قر قر اقپارات جانە كوممۋنيكاتسيالار مينيسترلىگىنىڭ كەڭەيتىلگەن القا ماجىلىسىندە ۆەدومتسۆو باسشىسى داۋرەن اباەۆ وتاندىق تەلەارنالارعا كورەرمەننىڭ نە سەبەپتى كوڭىلى تولمايتىنىن ايتتى.
«ءبىز جۇرگىزگەن الەۋمەتتىك ساۋالناماعا سايكەس جارنامانىڭ كوپتىگى, وڭىرلىك كونتەنتتىڭ بولماۋى, قازاقستان تۋرالى تانىمدىق باعدارلامالاردىڭ جەتكىلىكسىزدىگى جانە قازاقستاندىق تەلەۆيدەنيەدەگى جۋرناليستەردىڭ كاسىبيلىگىنىڭ تومەندىگى حالىقتىڭ كوڭىل تولماۋشىعىن تۋىنداتادى. ءبىزدىڭ تەلەارنالار مۇنى بارىنشا بايىپپەن وي ەلەگىنەن وتكىزىپ, كورمەرمەننىڭ سەنىمىنە يە بولۋى ءۇشىن قاجەتتى شارالاردى قابىلداۋى ءتيىس. وسى ورايدا تەلەۆيدەنيە مەن راديونى دامىتۋ بويىنشا جۇمىستاردىڭ كەلەسى باسىمدىقتارىنا توقتالعىم كەلەدى», - دەدى اباەۆ.
بۇل رەتتە مينيستر ەڭ الدىمەن وتاندىق سەريالداردىڭ شەتەلدىك سەريالدارمەن سالىستىرعاندا باسەكەگە قابىلەتتىلىگىن ارتتىرۋ قاجەتتىگىن اتاپ ءوتتى. «2017 جىلى كورسەتىلەتىن سەريال ونىمدەردىڭ كوممەرتسيالىق تەلەارنالاردا دا سانىن ارتتىرۋ جوسپارلانۋدا. سەريالدار نەگىزىندە كينوپروكات قىزمەتىن جۇزەگە اسىرۋ ءۇشىن تولىقمەتراجدى كينوتاسپالار جاسالاتىن بولادى. ەكىنشىدەن, كرى جۇيەسىن ەنگىزۋ ارقىلى تەلەراديو ارنا قىزمەتكەرلەرىنىڭ بىلىكتىلىگى مەن كاسىبيلىگى جەتىلە تۇسەدى. قىزمەتكەرلەردى كونكۋرستىق ىرىكتەۋ جەتىلدىرىلىپ, كادرلىق رەزەرۆ قالىپتاستىرىلادى», - دەدى ول.
«ءبىز ەلدىڭ شەكارالىق ايماقتارىندا مەملەكەتتىك راديوارنالاردىڭ قامتۋ ايماعىن جانە تاراتۋ ساپاسىن ارتتىراتىن بولامىز", دەگەن مينيستر تەلەارنالاردى HD فورماتىنا كوشىرۋ جۇمىستارى جالعاسا بەرەتىنىن ايتتى. ونىڭ ايتۋىنشا, تەك سودان كەيىن عانا ءبىز جەتەكشى الەمدىك رەسۋرستارمەن شىنايى باسەكەلەس بولا الامىز.
"ااعىمداعى جىلى ساندىق ەفيرلىك تەلەتاراتۋدى ەنگىزۋ اياسىندا 244 راديوتەلەۆيزيالىق ستانتسيا سالىنىپ, پايدالانۋعا بەرىلەدى. جىلدىڭ سوڭىنا دەيىن قازاقستاننىڭ بىرقاتار وبلىستارىندا ساندىق تاراتۋعا تولىقتاي كوشۋ جوسپارلانۋدا. اقپارات كوميتەتى باق سالاسىنداعى مەملەكەتتىك ساياسات دەپارتامەنتىمەن بىرلەسىپ, بارلىق وسى شارالاردىڭ ساپالى ورىندالۋىنا باقىلاۋ جۇرگىزۋى ءتيىس", - دەدى اباەۆ.