سەمەي اكىمىنىڭ تۇرعىندارمەن ەسەپتىك بەرۋگە ارنالعان كەزدەسۋىندە شقو اكىمى دانيال احمەتوۆ «التاي» فۋتبول كلۋبىنىڭ پرەمەر-ليگادان شىعارىلۋ ماسەلەسىن ءتۇسىندىرىپ بەردى. بۇل تۋرالى arnapress.kz حابارلادى.
بۇعان دەيىن قازاقستان فۋتبول فەدەراتسياسىنىڭ اتقارۋشى كوميتەتى مۇنداي شەشىمدى كلۋبتىڭ سەرتيفيكاتسيا ەرەجەلەرىن ساقتاماۋعا بايلانىستى قابىلدانعانى حابارلانعان. بۇل تالاپتار بويىنشا «التاي» قۇرىلىمىندا 9 جاس كاتەگورياسى بويىنشا كەمىندە 14 توپتان تۇراتىن بالالار مەن جاسوسپىرىمدەر كوماندا بولۋ كەرەك. سونىمەن قاتار, پرەمەر-ليگاداعى بارلىق كوماندانىڭ ەكىنشى ليگادا جاستار قۇراماسى بولۋ كەرەك.
وسى ماسەلەگە قاتىستى «التاي» فۋتبول كلۋبىنىڭ جانكۇيەرى وبلىس اكىمىن كومانداعا قولداۋ كورسەتىپ, پرەمەر-ليگاعا قايتارۋ ءۇشىن شارالار قولدانۋىن سۇراعان بولاتىن.
«ءبىز فۋتبولدىڭ جاڭا ماۋسىمىن كۇتتىك, وتكەن جىل تولىق كوماندانى قولداپ كەلدىك, باسقا قالالارعا بىرگە باردىق. كوماندامىزدىڭ شەتتەتىلگەنىن بىلگەن سوڭ, سىزگە ارناپ ۆيدەوجولداۋ دايىندادىق. كوماندامىز قازاقستان پرەمەر-ليگاسىندا ءوڭىر اتىنان قاتىسۋىنا كومە بولىسۋىڭىزدى سۇرايمىن", - دەيدى سەرىكباي الىبەكوۆ.
ال وبلىس باسشىسى «التاي» كلۋبىنىڭ باسشىلارىن ايىپتاپ, جانكۇيەرلەردى بۇل جاعدايدى ءوز كۇشتەرىمەن شەشۋگە شاقىردى.
«بىلتىر كلۋبتى بىرىكتىردىك, قارجى بولدىك, جوعارى بىلىكتى مامان شاقىردىق. ال ەندى قارجى جاعىن انىقتاي باستاعاندا قىزىق جايتتار باستالدى. مەملەكەتتىك قارجىنىڭ قايدا كەتكەنىن بىلمەيمىز. قالاي تولەم جاساپ جاتقانى تۇسىنىكسىز, قىسقاسىن ايتقاندا مەملەكەت قارجىسىن وڭدى-سولدى شاشقان. ءبىز تۇسىنىك بەرۋدى تالاپ ەتەتىن بولامىز. قازىر كلۋبتى كىم باسقارىپ جاتقانى بەلگىسىز, سپورت باسقارماسىمەن كەلىسپەي كوماندانى جەڭىسكە جەتكىزگەن باپكەر اۋىستىرىلعان. بىزدە كلۋبقا قويار سۇراقتار كوپ. سوندىقتان قۇرمەتتى جانكۇيەرلەر, بۇل ماسەلەنى وزدەرىڭىز شەشىپ كورىڭىزدەر, ەگەر مەن كىرىسەتىن بولسام, بۇل وقيعا باسقاشا اياقتالادى. ەلىمىزدىڭ بىرنەشە كلۋبىنىڭ بۇرىنعى جەتەكشىلەرى قازىر باسقا جەردە وتىر. «التاي» كلۋبىمەن سولاي بولعانىن قالامايمىن. وسى سەبەپتى فۋتبولدى جاقسى كورىپ قانا قويماي, قىزمەتكە فۋتبولدى شىنايى جاقسى كورەتىن ادامداردى تارتىڭىزدار», – دەدى دانيال احمەتوۆ.