ايماقتىق كوممۋنيكاتسيالار قىزمەتىندە جامبىل وبلىسى ەكونوميكا جانە بيۋدجەتتىك جوسپارلاۋ باسقارماسىنىڭ جەتەكشىسى جومارت ءامىرحانوۆ «الەۋمەتتىك ينفراقۇرىلىمدى دامىتۋ» باعىتى بويىنشا وڭىردەگى «نۇرلى جول» باعدارلاماسىنىڭ جۇزەگە اسىرىلۋى تۋرالى ايتىپ بەردى, دەپ حابارلايدى قازاقپارات.
ونىڭ ايتۋىنشا, 2017 جىلى 2,4 ملرد تەڭگەگە بەس جوبانى جۇزەگە اسىرۋ جوسپارلانىپ وتىر. ولاردىڭ قاتارىنا بايزاق اۋدانى بايزاق اۋىلىنا 300 ورىندىق ورتا مەكتەپ تۇرعىزۋ, مەركى اۋدانى سارىمولداەۆ اۋىلىنداعى ساۆۆا اتىنداعى 600 ورىندىق ورتا مەكتەپكە جاڭا عيمارات سالۋ ەنەدى. تاراز قالاسىنىڭ ءشولدالا تۇرعىن ءۇي الابىنا 900 ورىندىق ورتا مەكتەپ سالىنادى, 300 وقۋشىعا ارنالعان كونەرگەن №24 گيمنازيانىڭ جانە «سالتانات» شاعىناۋدانىنداعى 1000 ورىندىق №30 ورتا مەكتەپتىڭ جاڭا عيماراتتارى سالىنادى.
وتكەن جىلى جامبىل وبلىسىندا «نۇرلى جول» باعدارلاماسىمەن 7 جوبا جۇزەگە استى, وعان بولىنگەن 3,3 ملرد. تەڭگە يگەرىلدى, دەپ حابارلادى ءامىرحانوۆ. «بايزاق اۋدانى تۇيمەكەنت اۋىلىندا جانە تاراز قالاسىنىڭ قۇمشاعىل ستانساسىندا 600 ورىندىق جاڭا مەكتەپتەر پايدالانۋعا بەرىلدى. سونىمەن بىرگە, قورداي اۋدانى ماسانچي اۋىلىندا, سارىسۋ اۋدانىنىڭ جاڭاتاس قالاسىندا جانە وبلىس ورتالىعىندا 840 ورىندىق ءۇش بالاباقشا قولدانۋعا بەرىلدى. مەركى اۋدانى سارىمولداەۆ اۋىلىنداعى جانە تارازداعى №30 ورتا مەكتەپ عيماراتىنىڭ قۇرىلىسى 2017 جىلعا اۋىستىرىلدى», - دەپ اتاپ ءوتتى سپيكەر.