جاقىندا وڭتۇستىك قازاقستان وبلىستىق ەنشىلەس مەملەكەتتىك كاسىپورىندا جەر رەسۋرستارىن باسقارۋ اگەنتتىگىنىڭ “جەر رەسۋرستارى جانە جەرگە ورنالاستىرۋ مەملەكەتتىك عىلىمي-وڭدىرىستىك ورتالىعى” رەسپۋبليكالىق مەملەكەتتىك كاسىپورىنى باس ديرەكتورىنىڭ ورىنباسارى س.سەيداحمەتوۆ, قۇقىقتىق قامتاماسىز ەتۋ جانە مەملەكەتتىك ساتىپ الۋ باسقارماسىنىڭ باستىعى ن.سالىبەكوۆ, جەر رەسۋرستارى جانە جەرگە ورنالاستىرۋ عىلىمي-ءوندىرىستىك ورتالىعىنىڭ وڭتۇستىك قازاقستان ەنشىلەس مەملەكەتتىك كاسىپورنىنىڭ ديرەكتورى ن.تۇراشبەكوۆ جانە وسى كاسىپورىننىڭ ورتالىق ۇجىم باسشىلارى مەن اۋداندىق (قالالىق) جەر-كاداسترى فيليالدارىنىڭ جەتەكشىلەرى قاتىسۋىمەن جەدەل كەڭەس وتكىزىلدى. كۇن ءتارتىبىندە سارىاعاش اۋداندىق جەر-كاداسترى فيليالىندا ورىن العان زاڭ بۇزۋشىلىق وقيعاسى تالقىلاندى.
سارىاعاشتاعى وقيعاعا بەي-جاي قاراۋعا بولمايدى. اۋداندىق فيليال باسشىسى الدىنا جەر سۇراپ كەلگەن قاريادان ءتورت ميلليون تەڭگە تالاپ ەتكەن. مەملەكەتتىڭ ەمەس, ءوزىنىڭ جەكەمەنشىك جەرىن ساۋدالاپ وتىرعانداي الگى اقشانى العان.
مۇنداي بەيباستاقتىق ءتيىستى سالا باسشىلارىنىڭ شۇعىل جيىن وتكىزۋىنە سەبەپ بولعانعا ۇقسايدى.
اتالعان كەزدەسۋدە سىبايلاس جەمقورلىقپەن كۇرەستى كۇشەيتۋ ماسەلەسى مەن الداعى ۋاقىتتا كەمشىلىكتەردى بولدىرماۋ ءۇشىن ءىس-شارالار قابىلداندى.
– بۇگىنگى باسقوسۋدىڭ قانشالىقتى ماڭىزدى ەكەنىن بارشاڭىز دا سەزىنىپ وتىرعان بولارسىزدار. جەمقورلىقتىڭ بەلەڭ الۋى ءبىزدىڭ بۇل ماسەلە تۋرالى ءوزارا جاۋاپكەرشىلىگىمىزدىڭ تومەندىگى, ناقتى ءىس ارەكەتتىڭ ءجۇرگىزىلمەي وتىرعاندىعىن كورسەتەدى.
سوندىقتان جەمقورلىقپەن كۇرەس قاتاڭ جۇرگىزىلۋى قاجەت. ەشكىمنىڭ لاۋازىمىنا, شەن-شەكپەنىنە قاراۋدىڭ قاجەتى جوق. قىلمىس جاساعان ادام قانداي جاعدايدا دا جاۋاپقا تارتىلۋى ءتيىس, – دەگەن س.سەيداحمەتوۆ تالقىلانىپ وتىرعان ماسەلەنى ورىنداۋ ءۇشىن بىرقاتار ءىس-شارالاردى جۇزەگە اسىرۋدى تاپسىردى.
باقتيار تايجان, وڭتۇستىك قازاقستان وبلىسى.