سپورت جۋرناليستيكاسىن قازاقتىڭ قابىرعالى قالامگەرى سەيداحمەت بەردىقۇلوۆقا دەيىن دە جازعاندار بولعان, قازىر دە سەيداعاڭ ايتاتىنداي قوسارعا قوس ات الىپ وندىرە جازىپ جۇرگەندەر از ەمەس.
سەيداعاڭنىڭ الدىڭعى بۋىننان ءوزگەشەلىگى – ەت پەن تەرىنىڭ اراسىنداعى جەلىكتەي, قىزىقتى تاقىرىپ كەزدەسكەندە عانا جازىپ تاستاعان جوق. سپورت ناقتىلىقتى سۇيەدى دەپ تەحنيكالىق ناتيجەلەرگە ءسۇيەنىپ قارادۇرسىندەۋ جازىلىپ كەلگەن قالىپتى بۇزىپ, ەل كوز جۇگىرتىپ قانا وتەتىن وقيعالاردى كوركەم ادەبيەت بيىگىنە كوتەرگەندىگى. ءبىر دەممەن وقىلاتىندىعى. وقيعانىڭ ىشىنە ءوزىڭدى دە سۇڭگىتىپ الىپ, جانىڭدى جادىراتاتىندىعى. دۇنيەنىڭ تورتكۇل بۇرىشىنا جولى تۇسكەن دە ءوزى. جەڭىل اتلەتتەر تىزىمىنەن قازاق جاستارىن ىزدەپ تۇرعاندا “جارقىنىم, كىمدى ىزدەپ تۇرعانىڭىزدى سەزىپ تۇرمىن. ولاردى كەلەسى بەسجىلدىقتا دا تاپپايسىز-اۋ دەپ قاۋىپتەنەمىن”, دەپ ايارلىقپەن جىميعان جاتتىقتىرۋشىنىڭ قاراۋ نيەتىنە قانىڭىز قارايسا, وعان قايتارعان جاۋابىنا ايىزىڭىز قانىپ مارحاباتتانىپ قالاسىز. جاقسىلىق ۇشكەمپىروۆپەن ارالاستىعىمىز بار. ماسكەۋ وليمپياداسىنىڭ چەمپيونى بولعاندا “شىركىن-اي, مەنىڭ ورنىمدا قازاقتىڭ نار تۇلعالى جىگىتى بولعاندا, دۇنيە ءجۇزى قازاقتار وسىنداي حالىق ەكەن دەپ سۇيسىنەر ەدى عوي”, دەپ كەلەتىن جۇرەكجاردى ءسوزى ءوزىمىزدىڭ دە قانىمىزدى تۋلاتقان. جاقسىلىق اعامىز: “ايتتىم با, ايتپادىم با, ءاي, ايتسام ايتقان-اق شىعارمىن ەسىم شىعىپ تۇرىپ”, دەيدى. ايتتى-ايتپادى ەسەپ ەمەس. سەيداحمەت بەردىقۇلوۆتىڭ اتالعان وقيعا ارقىلى ميلليونداعان جۇرتتىڭ رۋحىن كوتەرىپ, ۇلتىن جانىنداي سۇيۋىنە ىقپال ەتكەندىگى عوي.
سپورت جۋرناليستيكاسىن قارادۇرسىن قالپىنان كوركەم ادەبيەت بيىگىنە كوتەرگەن, ءوز الدىنا جانر بولىپ قالىپتاسۋىنا ولشەۋسىز ەڭبەك سىڭىرگەن سەيداحمەت بەردىقۇلوۆتى ەسكە تۇسىرۋگە ارنالعان جۋرناليستەر اراسىنداعى سپارتاكيادا بيىل ءبىرىنشى رەت وڭتۇستىك قازاقستان وبلىسىندا جالاۋىن كوتەردى. سپارتاكيادا ۇستەل تەننيسى, دويبى, شاحمات, ۆولەيبول جانە شاعىن فۋتبولدان ءوتتى. وبلىس اكىمدىگى مەن وبلىستىق سپورت جانە تۋريزم باسقارماسى جۋرناليستەر جارىسىنىڭ ويداعىداي وتۋىنە بارىنشا جاعداي جاسادى. سپارتاكياداعا 8 وبلىستىڭ جۋرناليستەرى قاتىستى. ەكى كۇنگە سوزىلعان باسەكەدە كوماندالىق ءبىرىنشى ورىن مەن كۋبوكتى الماتى وبلىسىنىڭ جۋرناليستەرى جەڭىپ الدى.
