قازاقستاندا قانداي مەملەكەتتىك ورگاندار تولىققاندى اقپارات بەرەدى؟

اقپارات جانە كوممۋنيكاتسيالار ءمينيسترى داۋرەن اباەۆ بۇگىندە مەملەكەتتىك جانە جەرگىلىكتى اتقارۋشى ورگانداردىڭ اشىق اقپاراتتى جاريالاۋ تۇسى اقساپ تۇرعانىن مالىمدەدى. «مينيسترلىك وتكىزگەن مونيتورينگكە سايكەس, ورتالىق مەملەكەتتىك ورگانداردىڭ ىشىندە ەنەرگەتيكا مينيسترلىگى, ادىلەت مينيسترلىگى, ينۆەستيتسيالار جانە دامۋ مينيسترلىگى, دەنساۋلىق ساقتاۋ جانە الەۋمەتتىك دامۋ مينيسترلىگىنىڭ (قازىرگى كەزدە ەكى بولەك مينيسترلىك - اۆت.) رەسمي سايتتارىندا تولىققاندى اقپارات بار. ال جەرگىلىكتى اتقارۋشى ورگانداردىڭ ىشىندە شىعىس قازاقستان, وڭتۇستىك قازاقستان مەن الماتى وبلىستارىنىڭ پورتالدارىندا xالىققا قاجەتتى اقپاراتتى جاريالاۋ جاعى جاقسى. «اقپارات تۋرالى» زاڭ كۇشىنە ەنگەلى بەرى ءبىرشاما وزگەرىستەر بايقالىپ وتىر. الايدا, اشىق اقپاراتتى رەسمي سايتتاردا جاريالاۋ جۇمىسى ءالى دە اقساپ كەلەدى», – دەدى اباەۆ. «مەملەكەتتىك ورگانداردىڭ ءتيىستى اقپاراتتى رەسمي سايتتاردا جاريالاۋ مىندەتى قازاقستاننىڭ سىبايلاس جەمقورلىققا قارسى ستراتەگياسىندا دا كورسەتىلگەن. دەگەنمەن, كەيبىر مەملەكەتتىك ورگاندار اشىق رەسۋرستار ارقىلى ءوز جۇمىسىن جەتكىلىكتى تۇردە كورسەتپەيدى ياعني, حالىققا تولىققاندى اقپارات بەرىلمەيدى. ماسەلەن, مەملەكەتتىك ورگانداردىڭ رەسمي سايتتارىنداعى بولىمدەردى اقپاراتپەن تولتىرۋ بويىنشا ناقتى مىندەت بار. الايدا, ول مىندەتتى ورىنداۋ جاعى كەنجەلەپ تۇر. وسى ۋاقىتقا دەيىن جىبەرىلگەن ەسكەرتۋلەرگە قاراماستان, رەسمي اقپاراتتى جاڭارتۋ جاعى سىن كوتەرمەيدى», – دەيدى قازاقستاننىڭ سىبايلاس جەمقورلىققا قارسى ستراتەگياسى اياسىنداعى شارالاردى اتقارۋدى باقىلاۋ جونىندەگى ارنايى توپتىڭ مۇشەسى ۆيكتور بۋسس. سونىمەن قاتار, مەملەكەتتىك ورگاندار ءوز سايتتارىن اعىلشىن تىلىندە جۇرگىزۋگە اسىقپايدى. سونىڭ سالدارىنان شەتەلدىك ساراپشىلار ولاردىڭ جۇمىسىنا باعا بەرە الماۋدا. «مەملەكەتتىك ورگانداردىڭ بارلىعىندا دەرلىك جەمقورلىققا قارسى قوسىمشالار اعىلشىن تىلىنە اۋدارىلماعان. مۇنىڭ ءوزى ءتيىستى جۇمىسقا ءاتۇستى قارايتىنىن كورسەتسە كەرەك. نەگىزى, حالىقارالىق ساراپشىلار رەسمي مالىمەتتەرمەن بىرگە سايتتاردان قاجەتتى اقپاراتتى الىپ وتىرادى. دەمەك, قازىر ولار ونداي اقپاراتتى الا الماي وتىر. سودان مەملەكەتتىك ورگانداردىڭ ءيميدجى  تومەندەيدى. سوندىقتان وسى سالاداعى جۇمىستى كۇشەيتۋ كەرەك», – دەيدى بۋسس.