بۇگىنگى كۇنى اقتوبە ايماعىندا قۇرىلىس-مونتاج جۇمىستارى كەڭىنەن قانات جايىپ كەلەدى. بيىل بۇل سالاعا قوسىمشا قارقىن قوسۋ بەلگىلەنگەن. سونىڭ ىشىندە جىل اياعىنا دەيىن بارلىق قارجىلاندىرۋ كوزدەرى ەسەبىنەن جالپى كولەمى 650 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانعان. ونىڭ ءبىرىنشى كەزەگىن تۇرعىن ءۇي قۇرىلىس-جيناق بانكى سالىمشىلارى قاراجاتتارى ەسەبىنەن بوي كوتەرەتىن نەسيەلىك تۇرعىن ۇيلەر كەشەنى قۇرايدى. سونداي-اق, بيىل وڭىردە «جۇمىسپەن قامتۋدىڭ جول كارتاسى-2020» باعدارلاماسىنا سايكەس جالدامالى تۇرعىن ۇيلەر سالۋ ىسىنە دە باسا كوڭىل بولىنگەن. ال كوممەرتسيالىق ماقساتتاعى تۇرعىن ءۇي قۇرىلىستارى بۇل باعىتتاعى ءۇشىنشى كەزەكتى قۇرايدى.
ونىڭ دەنىن بيىلعى جىلدىڭ تامىز ايىنا دەيىن اياقتاۋ ۇيعارىلعان. بۇدان وزگە ءبىلىم بەرۋ, دەنساۋلىق ساقتاۋ جانە مادەنيەت پەن سپورت سالالارى بويىنشا اتقارىلاتىن قۇرىلىس جۇمىستارى دا اۋقىمدى. مۇنىڭ ءبارى ەڭ الدىمەن ساۋلەت ۇلگىلەرىنە جانە الدىن الا جاسالعان قۇرىلىس جوبالارىنا سايكەس كەلۋ كەرەكتىگى تالاس تۋعىزبايدى. جوعارىدا اتالعان قۇرىلىس جۇمىستارىنىڭ باسىم بولىگى وبلىس ورتالىعىنىڭ ۇلەسىنە تيەدى. اقتوبە جىل سايىن ءوسىپ-وركەندەپ, اجارى اتقان تاڭداي اشىلىپ كەلە جاتقان شىرايلى شاھار. بۇگىنگى ماقسات ونىڭ تۇرعىندارىنىڭ سانىن تابيعي جانە ىشكى كوشى-قون ەسەبىنەن ءوسىرۋ بولىپ وتىر. بۇل الەۋمەتتىك-دەموگرافيالىق مىندەتتىڭ ىسكە اسۋىنا قۇرىلىس جۇمىستارىنىڭ دا تيگىزەتىن وڭ اسەرى بار.
بيىلعى جىلدىڭ باسى اقتوبە قالاسىنا ءوزىنىڭ تاعى ءبىر جاقسىلىعىن الا كەلدى. اقتوبە قالاسىنىڭ باس جوسپارى قايتادان جاڭعىرتىلىپ, ۇكىمەت قاۋلىسىمەن بەكىتىلۋى الدىڭعى پىكىرىمىزدىڭ ايعاعى. ەندەشە, رەسپۋبليكانىڭ باتىس وڭىرىندەگى ءىرى دە ىرگەلى قالادا تۇرعىزىلاتىن سان الۋان نىساندار باس جوسپار باستاۋىنان تامىر تارتىپ جاتسا يگى. بۇل رەتتە رەسپۋبليكامىزداعى قالا اكىمدەرىنىڭ قاۋلىسىمەن قۇرىلاتىن ساۋلەت, قالا قۇرىلىسى كەڭەستەرىنىڭ تيگىزەتىن سەپتىگى مەن كومەگى دە كوپ بولماق. راس, «ساۋلەت, قۇرىلىس جانە قالا قۇرىلىسى تۋرالى» زاڭدا مۇنداي سيپاتتاعى كەڭەستەر قۇرۋ قاراستىرىلماعان. ايتسە دە, قالا قۇرىلىسىنا قاتىسى بار ءتۇيىندى ماسەلەلەردى ءوزارا كەڭەسىپ ءارى اقىلداسا وتىرىپ, ءتيىستى ورگاندارعا ۇسىنىس ازىرلەۋ اتالعان كەڭەس قىزمەتىنىڭ باستى پارىزى بولىپ تابىلادى. البەتتە, كەڭەسىپ پىشكەن تون كەلتە بولمايدى ەمەس پە؟!
