قىسقى ۋنيۆەرسيادانىڭ ءداستۇرى بويىنشا جارىستىڭ ەڭ سوڭعى كۇنى ەڭ سوڭعى ويىن ادەتتەگىدەي ەڭ قىزىقتى سپورتتىق ويىن تۇرىنە – شايبالى حوككەيگە بەرىلەتىنى بار دەسەك, ول ءراسىم الماتىدا دا بۇزىلمادى.
قازاقستان مەن رەسەي اراسىنداعى حوككەيشىلەر وتە تاماشا ويىن كورسەتتى. ادەتتە, فۋتبولدا 3-4 دوپتان جوعارى گول سالىنعان جاعدايدا «حوككەيدىڭ ەسەبىندەي» بولدى دەپ كوتەرمەلەپ جاتار ەدى. بۇگىنگى ويىن, كەرىسىنشە, «فۋتبولدىڭ ەسەبىندەي» بولىپ ءۇش كەزەڭدە جالعىز شايبا سوعىلىپ, اقىرعى ويىن 1:0 ەسەبىمەن رەسەي كومانداسىنىڭ پايداسىنا شەشىلدى.
قازاقستان حوككەيشىلەرى ۋنيۆەرسيادانىڭ ەڭ سوڭعى كۇمىس مەدالىمەن ماراپاتتالىپ, الماتىداعى جاستىق جىگەردىڭ الامان جارىسىن اياقتادى.
ۋنيۆەرسيادا ويىندارى جابىلاتىن كۇنى – ەرتەڭگىسىن شاڭعىشىلارىمىز 30 شاقىرىمدىق كلاسسيكالىق ستيلدەگى جارىسقا شىقتى.شاڭعىشى سەرگەي مالىشەۆ ماسس-ستارتتىڭ قورىتىندىسى بويىنشا قازاقستان قورجىنىنا 35-ءشى مەدالدى, ياعني 17-ءشى قولا جۇلدەنى الىپ كەلدى.
بارشا قاۋىمنىڭ كوڭىلىنىڭ توعايىپ وتىرعان جايى بار. قىسقى سپورت ءتۇرىنەن وتكەن باسەكەدە قازاقستان سپورتشىلارى بۇرىن-سوڭدى مۇنداي سپورتتىق ناتيجەگە قول جەتكىزىپ كورمەپتى. ەڭ سوڭعى وتكەن يسپانيانىڭ گرانادا (2015 ج.) قالاسىنداعى ۋنيۆەرسيادادا ەلىمىزدىڭ سپورتشى ستۋدەنتتەرى 5 التىن, 2 كۇمىس, 7 قولا مەدال العان ەدى.
الماتىدا ول كورسەتكىش جالپى ەسەپ بويىنشا 3 ەسەدەن اسىپ جىعىلدى. بارلىعى 36 مەدالدىڭ – 11-ءى التىن, 8-ءى كۇمىس, 17-ءسى قولا جۇلدە. بۇل ءوزى مەرەيدى ۇستەم ەتكەن ماۋسىم بولدى!
سانى جاعىنان الماتىعا ەڭ كوپ كەلگەن رەسەيدىڭ 219 سپورتشىسى ءوز جانكۇيەرلەرىنىڭ ءۇمىتىن اقتادى. ءححVىىى دۇنيەجۇزىلىك قىسقى ۋنيۆەرسيادا ەندىگى كەزەكتە 2019 جىلى رەسەيدىڭ ءسىبىر ايماعىندا – كراسنويارسك قالاسىندا وتەدى.
قازاق جەرىندە لايىقتى ويىن ورنەگىن كورسەتكەن وڭتۇستىك كورەيا مەملەكەتىنىڭ سپورتشىلارى قازاقستانمەن يىق تۇيىستىرە ءجۇرىپ, 11 التىن, 5 كۇمىس, 5 قولامەن ءۇشىنشى ورىنعا تابان تىرەدى. جاپونيا, قىتاي سپورتشىلارى 6 جانە 5 التىن مەدالمەن ءتورتىنشى جانە بەسىنشى ورىندى ءبولىستى.
تالعات ءسۇيىنباي, «ەگەمەن قازاقستان»
الماتى