2016 جىلى زورلىق-زومبىلىق پەن سۋيتسيد يدەيالارىن ناسيحاتتاۋ بەلگىلەرى بار قۇقىققا قايشى 110 مىڭنان استام ماتەريال جويىلدى. بۇل تۋرالى بۇگىن قر اقپارات جانە كوممۋنيكاتسيالار مينيسترلىگىنىڭ كەڭەيتىلگەن القا ماجىلىسىندە ۆەدومستۆو باسشىسى داۋرەن اباەۆ ءمالىم ەتتى, دەپ حابارلايدى قازاقپارات.
«مينيسترلىك زاڭناما تالاپتارىنىڭ ساقتالۋىن قاداعالاۋ ءۇشىن اقپاراتتىق الاڭعا مونيتورينگتى تۇراقتى نەگىزدە جۇرگىزەدى جانە بۇل سوڭعى ۋاقىتتا بارىنشا وزەكتى بولا ءتۇستى. قۇقىققا قايشى كونتەنت كولەمى بۇرىن-سوڭدى بولىپ كورمەگەن اۋقىمعا يە بولدى. بۇل رەتتە ءبىزدىڭ ازاماتتارعا, اسىرەسە, جاسوسپىرىمدەر مەن بالالارعا دەسترۋكتيۆتى ىقپالدى ەسكەرمەسە بولمايدى. مۇنى وزدەرىڭىز دە جاقسى بىلەسىزدەر», - دەدى مينيستر.
ونىڭ ايتۋىنشا, اقپارات جانە كوممۋنيكاتسيالار مينيسترلىگى قۇقىققا قايشى كونتەنتتەرمەن كۇرەستە شەتەلدىك جەتەكشى الەۋمەتتىك جەلىلەرىمەن جانە ىزدەۋ قىزمەتتەرىمەن تىعىز ىنتىماقتاستىقتى جولعا قويعان.
«بۇل جۇمىستار جالعاساتىن بولادى. اتالعان جۇمىستا ماسەلەلەردى ەسكەرتۋ تارتىبىمەن شەشۋگە باسىمدىق بەرىلگەن», - دەدى ول.
ءمينيستردىڭ سوزىنە قاراعاندا, وتكەن جىلى 150 مىڭنان استام اقپاراتتىق ماتەريالعا قاتىستى 500 ەسكەرتۋ حاتى جولدانعان.
«ناتيجەسىندە مەنشىك يەلەلەرى تەرروريزم مەن ءدىني ەكسترەميزم, زورلىق-زومبىلىق پەن سۋيتسيد يدەيالارىن ناسيحاتتاۋ بەلگىلەرى بار قۇقىققا قايشى 110 مىڭنان استام ماتەريالدى جويدى. مۇنان بولەك, 31 مىڭنان استام اقپاراتتىق ماتەريالعا قاتىستى ۇيعارىم شىعارىلدى. ونىڭ 26 مىڭنان استامى زورلىق-زومبىلىق پەن ءسۋيتسيدتى ناسيحاتتاۋ مازمۇنىندا بولعان. سوت ورگاندارىنا 164 سىلتەمە مەن ينتەرنەت رەسۋرسقا قاتىستى 17 تالاپ-ارىز بەرىلىپ, سايكەسىنشە شەشىم قابىلداندى», - دەدى اباەۆ.