جىل وتكەن سايىن قازاقستانداعى «نۇرتاۋ» گولف-كلۋبىنىڭ تۇكتى كىلەم سەكىلدى جاسىل الاڭى الەمنىڭ ايتۋلى گولفشىلارى اراسىندا تانىمال بولىپ كەلەدى. بيىل جەتىنشى رەت ۇيىمداستىرىلعان European Challenge Tour اياسىندا, كاسىپقويلاردىڭ Kazakhstan Open حالىقارالىق تۋرنيرىنە 25 مەملەكەتتەن 130 سپورتشى قاتىسۋدا.
جۇلدەسى دە اسا قوماقتى, ادامنىڭ شارشاعان ءجۇيكەسىن تىنىقتىراتىن, سابىرلى دا ساليقالى سپورت ءتۋرنيرىن تۇراقتى تاماشالاپ ءجۇرىپ, سوڭعى جىلدارى بۇل جارىسقا قاتىساتىن ەلدەردىڭ دە, اقسۇيەكتەردىڭ ويىنىنا ابدەن ماشىقتانعان ايتۋلى ويىنشىلاردىڭ دا ارتىپ كەلە جاتقانىن بايقايمىز.
سونىمەن, ءبىر كەزدەرى ەلباسى نۇرسۇلتان نازارباەۆتىڭ باستاماسىمەن قولعا الىنعان حالىقارالىق Kazakhstan Open ءتۋرنيرى 7 قىركۇيەك, ءسارسەنبى كۇنى سالتاناتتى تۇردە تۇساۋىن كەستى. الەمنىڭ ەڭ مىقتى دەگەن سپورتشىلارى بۇل تۋرنيرگە ىجداھاتپەن قاتىساتىنىن ايتا كەتكەن ءجون. ءويتكەنى, ءدال وسى ويىندار العاشقى ۇزدىك جيىرمالىققا ەنگەن گولفشىلارعا ەۋروپا تورىندە وتەتىن جوعارى ليگاداعى European Tour جارىسىنا جولداما بەرەدى. قىسقاسى, قازاقستانداعى تۋرنير ماۋسىمدىق ويىنداردى اشىپ بەرەتىن ۇلكەن سپورتتىق جارىسقا اينالىپ كەلە جاتقانىن وسى سپورت ءتۇرىن تۇراقتى قاداعالايتىن قاۋىم جاقسى بىلەدى.
الەمنىڭ «مەن» دەگەن گولف ويىنشىلارىن الماتىدا توعىستىرعان ءتۋرنيردى قازاقستان گولف فەدەراتسياسىنىڭ پرەزيدەنتى نۇرتاي ابىقاەۆ اشىپ, قۇتتىقتاۋ ءسوز سويلەدى. ول وتكەن جىلداردىڭ بەدەرىندە بۇل تۋرنير European Challenge Tour اياسىنداعى ەڭ جەتەكشى جارىسقا اينالىپ, الەمنىڭ گولف جۇلدىزدارىن ءوسىرۋدىڭ وزىندىك ۇستاحاناسىنا اينالىپ كەلە جاتقاندىعىن اتاپ ءوتتى. ەلىمىز گولف فەدەراتسياسىنىڭ جەتەكشىسى وسى ۋاقىتقا دەيىن ءتۋرنيردىڭ چەمپيوندارى اتانعان يرلانديا, ۋەلس, شۆەتسيا, ۇلىبريتانيا, يتاليا جانە يسپانيا سپورتشىلارىن ەسكە سالدى.
ماسەلەن, وتكەن جىلى «جايلاۋ» گولف كۋرورتىندا جالاۋىن كوتەرگەن بۇل تۋرنيرگە بىلتىر الەمنىڭ 24 ەلىنەن 132 سپورتشى قاتىسقانى ەسىمىزدە. وندا ءبىرىنشى ورىندى 267 سوققىمەن يسپاندىق البەرتو ۆەلاسكو جەڭىپ الىپ, بۇل جۇلدەسى وعان چەلەندج تۋر رەيتينگىندە كوش باستاۋعا مۇمكىندىك بەرگەن بولاتىن.
