قازاقستان رەسپۋبليكاسى اۋىل شارۋاشىلىق مينيسترلىگى وسىمدىك شارۋاشىلىعىن ءارتاراپتاندىرۋدى كوزدەپ وتىر. ناقتىراق ايتار بولساق, بيداي ەگىستىگى ازايتىلادى. ونىڭ ورنىنا جاسىمىق ەگىستىگى ۇلعايتىلماق. جاسىمىق ونىمدەرى ءۇندىستان مەن پاكىستانعا ساتىلماق. بۇل تۋرالى بۇگىن استانادا وتكەن ءباسپاسوز كونفەرەنتسياسىندا ۆەدومستۆا باسشىسىنىڭ ورىنباسارى قايرات ايتۋعانوۆ مالىمدەدى.
«بيىلعى ماركەتينگتىك جىلدا, ياعني 2016 جىلدىڭ 1 شىلدەسى مەن 2017 جىلدىڭ 1 شىلدەسى ارالىعىندا 9 ملن توننا استىق الامىز دەگەن جوسپار بار. الايدا, اۋا رايىنا بايلانىستى بۇل كورسەتكىش ازداپ وزگەرۋى مۇمكىن. بىراق ءبىزدىڭ ەكسپورتىمىز ءۇشىن جاڭا مۇمكىندىكتەر اشىلادى. الداعى بەس جىلعا ارنالعان اۋىل شارۋاشىلىعىن دامىتۋ باعدارالاماسى بويىنشا بيداي ەگىستىگى القابى 2 ملن 300 مىڭ گەكتارعا ازايتىلادى. ال 2011-2016 جىلدار ارالىعىندا ەلدەگى 2 ملن ەگىستىك گەكتارى قىسقارتىلعان. دەگەنمەن, بۇل جالپى ەگىستىك شىعىمىنا اسەر ەتپەدى", - دەدى ايتۋعانوۆ.
ۆيتسە-ءمينيستردىڭ ايتۋىنشا, قازىرگى تاڭدا مايلى داقىلداردىڭ ءونىمىن ەكسپورتتاۋ باستى نازاردا. سونىمەن قاتار قازاقستاندىق شارۋالار قازىر جاسىمىق (تۇرىك بۇرشاعى) وسىرۋگە دە دەن قويعان.
«بيىل نۇت بۇرشاعىنىڭ ەگىستىگىن كوبەيتەمىز. وعان سەبەپ الەم بويىنشا وسى ونىمدەرگە دەگەن سۇرانىستىڭ جوعارىلىعى. بيىل ءبىزدىڭ جورامال بويىنشا, 200 مىڭ گەكتاردان جاسىمىق ورۋىمىز كەرەك. بۇل بىزگە الەم بويىنشا ەگىستىك كولەمىنەن 5-ءشى ورىن الۋعا مۇمكىندىك بەرەدى. ال ەكسپورتتاساق, جاسىمىق ەكسپورتىنان الەمدە ءتورتىنشى ورىنعا شىعامىز. قازىرگى تاڭدا بۇل سالادا كانادا ءبىرىنشى ورىندا. الەمدىك نارىقتىڭ 60 پايىزى وسى كاناداعا تيەسىلى. ولاردىڭ نەگىزگى تۇتىنۋشىلارىنىڭ قاتارىندا ءۇندىستان مەن پاكىستان بار. قازاقستاننىڭ گەوگرافيالىق ورنالاسۋىن ەسكەرسەك, ءبىز بۇل تۇرعىدا كانادادان وزىپ كەتە الامىز. سونىمەن قاتار تاياۋ شىعىس ەلدەرى دە ءبىزدىڭ تۇتىنۋشى بولار ەدى. بۇل ءداستۇرلى بيداي شارۋاشىلىعىنا قاراعاندا پايدالى", - دەيدى مينيستر ورىنباسارى.
ق.ايتۋعانوۆ قازىرگى تاڭدا اگرارلىق سالا بويىنشا حالىقارالىق نارىقتاردا باسەكەگە قابىلەتتى بولۋ ءۇشىن قاجەتتى ينفراقۇرىلىمدار ارقىلى ونىمدەردىڭ قايتا وڭدەلۋى دەڭگەيىن كوتەرۋ ۇدەرىسىنىڭ ىسكە اسىرىلىپ جاتقانىن جەتكىزدى.
«بۇل ءۇشىن بىلتىردان بەرى ماقساتتى تۇردە جۇيەلى جۇمىستار جۇرگىزىلۋدە. مىسالى, 15 مىڭ جقش-عا قىزمەت كورسەتەتىن 157 كووپەراتيۆ قۇرىلىپ ۇلگەردى. ولاردىڭ كەشەنىندە جۇزدەن اسا ءسۇت قابىلداۋ پۋنكتى جانە جەتى مىڭداي وتباسىلىق مال بورداقىلاۋ الاڭدارى ۇيىمداستىرىلدى. اعىمداعى جىلى كووپەراتيۆتەر سانى ەكى ەسەلەنەدى. الداعى بەس جىلدا جارتى ميلليونعا جۋىق جقش مەن شاعىن شارۋاشىلىق كووپەراتيۆتەر قىزمەتىمەن قامتىلادى», – دەپ اتاپ ءوتتى ق.ايتۋعانوۆ.
ونىڭ ايتۋىنشا, بيىل 1 اقپانىنان بەرى ەلىمىزدىڭ بارلىق ايماقتارىنداعى اۋىل تۇرعىندارىنا وسىناۋ اۋىل شارۋاشىلىعى كووپەراتيۆتەرىن قۇرۋ جانە كووپەراتسيالاردى مەملەكەتتىك قولداۋدىڭ جاڭا مەحانيزمدەرى بويىنشا ءتۇسىندىرۋ جۇمىستارى جۇرگىزىلۋدە. بۇل ءۇشىن مينيسترلىك تاراپىنان اشم قىزمەتكەرلەرى مەن عىلىمي ۇيىمدار وكىلدەرىنەن قۇرىلعان ساراپشىلار توبى قۇرىلدى.
مۇنداعى باستى مىندەت – ءاربىر اۋىل ازاماتىن اۋىل شارۋاشىلىعى كووپەراتسيالارى نەگىزدەرى بويىنشا اقپاراتتاندىرىپ, بىرىگىپ شارۋاشىلىق جۇرگىزۋگە جانە ناقتى ىسكە جۇمىلۋىنا ىنتالاندىرۋ.
بۇدان بولەك, اقپاراتتىق-كونسۋلتاتيۆتىك تۇرعىدا Fermers.kz سايتى مەن 8800 080 8010 call-ورتالىعى (بارلىق باعىتتاردان قوڭىراۋ شالۋ تەگىن) قىزمەت كورسەتۋدە.
تاعى ءبىر اتاپ وتەرلىك جايت, وندىرىستىك ماقساتتاعى اگرارلىق عىلىمعا ينۆەستيتسيا كولەمىن ارتتىرۋعا باسا ءمان بەرىلۋدە. ياعني, عىلىمي زەرتتەۋلەردى قارجىلاندىرۋ ۇدەرىسى اگرارلىق قۇرىلىمداردىڭ سۇرانىسىنا ورايلاستىرىلادى. بيۋدجەت تاراپىنان قارجىلاندىرۋدىڭ باستى شارتى – بيزنەستىك ورتادان قارجىلاندىرۋ.