وڭتۇستىكتە اتاقتى اتىمتاي جومارتتىڭ ىنىلەرى, ساقى جىگىتتەر كوپ. قازاقستاننىڭ سپورت جۋرناليستەرى سايىسقا ءتۇسىپ جاتقاندا “كومبي ستروي” جشس-ءنىڭ توراعاسى, وڭتۇستىك قازاقستان وبلىستىق ءماسليحاتىنىڭ دەپۋتاتى نۇرالى ابىشەۆ شەت قالمادى. ول بايگەگە تىككەن جەڭىل ماشينا الماتى وبلىسى جۋرناليستەرىنىڭ تاقىمىندا كەتتى. ەكىنشى, ءۇشىنشى ورىندارعا تيىسىنشە وڭتۇستىك قازاقستان وبلىسى مەن جامبىل وبلىسىنىڭ جۋرناليستەرى يە بولدى.
جارىستىڭ جابىلۋ سالتاناتىندا باس تورەشى – تۋريزم جانە سپورت مينيسترلىگى ۇلتتىق شتاتتىق كوماندالار ءجانە سپورت رەزەرۆى باسشىسىنىڭ ورىنباسارى قازىبەك يمانعالي جارىستى ۇيىمداستىرۋ مەن وتكىزۋگە قوسقان زور ۇلەسى ءۇشىن وڭتۇستىك قازاقستان وبلىسى تۋريزم, دەنەشىنىقتىرۋ جانە سپورت باسقارماسىنىڭ باستىعى بولات قىرىقباەۆ پەن وبلىستىق “وڭتۇستىك قازاقستان” گازەتىنىڭ باس رەداكتورى بەيسەنباي ءتاجىباەۆتى سەيداحمەت بەردىقۇلوۆ اتىنداعى توسبەلگىمەن ماراپاتتادى. الماتى وبلىستىق تۋريزم, دەنەشىنىقتىرۋ جانە سپورت باسقارماسىنىڭ ءبولىم مەڭگەرۋشىسى المات ۇشكەمپىروۆتەن جۋرناليستەر الامانىندا باس بايگەگە قالاي قول جەتكىزگەن سىرىن سۇراعانبىز.
– ءبىز سپارتاكياداعا جان-جاقتى دايىندالدىق, – دەيدى المات ۇشكەمپىروۆ. – الدىمەن وبلىستاعى بارلىق مەملەكەتتىك باق جانە جەكەمەنشىك گازەتتەردىڭ باسىن قوسىپ, جارىس وتكىزدىك. سونىڭ ىشىنەن ۇزدىك شىققانداردى ىرىكتەپ الدىق. راسىن ايتساق, ۇشتىكتى مەجەلەپ كەلگەنبىز. قۇداي جار بولىپ, ءبىرىنشى ورىن الدىق. مۇنى ءوز باسىم, وبلىس جۋرناليستەرىنىڭ تىڭعىلىقتى دايىندىعى مەن اۋىزبىرشىلىگى جەتكىزدى دەپ ويلايمىن.
– سەيداحمەت بەردىقۇلوۆ اعامىز ۇلتىن سۇيگەن ۇلى تۇلعا ەدى, – دەيدى وڭتۇستىك قازاقستان وبلىسى تۋريزم, دەنەشىنىقتىرۋ جانە سپورت باسقارماسىنىڭ باستىعى بولات قىرىقباەۆ. – ۇلتتىڭ نامىسىن جانيتىن قايراعى بولاتىن. ول كىسىنىڭ قالامىنان تۋعان كوركەم دۇنيەلەر وسكەلەڭ ۇرپاقتىڭ رۋحىن كوتەردى, بيىككە تالپىندىردى. ۇلكەن سپورتتا ۇلكەن جەڭىستەرگە جەتكەن سپورتشىلارىمىزدىڭ جەڭىسىندە قازاق بالاسىن وليمپ بيىگىنەن كورگىسى كەلەتىن سەيداحمەت بەردىقۇلوۆ اعامىزدىڭ ۇلكەن ۇلەسى بار دەپ بىلەمىن. بۇل سپارتاكيدانىڭ قازاقستاندا ورنى بولەك.
قازاقستان سپورتىندا تەڭىزدەي تەر توگىپ, ۇلتىمىزدىڭ اتىن اسقاقتاتۋعا ۇلەس قوسىپ جۇرگەن اعەدىل جىگىت وسىلاي دەيدى. جاقسىلار ءبىر-ءبىرىنىڭ باعاسىن ءبىلىپ جۇرسە, بۇ قازاقتىڭ المايتىن اسۋى جوق قوي.
باقتيار تايجان, وڭتۇستىك قازاقستان وبلىسى.