ايتسە دە, اقتوبە قالاسىندا قالا قۇرىلىسى كەڭەسىنىڭ قىزمەتى ەشقانداي سىن كوتەرمەيدى دەسەك, شىندىقتان الشاق كەتە قويماسپىز. سوڭعى ۋاقىتتا ونىڭ جۇمىسىنا سىلبىرلىق پەن سەلقوستىق, ەنجارلىق جانە بىرسارىندىلىق پەن جاتتاندىلىق ءتان بولىپ جۇرگەنى دە ەشكىمگە قۇپيا ەمەس. اقتوبە قالاسىنىڭ اكىمى ءىلياس يسپانوۆ قالا قۇرىلىسى كەڭەسىنىڭ قۇرامىنا ءبىرىنشى كەزەكتە كانىگى ءارى كاسىبي مامانداردى, ساۋلەتشىلەر مەن جوبالاۋشىلاردى تارتۋعا كوڭىل بولگەندە ءسوز جوق, مۇنداي قۇرامداعى كەڭەس مۇشەلەرى قۇرىلىستىڭ باستى ءارى نەگىزگى تاراپتارى بويىنشا تۇرعىزىلۋىنا وڭ ىقپالىن تيگىزە الاتىنىنا ەشقانداي كۇمان دا بولماس ەدى.
بۇگىندە نە كوپ, ءارتۇرلى باعىتتاعى قۇرىلىس نىساندارىنا تاپسىرىس بەرۋشىلەر كوپ. ءبىز مۇنى ايتقاندا ولاردى كوپسىنىپ وتىرعانىمىز جوق. بۇل ارينە, يگى نىشان. بۇعان قۋانۋىمىز جانە قولداۋىمىز كەرەك. ايتسە دە, ولاردىڭ جاساعان جوبالاۋ-سمەتالىق قۇجاتتارى مەن ساراپتامالارىنىڭ ءبارى بىردەي ءمىنسىز بولىپ كەلە بەرمەيتىنى وكىنىشتى. ەگەر مۇندا نەگىزگى نىسان مەن قوسالقى قۇرىلىستارعا قويىلاتىن تالاپتار ەسكەرىلمەسە, ءسويتىپ وعان سالعىرت قاراۋدىڭ سالدارىنان بۇل قۇجاتتار بەكىتىلىپ كەتە بەرسە ەرتەڭ ونىڭ سوڭى ۇلكەن وكىنىشكە ۇرىندىرماسىنا كىم كەپىل؟ قالا قۇرىلىسى كەڭەسى مۇشەلەرى ۇسىنىس-پىكىرلەرىنىڭ قاجەتتىلىگى مەن وزەكتىلىگى دە وسىندا. اقتوبە قالاسىندا وسىنداي سىندارلى ساتتە كەڭەس قىزمەتىنىڭ قوجىراپ, ءىس-قيمىلدىڭ ناشارلاپ كەتۋىن نەمەن تۇسىندىرۋگە بولادى؟ جاۋاپسىزدىق پا, سالعىرتتىق پا؟ ايتسە دە, كوڭىلگە ءبىر مەدەۋ تۇتارلىق جايت, مۇنى اقتوبە قالاسىنىڭ اكىمى ءىلياس يسپانوۆتىڭ ءوزى دە مويىنداپ وتىر. ەندەشە, ول الداعى ۋاقىتتا كەڭەس قىزمەتىنە جاڭا سەرپىن بەرۋگە ىقپال جاسايتىنىنا سەنگىمىز كەلەدى. قالا قۇرىلىسى كەڭەسى ءوز اتاۋىنان كورىنىپ تۇرعانىنداي, كەڭەسشى ورگان. سوندىقتان دا بىرەۋلەرگە نۇسقاۋ بەرۋ, قيسىق كەتكەندەردى تارتىپكە شاقىرۋ قۇزىرىنا كىرمەيدى. دەگەنمەن, ورتاق ءىس ورايىندا ولاردان ويلى ۇسىنىس-پىكىرلەر ءتۇسىپ جاتسا, ونى ولجا ەمەس دەپ ايتا الار ما ەكەنبىز.
تەمىر قۇسايىن, «ەگەمەن قازاقستان»
اقتوبە