ۋنيۆەرسيادانىڭ قاۋىپسىزدىگىنە جاۋاپ بەرەتىن رەسپۋبليكالىق ۆەدومستۆوارالىق جەدەل شتاب جۇمىس قورىتىندىسىن جاريا ەتتى. بۇل تۋرالى قازاقپارات حابارلادى.
اتالعان شتابقا ىشكى ىستەر ۆيتسە-ءمينيسترى, پوليتسيا گەنەرال-مايورى ەرلان تۇرعىمباەۆ جەتەكشىلىك ەتتى. قورىتىندى جۇمىستى جاريا ەتكەن تۇرعىمباەۆ الماتى جانە الماتى وبلىسى پوليتسياسى ۋنيۆەرسيادا كەزىندە قاتاڭ رەجىمدە جۇمىس اتقارعانىن ايتتى. سپورت شارالارى وتكەن جانە سپورتشىلار ورنالاسقان ورىنداردا قاۋىپسىزدىك بارىنشا كۇشەيتىلگەنىن جەتكىزگەن ۆيتسە-مينيستر جالپى, قاۋىپسىزدىك شاراسىنا پوليتسيا, ۇلتتىق ۇلان, قورعانىس مينيسترلىگى قىزمەتكەرلەرىنەن 7 مىڭ 800 ادام جۇمىلدىرىلعانىن مالىمدەدى. سونىمەن قاتار, بۇل شاراعا ءىىم الماتى اكادەمياسىنىڭ 500 دارىسكەرى مەن 2 123 جەكە كۇزەت قىزمەتىنىڭ كۇزەتشىلەرى دە تارتىلعان.
ءىىم مالىمەتىنە سۇيەنسەك, اتقارىلعان جۇمىستاردىڭ ناتيجەسىندە قاڭتار ايىندا قىلمىستىق قۇقىق بۇزۋ 13,3 پايىزعا, قوعامدىق ورىنداردا 7,5 پايىزعا, كوشەدەگى ءتارتىپ بۇزۋ 33,5, سونىڭ ىشىندە اۋىر جانە اسا اۋىر قىلمىستار 48 پايىزعا ازايعان. ۇرلىق 5,6 پايىزعا تومەندەگەن. ءتارتىپ بۇزۋ 14,3 پايىزعا, الاياقتىق 49,6 پايىزعا تومەندەگەن. قالادا جالپى, قىلمىس ءۇردىسى 10,8 پايىزعا ازايعان.
«ۋنيۆەرسيادا بارىسىندا 1 قىلمىستىق ءىس, 13 اكىمشىلىك قۇقىق بۇزۋ, 11 جەكە زاتتارىن جوعالتۋ فاكتىسى تىركەلدى. سونىمەن قاتار, 11 ادام بيلەتتەردى الىپ-ساتۋمەن اينالىسقانى ءۇشىن ۇستالدى. 2 ادام بەلگىلەنبەگەن ورىندا ساۋدا جاساعانى ءۇشىن اكىمشىلىك جاۋاپكەرشىلىككە تارتىلىپ, سپورت نىسانىندا ورنالاسقان دۇكەننەن كۇرتە ۇرلاعانى ءۇشىن 1 ادام ۇستالدى. ۋنيۆەرسيادا كەزىندە بيلەتتەردى الىپ-ساتۋ ارەكەتتەرى ورىن الماس ءۇشىن ءىىد تاراپىنان ارنايى توپ قۇرىلىپ, دەلدال ادامداردان 500 بيلەت تاركىلەندى», – دەدى تۇرعىمباەۆ.
«بۇگىنگى تاڭدا بارلىق سايىستار اياقتالدى. ۋنيۆەرسيادا قاتىسۋشىلارى قايتىپ جاتىر. الماتى حالىقارالىق اۋەجايى مەن تەمىرجول ۆوكزالىندا كەتىپ جاتقان شەتەلدىك ازاماتتاردى تىركەۋ جۇيەسى ۇزدىكسىز جۇمىس ىستەپ تۇر. جالپى, ستۋدەنتتىك ويىندار كەزىندەگى قاۋىپسىزدىكپەن قامتاماسىز ەتۋ تۋرالى ءىىم جانە ارنايى قىزمەت, وزگە دە قۇقىق قورعاۋ ورگاندارى تاراپىنان ۇسىنىلعان تۇجىرىمداما ءتيىمدى جۇزەگە اسىرىلدى. وسى كۇندەرى باق-تان قاۋىپسىزدىك شارالارى تۋرالى 176 اقپارات جارىق كوردى», – دەدى رەسپۋبليكالىق ۆەدومسۆتوارالىق جەدەل شتاب جۇمىسىن قورىتىندىلاعان تۇرعىمباەۆ.