وڭتۇستىك قازاقستان وبلىستىق ءتىس ەمدەۋ ەمحاناسى حالىققا تاۋلىك بويى قىزمەت ەتۋگە كوشتى, دەپ حابارلادى وقو اكىمدىگىنىڭ ءباسپاسوز قىزمەتى.
دەنساۋلىق ساقتاۋ باسقارماسىنىڭ باسشىسى م.ەگىزباەۆتىڭ بۇيرىعىمەن ازاماتتاردىڭ تۇنگى ۋاقىتتا دا ەم قابىلداۋى ءۇشىن وسىنداي قولايلى جاعداي جاسالدى. ەندى تاۋلىكتىڭ كەز كەلگەن ۋاقىتىندا وبلىس تۇرعىندارى تاڭنىن اتىسىن كۇتپەي-اق دارىگەردىڭ كومەگىنە جۇگىنە الادى.
«ءبىزدىڭ ەمحانادا 195 ادام جۇمىس ىستەيدى. ونىڭ 68-ءى دارىگەر-ستاماتولوگ, 66 مەدبيكە. بۇگىندە وبلىس اكىمى جانسەيىت تۇيمەباەۆتىڭ تاپسىرماسى بويىنشا حالىققا تاۋلىك بويى قىزمەت ەتۋ ماقساتىندا 4 بريگادا – 4 دارىگەر, 4 مەدبيكە جانە 4 سانيتار تۇنگى مەزگىلدە ناۋقاستاردى قابىلداۋدا. بۇل ەلىمىزدە العاش قولعا الىنعان شارا. بۇعان دەيىن بىزدە جىلىنا 200 مىڭعا جۋىق ادام تەگىن ەم الىپ كەلگەن. ال, كۇنىنە 400-دەن استام ادام ەم قابىلدايدى. ەندى تاۋلىك بويى جۇمىس ىستەگەن سوڭ ەمحاناعا قارالۋعا كەلەتىندەردىڭ سانى بۇدان دا ارتاتىنى انىق», – دەيدى وبلىستىق ءتىس ەمدەۋ ەمحاناسىنىڭ باس دارىگەرى ەرعالي ورمانوۆ.
اقپان ايى باستالعالى, مۇندا 7 كۇندە تۇنگى مەزگىلدە 24 ادام تىستەرىن ەمدەتكەن. اۋدان-اۋىلداردان كەلگەندەر دە بار. دەگەنمەن, ولاردىڭ 17-سىندە ءتىس سىرقاتىنىڭ اسقىنۋ بەلگىلەرى انىقتالعانىن تىلگە تيەك ەتكەن ەرعالي كەرىمبەك ۇلى وبلىس تۇرعىندارىن جىلىنا ەكى رەت مەديتسينالىق تەكسەرۋلەردەن ءوتىپ تۇرۋعا شاقىردى.
شىمكەنت قالالىق مەديتسينالىق جەدەل جاردەم ستانتسياسى 2016 جىلعى مالىمەتى بويىنشا تۇنگى ۋاقىتتا جاردەم سۇراعان ناۋقاستاردىڭ 277-ءى پۋلپيت اۋرۋىمەن سىرقاتتانعاندار, تەكسەرۋدەن كەيىن 217 ناۋقاس ۇيىندە قالدىرىلعان, 60 ناۋقاس ستاتسيونارعا الىپ كەلىنگەن.
بۇل باس جوسپارعا ساي اۋماعى ۇلعايىپ, تۇرعىندارىنىڭ سانى ارتقان, قالا قوناقتارىن قوسا العاندا 1 ميلليوننان استام ادامعا تاۋلىك بويى قىزمەت كورسەتەتىن ءتىس ەمحانانىڭ قاجەتتىلىگىن اڭعارتادى.
ايتا كەتەيىك, قازاقستان رەسپۋبليكاسى ۇكىمەتىنىڭ 2014 جىلعى 27 قاڭتارداعى №29 ساندى «تەگىن مەديتسينالىق كومەكتىڭ كەپىلدىك بەرىلگەن كولەمىنىڭ تىزبەسىن بەكىتۋ تۋرالى» قازاقستان رەسپۋبليكاسى ۇكىمەتىنىڭ 2009 جىلعى 15 جەلتوقسانداعى №2136 قاۋلىسىنا وزگەرىس ەنگىزۋ تۋرالى» قاۋلىسىنا ساي 14 جاسقا دەيىنگى بالالار, 18 جاسقا دەيىنگى جاسوسپىرىمدەر, جۇكتى ايەلدەر, حالىقتىڭ الەۋمەتتىك قورعالماعان توپتارىنا ستوماتولوگيالىق كومەك قاتتى اۋرعان جاعدايدا (وسترايا بول) تەگىن كورسەتىلەدى.