كەشە ەڭبەك جانە حالىقتى الەۋمەتتىك قورعاۋ مينيسترلىگىندە «جۇمىسپەن قامتۋدىڭ جول كارتاسى 2020» باعدارلاماسىن جۇزەگە اسىرۋ قورىتىندىسى تۋرالى, سونىمەن قاتار, جاڭا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسى جايلى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ءبىرجان نۇرىمبەتوۆتىڭ قاتىسۋىمەن ءباسپاسوز ءماسليحاتى بولىپ ءوتتى.
ول ءوز سوزىندە 2016 جىلى مەملەكەت باسشىسىنىڭ تاپسىرماسىمەن جاڭا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسى جاسالعانىن, سوعان بايلانىستى «جۇمىسپەن قامتۋدىڭ جول كارتاسى-2020» باعدارلاماسىن ىسكە اسىرۋ اياقتالعانىن ەسكە سالدى.
«جقجك-2020» باعدارلاماسىن جۇزەگە اسىرۋ كەزىندە, 2011-2016 جىلدار ارالىعى 800 مىڭعا جۋىق ادامعا مەملەكەتتىك قولداۋ شارالارىنىڭ پايداسى ءتيدى. باعدارلامانىڭ ءبىرىنشى باعىتى اياسىندا 10,5 مىڭ جوبا اتقارىلىپ, 103,8 مىڭ ادام جۇمىسقا ورنالاستى. ەكىنشى باعىت تۇرعىسىندا 44,8 مىڭنان استام قازاقستاندىق كاسىپكەرلىك نەگىزدەرىن وقىپ, ولاردىڭ ىشىندە 29,9 مىڭنان استامى العاش رەت ءوز ءىسىن اشىپ, ناتيجەسىندە قوسىمشا 42 مىڭ ادام جۇمىسپەن قامتىلدى. ءۇشىنشى باعىت بويىنشا كاسىپتىك ءبىلىم العان سوڭ, 110 مىڭ قازاقستاندىق جۇمىس تاپتى جانە 111 مىڭنان استام ادام الەۋمەتتىك جۇمىس ورىندارىنا تارتىلىپ, 77,6 مىڭى تۇراقتى جۇمىس ورنىن يەلەندى. جاستار تاجىريبەسىنە 91 مىڭ جاس ازامات جولداما الىپ, 57,4 مىڭى ەڭبەكپەن قامتىلدى. سونىمەن قاتار, ءۇشىنشى باعىتقا قاتىستى, ەكونوميكالىق الەۋەتى تومەن اۋىلدىق جەرلەردەن كوشىرىلگەن 19,3 مىڭ ادامنىڭ 7 مىڭدايى جۇمىسقا تۇردى.
وسى ورايدا, ءتيىستى دەرەكتەر قورىنداعى بوس جۇمىس ورىندارىنا 344,6 مىڭ ادام ورنالاستىرىلدى. «جقجك-2020» باعدارلاماسىن جۇزەگە اسىرۋ ارقىلى قازاقستانداعى جۇمىسسىزدىق دەڭگەيىن 5%-دان اسىرماي ۇستاپ تۇرۋعا ءمۇمكىندىك تۋدى», دەدى ءبىرجان نۇرىمبەتوۆ.
ۆيتسە-مينيستر جاڭا ءناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسىندا بىرقاتار ماسەلەلەرگە كوڭىل بولىنگەنىن جەتكىزدى. ولار – سۇرانىسقا يە كاسىپتەر مەن كاسىپكەرلىك قاعيداتتارىنا جاپپاي وقىتۋ مەن داعدىلاردى ۇيرەتۋ, جاپپاي كاسىپكەرلىككە جاعداي جاساۋ, جۇمىسقا ورنالاسۋعا ىقپال ەتۋ مەن ەڭبەككە جۇمىلۋدى قولداۋ ارقىلى ەڭبەك نارىعىن دامىتۋ.
«اتالعان باعدارلامانىڭ ءبىرىنشى باعىتى اياسىندا 2,5 جىلعا دەيىنگى وقۋ مەرزىمىمەن كوللەدجدەر اۋقىمىندا تەگىن كاسىپتىك-تەحنيكالىق ءبىلىم بەرۋ ۇيىمداستىرىلىپ, مۇندا مەكتەپتى اياقتاعاننان كەيىن وقۋ ورىندارىنا تۇسپەگەن جاستارعا نازار اۋدارىلادى. بيىل تەحنيكالىق جانە كاسىپتىك وقىتۋمەن 21 مىڭنان استام جاس قازاقستاندىقتى قامتۋ جوسپارلانىپ وتىر. وسىمەن بىرگە, كوللەدجدەر, «اتامەكەن» ۇكپ وقۋ ورتالىقتارى جانە كاسىپورىنداردىڭ وقۋ ورتالىقتارى شەڭبەرىندە كاسىپتىك وقىتۋعا ارنالعان قىسقا مەرزىمدى كۋرستار وتكىزىلەتىن بولادى. بۇل وقۋ تۇرىنە 26 مىڭ ادامدى قامتۋ كوزدەلۋدە», دەپ مالىمدەدى ۆيتسە-مينيستر.
ول, باعدارلامانىڭ ەكىنشى باعىتىندا, اۋىلمەن قاتار, قالالاردا دا جاپپاي كاسىپكەرلىكتى ىنتالاندىرۋ مەن دامىتۋعا جاعداي جاسالاتىنىن تىلگە تيەك ەتتى.
«وتەۋ مەرزىمى 7 جىل نەسيەنىڭ جىلدىق مولشەرلەمەسى 6 پايىز دەڭگەيدە ساقتالا وتىرىپ, 18 ميلليون تەڭگە ءمولشەرىندە ۇسىنىلادى. نەسيەنىڭ قولجەتىمدىلىگىن كەڭەيتۋگە ارنالعان كەلەسى ءبىر تىڭ شارا, نەسيەنى كەپىلدەندىرۋ تەتىگى ەنگىزىلەدى: بيزنەسىن ەندى باستاعاندارعا 85 پايىزعا دەيىن ءجانە جۇمىسى ءجۇرىپ تۇرعان كاسىپكەرلەرگە 50 پايىزعا دەيىن. قالالاردا شاعىن نەسيەلەۋ, اۋىلدىق جەرلەرگە ارنالعان شارتتارداعىداي, ەكىنشى دەڭگەيلى بانكتەر مەن شاعىن قارجى ۇيىمدارى ارقىلى جۇزەگە اساتىن بولادى. ءۇستىمىزدەگى جىلى 10 مىڭنان استام ادامعا شاعىن نەسيە بەرۋ جوسپارلانۋدا», دەدى ءبىرجان نۇرىمبەتوۆ.
تاعى ءبىر ماڭىزدى ماسەلە, enbek.kz پورتالىندا ەڭبەك نارىعىنىڭ ءبىرتۇتاس اقپارات بازاسى جاسالىپ, وندا عالامتور كەڭىستىگىندەگى بوس جۇمىس ورىندارى مەن جۇمىس ىزدەۋشىلەر جايلى بارلىق دەرەكتەر بىرىكتىرىلەدى دەپ كۇتىلۋدە.
ەسكە سالا كەتەيىك, 2017 جىلى باعدارلامانى جۇزەگە اسىرۋعا 85 ملرد تەڭگە ءبولۋ قاراستىرىلعان.
راۋان قايدار,
«ەگەمەن قازاقستان»