وسى كۇندەرى «نۇرتاۋ» گولف-كلۋبىندا جارىس قىزۋ ءجۇرىپ جاتىر. سىرتتاي تاماشالاعان جاندارعا سپورتشىلار اسا سابىرلى, بايىپپەن ويىن ءوتكىزىپ جاتقانداي كورىنگەنىمەن, ولاردىڭ شيرىعۋلى ەكەنىن دە اڭعارۋ قيىن ەمەس. ال ۇزدىك ويىنشىنىڭ ەسىمى ەرتەڭ, جەكسەنبى كۇنى بەلگىلى بولادى.
ال تۋرنير اياسىندا وتكەن ءباسپاسوز ءماسليحاتى كەزىندە تۋريزم جانە سپورت ءمينيسترىنىڭ ورىنباسارى مۇرات وماروۆ گولف ويىنى ەلىمىزدە قۇلاشىن جايىپ كەلە جاتقانىن جانە ويىنشىلاردىڭ شەبەرلىگى دا ارتقانىن اتاپ ءوتتى. ۆيتسە-مينيستر ءبىزدىڭ كاسىپقوي گولفشىلارىمىز 2016 جىلى وتەتىن وليمپيا ويىندارىنا قاتىسا الماسا دا, 2020 جىلعى دودادا باق سىناپ قالۋى عاجاپ ەمەستىگىن كولدەنەڭ تارتتى.
جۋرناليستەرمەن وتكەن كەزدەسۋ بارىسىندا European Challenge Tour ديرەكتورى الان لە سوۋلترە ادەتتەگىدەي «نۇرتاۋ» گولف الاڭدارىنىڭ باپتالۋى حالىقارالىق دەڭگەيدە ەكەنىن مالىمدەپ, قازاقستان بۇل حالىقارالىق تۋرنيرگە ۇنەمى ۇلكەن دايىندىقپەن كەلەتىنىن جەتكىزدى. ونىڭ ويىنشا, شەتەلدىك كاسىپقوي سپورتشىلار بۇل تۋرنيرگە قۋانا-قۋانا كەلىسىم بەرەدى. الاتاۋدىڭ اسەم باۋرايى, قازاقتىڭ ەرەك قوناقجايلىعى تۋرنير بارىسىندا تاماشا احۋال قالىپتاستىرا الادى, دەيدى لاۋازىمدى مەيمان. الان لە سوۋلترە ەلىمىزدەگى گولف الاڭدارىندا بالالاردىڭ دا كوپتەپ گولف تاياعىن ارقالاپ جۇرەتىنى – بەكزات سپورت ءتۇرىنىڭ ءبىزدىڭ ەلىمىزدە كەلەشەگى مىقتى بولا الاتىنىنا العىشارت ەكەنىن اتاپ كورسەتتى.
ال حالىقارالىق تۋرنير بارىسىنا كەلسەك, Kazakhstan Open-2011 ويىندارىندا European Challenge Tour رەيتينگىنىڭ العاشقى ۇشتىگىنە كىرەتىن كىل مىقتىلار ءجۇر. ولار – پورتۋگاليالىق ريككاردو سانتوس, فرانتسۋز بەندجامين حەبەرت جانە اعىلشىن ازاماتى دەنيەل دەنيسون. سول سياقتى بۇرىن رەسەيدىڭ مىقتى تەننيسشىسى بولعان, قازىر گولفتا كەلەشەگى كۇشتى دەپ ەسەپتەلەتىن ەۆگەني كافەلنيكوۆتىڭ ويىنىن كورۋگە قۇمارلار دا جەتكىلىكتى.
قالاي دەسەك تە, كاسىپقوي گولفشىلاردىڭ قازاقستاندىق ءتۋرنيرى ءالى تالاي جاننىڭ جۇلدىزىن جاعاتىن بولادى. ال وتكەن جىلى باس جۇلدەنى جەڭىپ الىپ, قوماقتى قاراجاتتى قالتاسىنا باسقان البەرتو ۆەلاسكونىڭ باعىن بيىل كىم قايتالايدى ەكەن؟
ايناش ەسالي, الماتى. سۋرەتتەردى تۇسىرگەن بەرسىنبەك سارسەنوۆ.