ەل ەكونوميكاسىنىڭ جوعارى ءوسىمىن بولجادى

حالىقارالىق ۆاليۋتا قورى (حۆق) قازاقستان ەكو­نوميكاسىنىڭ 2017 جىلى 2,5 پايىزعا وسەتىندىگىن اتاپ كورسەتتى. حۆق 8 اقپان كۇنگى تاراتقان اقپاراتىندا 2017 جىلى قازاقستان ەكونوميكاسىنىڭ ءوسىمى 2016 جىلعى قازان ايىندا بولجانعان 0,6 پايىزدىڭ ورنىنا, 2,5 پايىزعا دەيىن وسەتىندىگىن مالىمدەدى, دەپ حابارلايدى «ريا نوۆوستي» اگەنتتىگى. اقپان ايىنىڭ باسىندا وتكەن قازاقستان ۇكىمەتىنىڭ كەڭەيتىلگەن وتىرىسىندا مەملەكەت باسشىسى نۇرسۇلتان نازارباەۆ ەل ەكونوميكاسىن ودان ءارى دامىتۋ ءۇشىن قاجەتتى الەۋەت بار ەكەنىن ايتا كەلىپ, «تاياۋ جىلدارى يمپورت الماستىرۋ ىشكى جالپى ءونىمنىڭ 5 پايىزعا دەيىنگى ءوسىمىن بەرە الادى. ەكسپورتقا بەلسەندى تۇردە مەملەكەتتىك قولداۋ كورسەتۋ جاعدايىندا ونەركاسىپتىڭ باسىمدىعى بار سەكتورلارىنداعى ءوسىمنىڭ ءوزى عانا 6 ميلليارد دوللار بولادى. بۇل ەكسپورت كولەمىن 20 پايىزعا دەيىن, ىشكى جالپى ءونىمنىڭ كولەمىن 5 پايىزعا دەيىن ارتتتىرۋدى قامتاماسىز ەتەدى», دەپ اتاپ كورسەتتى. ەلىمىزدە جۇزەگە اسىرىلىپ جاتقان ەكونو­مي­كالىق جانە قۇرىلىمدىق رەفورمالاردىڭ وسىمگە باس­تاي­تىندىعىن ناقتى بولجاعان ەلباسىنىڭ رەفور­ماتورلىق كورەگەندىگىن حالىقارالىق بەدەلدى ۇيىم حۆق دا مويىنداعانداي. «قازاقستان ەكونو­مي­كاسىنىڭ وسىمىنە مۇناي ءوندىرىسىنىڭ ارتۋى جانە قۇرىلىمدىق رەفورمالاردىڭ جۇزەگە اسىرىلۋى وڭ ىقپال ەتتى», دەيدى حالىقارالىق ۆاليۋتا قورى ءوزىنىڭ مالىمدەمەسىندە. سونىمەن بىرگە, ۇيىمنىڭ اقپاراتتىق مالىمدەمەسىندە «قازاقستان بۇرىنعىسىنشا مۇنايدىڭ تومەن باعاسىنان جانە رەسەي, قىتاي جانە ەۋروپا ەلدەرى ەكونوميكاسىنىڭ باياۋ دامۋىنان تۋىنداپ وتىرعان قيىندىقتاردى لايىقتى جەڭە بىلۋدە. بيۋدجەتتىك كومەكتى تارگەتتەۋ, ۆاليۋتانىڭ ايىرباس باعامىن رەتتەۋ, ءوندىرىستى باسقارۋدى جەتىلدىرۋ جانە قۇرىلىمدىق رەفورمالار احۋالدى تۇراقتاندىرۋعا مۇمكىندىك بەردى. مىنە, وسىنداي يگى قادامدار 2017 جىلى ەكونوميكانىڭ وسىمىنە وڭ ىقپال ەتەتىن بولادى», دەپ اتاپ كورسەتىلگەن. جىلقىباي جاعىپار ۇلى, «ەگەمەن قازاقستان»