ءشارىپوۆتىڭ «پارتيزان قىزى» كىتابىن ءبارىمىز دە قىزىعا وقىدىق. پوۆەستەگى كىشكەنتاي قىز مايانىڭ اكە-شەشەسى جىلبەك پەن جامال اقادىلوۆتەر باياناۋىلدىڭ ءبىرلىك اۋىلىندا ءدۇنيەگە كەلگەن. جىلبەك شىمكەنتتەگى قاپلانبەك اۋىلشارۋاشىلىق تەحنيكۋمىن ءبىتىرىپ, سارىاعاشقا ءجىبەرىلەدى. سودان سوڭ كۋشكا قالاسىندا جاساقتالعان 152 اتتى اسكەر قاتارىنا الىنىپ, سۇيگەن جارى جامالمەن بىرگە بەلورۋسسياعا اتتانادى.
كەنەتتەن سوعىس باستالادى. بەلارۋس ورمانىنداعى پارتيزاندار قوسىنىندا مايا 1941 جىلدىڭ 27 قاراشاسىندا ومىرگە كەلەدى. جىلبەك اقادىلوۆ رۋمىنيا, ۆەنگريا, چەحوسلوۆاكيا, اۆستريا جەرلەرىن جاۋدان ازات ەتۋگە قاتىسقان. سوعىستان كەيىن جىلبەك اتا قارجى سالاسىندا, جامال اپا تىگىنشى, ال «پارتيزان قىزى» مايا ۇستاز بولىپ قىزمەت ەتتى. اقادىلوۆتەردىڭ سوعىس كەزىندەگى جاۋىنگەرلىك جولدارى تۋرالى كىتاپ تا بار, كينوفيلم دە بار.
جوعارىدا ايتىلعان ەسكەرتكىش تاقتاعا كەلەتىن بولساق, مارقۇم دىبىسبەك تاستەنوۆ دەگەن اعامىز 2003 جىلى قالالىق اكىمدىكتىڭ ەسىگىن توزدىرىپ ءجۇرىپ, «ءوز قاراجاتىڭىزعا جاساي بەرىڭىز» دەگەن رۇقساتتان كەيىن وسى تاقتا ورناتىلعان ەدى. سوعىس ءورتىن كورگەن جاندارعا قالالىق اكىمدىك وسىلاي نەمقۇرايلىق تانىتتى.
...وتكەن جىلدىڭ كۇز ايىندا باياناۋىلدىڭ تورايعىر, بىرلىك, اقسان اۋىلدارىنا جولساپارمەن بارىپ قايتقانبىز. ءبىرلىكتە اقمەكتەپ ءبولىمشەسىن قوسقاندا بارلىعى مىڭعا جۋىق ادام قالىپتى. مەكتەپتە 150 وقۋشى ءبىلىم الادى. ءبىز كورگەنىمىزدەي, مەكتەپ ءىشى جارقىراپ تۇر, سىنىپتارى كەڭ, تاپ-تازا. اۋىل بالالارىنىڭ وقىپ-ءبىلىم الۋلارىنا بارلىق جاعداي جاسالىپتى. اۋلاسىندا جاساندى جاسىل توسەنىشتەرى بار سپورت الاڭى بار.
بىرلىكتىڭ مەكتەبى ءوڭىردەگى «ۇزدىك اۋىل مەكتەبى» قاتارىنا الىنىپ, وقۋ-ءبىلىم سالاسىنداعى جەتىستىكتەرىمەن الدا كەلەدى ەكەن. 2016 جىلدىڭ قاراشا ايىندا ۇكىمەت قاۋلىسى شىعىپ, «بىرلىك جالپى ورتا ءبىلىم بەرۋ مەكتەبىنە» جىلبەك اقادىلوۆ ەسىمى بەرىلىپتى.
«ءولى ريزا بولماي, ءتىرى بايىمايدى» دەگەن اۋىل تۇرعىندارى ج.اقادىلوۆتىڭ زيراتىنىڭ باسىنا بارىپ, بەلگى ورناتىپ قايتىپتى.
فاريدا بىقاي,
«ەگەمەن قازاقستان»
پاۆلودار وبلىسى,
باياناۋىل اۋدانى