«ماڭگىلىك ەل» قاقپاسىندا شولۋ الاڭى مەن كورمە گالەرەياسى اشىلادى. پانورامالىق دۇربىمەن جابدىقتالعان شولۋ اۋماعى مونۋمەنتتىڭ ۇستىندە 21,5 مەتر بيىكتىكتە جاسالادى. شولۋ الاڭى 2017 جىلدىڭ مامىر ايىنان باستاپ ەسىگىن ايقارا اشادى, دەپ حابارلايدى قالالىق اكىمدىكتىڭ ءباسپاسوز قىزمەتى.
ەرەكشە قاجەتتىلىكتەرى بار ەكسكۋرسانتتار ءۇشىن مونۋمەنتتىڭ ىشىندە ليفت بار, بىراق كەلۋشىلەردىڭ باسىم بولىگى شولۋ الاڭىنا قالانىڭ قالىپتاسۋى مەن تاريحى تۋرالى ايتىپ بەرەتىن كاسىپقوي گيدتارمەن بىرگە باسپالداقپەن كوتەرىلەدى. سونىمەن قاتار, قالاعا كورىك بەرەتىن جاڭا ورىن «ماڭگىلىك ەل» قاقپاسىنىڭ تۇجىرىمداماسىن اشاتىن قازاقستان تاريحى تۋرالى جۇمىستاردى جانە تاقىرىپتىق روليكتەردى ترانسلياتسيالاۋ ءۇشىن مۋلتيمەديالىق قۇرالدارمەن جابدىقتالادى.
شولۋ الاڭىنا باراتىن جولدا ورنالاسقان كورمە زالىنىڭ اۋدانى - 120 شارشى مەتر. گالەرەيا شەتەلدىك جانە قازاقستاندىق سۋرەتشىلەردىڭ, قولونەرشىلەردىڭ جانە ساندىك-قولدانبالى ونەر شەبەرلەرىنىڭ ونەر تۋىندىلارىنىڭ ەكسپوزيتسياسى ءۇشىن قولدانىلماق, سونداي-اق, مۇندا فوتوكورمەلەر وتكىزىلەدى.
ەستەرىڭىزگە سالا كەتسەك, «ماڭگىلىك ەل» اركاسى قر پرەزيدەنتىنىڭ باستاماسىمەن 2011 جىلدىڭ 16 جەلتوقسانىندا قازاقستان رەسپۋبليكاسىنىڭ تاۋەلسىزدىگىنىڭ 20 جىلدىعىنا وراي اشىلعان بولاتىن.