مەملەكەتتىك ءتىلدىڭ مەرەيىن ءۇستەم ەتۋدە حالىقارالىق «قازاق ءتىلى» قوعامىنىڭ ۇلەسى زور. وسى قوعامنىڭ وبلىستىق ۇيىمىنىڭ بەسىنشى ەسەپ بەرۋ-سايلاۋ جينالىسىندا سوڭعى ون جىلدا اتقارىلعان شارۋالارعا شولۋ جاسالىپ, ىلكىمدى ىستەر مەن شەشىمىن كۇتكەن ماسەلەلەر ورتاعا سالىنعانىمەن, نەگىزىنەن قازاق ءتىلىنىڭ قادىرىن ارتتىرۋ ءجايى اڭگىمە وزەگىنە اينالدى. بايانداما سىني قالىپتا ءوربىدى. اقتوبە قالالىق, حرومتاۋ جانە بايعانين اۋداندىق باستاۋىش ۇيىمدارىنىڭ جەتەكشىلەرى ءابدىراش ەسماحان, ءماريام جۇماعاليەۆا, گۇلجان دۋلاتباەۆا وزدەرىندە اتقارىلعان ىستەردى ەگجەي-تەگجەيلى باياندادى. بۇدان كەيىن شىعىپ سويلەۋشىلەر سوڭعى جىلدارى ۇيىمنىڭ جۇمىسى باسەڭسىپ كەتكەنىن تىلگە تيەك ەتتى. بۇل باعىتتا بىرقاتار شارۋالار اتقارىلعانىنا قاراماستان مەملەكەتتىك ءتىلدى دامىتۋداعى تۇيتكىلدەردىڭ جەتكىلىكتى ەكەنىن دە جاسىرمادى. وبلىستىق ۇيىم جۇمىسىن جۇرگىزۋدەگى ءبىر سارىندىلىق قالىپتاسقانى, سەرپىندىلىكتىڭ جوقتىعى ورتاق ويعا تامىزىق بولدى. پروفەسسور نيەتجان بەرىكوۆ مەملەكەتتىك ءتىلدى دامىتۋعا قولبايلاۋ كەدەرگىلەردىڭ ءتۇيىنىپ تارقاتا كەلىپ, مەملەكەتتىك ءتىلدىڭ دامۋىنا نەگىزىنەن ورىس ءتىلدى قازاقتاردىڭ ىنتالى ەمەس ەكەندىگىن ايتتى. ارداگەر جۋرناليست يدوش اسقار ۇيىم جۇمىسىن باسقارۋداعى اعاتتىقتاردى, ۇزاق ۋاقىت ۇيىمنىڭ جينالىسى وتپەگەنىن العا تارتا كەلىپ, ونىڭ تىزگىنىن جىگەرلى, باستامامەن جۇمىس ىستەيتىن جاستارعا بەرۋدى ۇسىندى. «بەيبىتشىلىك پەن كەلىسىم» كەڭەسى وبلىستىق ءبولىمشەسىنىڭ توراعاسى كەلدىباي ەسپاعامبەتوۆ مەملەكەتتىك ءتىلدىڭ تورگە وزۋىنا جەرگىلىكتى بيلىكتى ارالاستىرۋ كەرەكتىگىن ايتسا, قالالىق بالالار اۋرۋحاناسىنىڭ باس ءدارىگەرى قايىربەك توقتاروۆ بيلىك باسىنداعىلاردىڭ بالالارىن قازاق مەكتەپتەرىندە وقىتۋعا ق ۇلىقسىزدىعىن سىنعا الدى. سوندا ولار ءوزىنىڭ مەملەكەتىنىڭ بولاشاعىنا سەنبەي مە دەپ اشىنا سويلەدى. وبلىستىق تىلدەردى دامىتۋ باسقارماسىنىڭ باستىعى سەكسەنباي كۇلىمبەتوۆ ءىس قاعازدارىن قازاق تىلىندە جۇرگىزۋگە ءمان بەرمەي وتىرعان باسقارمالار مەن دەپارتامەنتتەردىڭ اتىن اتاپ, ءتۇسىن ءتۇستەدى. مەملەكەتتىك ءتىلدى قولدانۋدىڭ بانك, قۇقىق قورعاۋ سالالارىندا كەمشىن سوعىپ جاتقانىن جاسىرمادى. شىنى كەرەك, جينالىسقا قاتىسۋشىلار قازاق ءتىلىنىڭ قادىرى قايتسە ارتادى دەگەن تولعاقتى ماسەلەنى قوزعاپ, وسى ءتوڭىرەكتە وي ءوربىتتى.
وبلىستىق ۇيىمنىڭ ەسەپ بەرۋ-سايلاۋ جينالىسىنا حالىقارالىق «قازاق ءتىلى» قوعامىنىڭ پرەزيدەنتى ومىرزاق ايتباي ۇلى قاتىسىپ, ءسوز سويلەدى. وبلىستىق ۇيىمنىڭ جاڭا توراعاسى بولىپ اقتوبە مەملەكەتتىك پەداگوگيكالىق ينستيتۋتىنىڭ رەكتورى, ەكونوميكا عىلىمدارىنىڭ دوكتورى عالىمجان نۇرىشەۆ ءبىراۋىزدان سايلاندى.
ساتىبالدى ءساۋىرباي,
اقتوبە وبلىسى.