مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى بيىلعى جولداۋى مەن بيلىك تارماقتارى اراسىندا وكىلەتتىكتەردى قايتا ءبولۋ ماسەلەلەرى جونىندەگى ۇندەۋىن ءتۇسىندىرۋ ماقساتىندا وڭىرگە ارنايى كەلگەن پارلامەنت ءماجىلىسى دەپۋتاتتارىنىڭ جۇرتشىلىقپەن كەزدەسۋلەرى جالعاسىپ جاتىر.
پارلامەنت ءماجىلىسىنىڭ دەپۋتاتتارى ءۋاليحان قاينازاروۆ, ۆاسيلي ولەينيك پەن امانگەلدى داۋرەنباەۆ وسكەمەن قالاسىندا بىرنەشە كەزدەسۋ وتكىزدى. «دەنساۋلىق ساقتاۋ سالاسىنىڭ مىندەتتى الەۋمەتتىك مەديتسينالىق ساقتاندىرۋ جۇيەسىنە ءوتۋى ەكونوميكالىق تۇرعىدان العاندا مەديتسينالىق مەكەمەنىڭ جاعدايىنا بايلانىستى بولماق, – دەدى ءۋاليحان قاينازاروۆ «وسكەمەن تيتان-ماگني كومبيناتى» اق جۇمىسكەرلەرىمەن وتكەن كەزدەسۋدە. – ەگەر ەكونوميكا داميتىن بولسا, ەلدىڭ تابىسى دا ارتادى. سول ارقىلى مەديتسينالىق ساقتاندىرۋ قورىنا تۇسەتىن ءتۇسىم كوبەيەدى. الايدا, ازاماتتارعا ءوزىنىڭ دەنساۋلىعى ءۇشىن ءبىرىنشى كەزەكتە جاۋاپكەرشىلىكتى ءوزى الاتىنىن, سودان كەيىن عانا دارىگەرلەر مەن مەملەكەت تۇراتىندىعىن جەتكىلىكتى تۇردە ءتۇسىندىرۋ قاجەت».
اتالعان ءۇش دەپۋتات قالاداعى №1 اۋرۋحانادا ءوڭىردىڭ دەنساۋلىق ساقتاۋ سالاسى قىزمەتكەرلەرىمەن كەزدەسىپ, ۇسىنىس-پىكىرلەرىن تىڭدادى. «ەلباسىنىڭ بيىلعى جولداۋى – مەملەكەتىمىزدىڭ دامىعان 30 ەلىنىڭ قاتارىنا قوسىلۋىنا ىقپال ەتىپ, ەكونوميكامىزدىڭ باسەكەگە قابىلەتتىلىگىن ارتتىرۋعا, تۇرعىنداردىڭ ءومىر ساپاسىن جاقسارتۋعا باعىتتالعان قۇندى قۇجات. ەڭ الدىمەن, جولداۋدى ىسكە اسىراتىن ءسىز بەن بىزدەر ەكەنىن ەستەن شىعارماعانىمىز ابزال», – دەدى ۆاسيلي ولەينيك.
حالىق قالاۋلىلارى مەملەكەت باسشىسىنىڭ بيلىك تارماقتارىن قايتا ءبولۋ ءجونىندەگى ۇندەۋى ۇكىمەت پەن پارلامەنتتىڭ جاۋاپكەرشىلىگىن ارتتىرىپ قانا قويماي, ەل دامۋىنا تىڭ سەرپىن بەرەتىنىن دە تىلگە تيەك ەتتى.
ازامات قاسىم,
«ەگەمەن قازاقستان»
وسكەمەن