قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ءبىرجان نۇرىمبەتوۆ ەلىمىزدە ناقتى قانشا ادام جۇمىسقا ءزارۋ ەكەنىن مالىمدەدى, دەپ حابارلايدى قازاقپارات.
«بۇگىندە بىزدە جۇمىسسىزدىق دەڭگەيى 4,9 پايىزدى قۇراپ تۇر. ەگەر الەمدىك اۋقىمدا سالىستىرساق, بۇل ايتارلىقتاي جاقسى ناتيجە. بىراق, ادامداردىڭ كوبى بىزدەگى 4,9 دەگەن كورسەتكىشكە كۇمانمەن قارايدى. سەبەبى, ولار ناقتى ومىردەگى جاعداي باسقاشا دەگەن پىكىردە. دەگەنمەن, وسى تۇرعىدا وزىندىك شىندىق تا بار», – دەدى نۇرىمبەتوۆ.
وسى ورايدا, ول رەسمي دەرەكتەر بويىنشا ەلىمىزدە جۇمىسسىزدار سانى 445 مىڭ ادام ەكەنىن اتاپ ءوتتى.
«بۇدان بولەك, 2,2 ملن ادام ءوزىن-ءوزى جۇمىسپەن قامتىپ وتىر. ازاماتتاردىڭ جەكە كاسىپكەرلىكپەن اينالىسىپ, ءوزىن تابىسپەن قامتاماسىز ەتكەنى جاقسى. الايدا, مۇندا دا بىرقاتار پروبلەمالار بار», – دەپ ءتۇسىندىردى ۆيتسە-مينيستر.
بۇل تۇرعىدا نۇرىمبەتوۆ ءوزىن-ءوزى جۇمىسپەن قامتىلعاندار قۇرىلىمىندا تەك كۇنكورىس ءۇشىن عانا تالپىنىپ جۇرگەندەر بار ەكەندىگىن ايتا كەلە, ولاردىڭ تابىسى ماردىمسىز ەكەندىگىن جەتكىزدى. دەگەنمەن دە, ستاتيستيكا ورگاندارىندا بۇل ادامدار ءوزىن-ءوزى جۇمىسپەن قامتىعاندار رەتىندە تىركەلىپ وتىر.
«سالىق ورگاندارىندا تىركەلىپ, جەكە قىزمەتىمەن اينالىساتىن ادامدار بار. ولار سالىق تولەيدى, زەينەتاقىلىق تولەمدەردى اۋدارادى. بىراق, ەش جەردە تىركەلمەگەن, وزىنشە جۇمىسپەن قامتىلعاندار. سونىمەن قاتار, وسى ازاماتتاردىڭ تابىستارى ازعانتاي عانا, كەيدە ولاردىڭ كىرىستەرى مۇلدەم بولماي جاتاتىن جاعدايلار دا كەزدەسەدى. وسى ورايدا, ولاردىڭ كوپشىلىگىنىڭ تابىستارى ەڭ تومەنگى كۇنكورىس دەڭگەيىنەن اسپايتىندىعىن ايتا كەتكەن ءجون. ستاتيستيكادا بۇنداي ادامدارعا قاتىستى ءونىمسىز ءوزىن-ءوزى جۇمىسپەن قامتىعاندار تەرمينى قولدانىلادى. وسىنداي ادامدار سانى بىزدە 360 مىڭنان استام», – دەپ ناقتىلادى نۇرىمبەتوۆ.
ونىڭ سوزىنە قاراعاندا, رەسمي تۇردە جۇمىسسىز اتانعان 445 مىڭ ادامعا اتالعان كورسەتكىشتى قوسقان كەزدە, ەلىمىزدە جۇمىسقا ءزارۋ نەمەسە تۇراقتى تابىسقا مۇقتاج كەم دەگەندە 800 مىڭ ادام بايقالادى.