شىمكەنتتە تۇڭعىش رەت ءىرى كولەمدە ەت جانە ەت ونىمدەرىن وندىرەتىن كومبينات اشىلدى. ول كۇنىنە 3000 قوي جانە 300 ءىرى قارا مال ەتىن وڭدەۋگە قاۋقارلى, دەپ حابارلايدى «قازاقپارات».
تاماق ونەركاسىبىن وركەندەتۋگە مۇددەلى «يۋكو-ەكو-فۋد-تىڭ» اشىلۋ سالتاناتىنا يراننان كەلگەن سەرىكتەستەر دە قاتىستى. ەندى وڭىردەگى شۇيگىن, ءارى ەكولوگيالىق تازا ەت مۇسىلمان ەلدەرىنە دە ەكسپورتتالادى. وبلىس اكىمى جانسەيىت تۇيمەباەۆ پەن يران يسلام رەسپۋبليكاسىنىڭ اۋىل شارۋاشىلىعى ءمينيسترى جاڭادان اشىلعان ەت كومبيناتىندا باس قوستى. ماقسات – ەكى تاراپ بىرلەسىپ اشقان «يۋكو-ەكو-FOOD» جشس-مەن تانىسىپ, ارى قارايعى ەكسپورتتىق الەۋەتىن تالقىلاۋ بولدى. نىسان جاڭا زامان تالاپتارىنا ساي جابدىقتالعان. يران يسلام مەملەكەتىنىڭ ەتكە قاجەتتىلىگى – جىلىنا 2 ملن 400 توننا. ارينە, وسىنشا كولەمدەگى ءونىمدى ءبىر ءوڭىردىڭ ءوندىرىس ورنى قاناعاتتاندىرۋى مۇمكىن ەمەس. دەگەنمەن, وسىنىڭ ءبىر بولىگىن وسى كومبينات دايىنداپ جەتكىزسە دە ەل ەكونوميكاسىنا سەرپىن بولماق.
ايتا كەتەيىك, بۇرىن كومبيناتتىڭ ورنىندا 500-گە تارتا مال باسىن بورداقىلاپ سوياتىن بازا بولعان. «قايىپ اتا» دەگەن اتاۋمەن تانىلعان سەرىكتەستىك – ەندى ەكى ەلدىڭ بىرلەسكەن كاسىپورنى سانالادى. مامانداردىڭ سوزىنشە, مۇندا سويىلعان ەت – ەكولوگيالىق تازا. باعاسى دا قولجەتىمدى. زاۋىت تولىق قۋاتىنا ەنگەندە 150 جەرگىلىكتى ازامات جۇمىسپەن قامتىلادى. بۇل ءوز كەزەگىندە وڭتۇستىكقازاقستاندىقتاردىڭ ەڭبەك نارىعىنداعى بەلسەندىلىگىن ارتتىرا تۇسپەك.