استانادا «يدەل» تاتار جانە تاتار-باشقۇرت مادەني ورتالىعى قاۋىمداستىعى» قوعامدىق بىرلەستىگىنىڭ جيىنى ءوتتى. وعان قازاقستان حالقى اسسامبلەياسىنىڭ مۇشەلەرى, رەسپۋبليكالىق ەتنومادەني بىرلەستىكتەردىڭ بەلسەندىلەرى, قحا عىلىمي-ساراپتامالىق كەڭەسى مەن زيالى قاۋىم وكىلدەرى, جاستار قاتىستى.
جيىن بارىسىندا مەملەكەت باسشىسى نۇرسۇلتان نازارباەۆتىڭ كونستيتۋتسيالىق رەفورماسىنا بايلانىستى ۇسىنىستاردى ازىرلەۋ ماسەلەلەرى, سونداي-اق, «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋى تالقىلاندى. ماسەلەن, وتىرىسقا قاتىسۋشىلار جولداۋدا ايتىلعان 5 باسىمدىق قوعامداعى تۇيتكىلدى دە وزەكتى, كۇردەلى ماسەلەلەردىڭ شەشىمىن تابۋعا نەگىز بولا الاتىنىنا توقتالا كەلە, ولاردا كوتەرىلگەن ءاربىر ماسەلە كەزەڭ-كەزەڭىمەن جۇزەگە اسىرىلسا, مەملەكەتتىڭ ودان ءارى دامۋىنا, باسەكەگە قابىلەتتى بولۋىنا ايتارلىقتاي ىقپال ەتەتىنىن جەتكىزدى.
سونداي-اق, باسقوسۋعا قاتىسۋشىلار بيلىك تارماقتارى اراسىندا وكىلەتتىكتەردى قايتا ءبولۋ مەملەكەت قۇرىلىمىن جاڭا زامانعا ساي جۇيەلەۋگە العىشارت بولاتىنىن اتاپ ءوتتى. ماسەلەن, قازاقستان حالقى اسسامبلەياسى مۇشەلەرىنىڭ وي-پايىمىنشا, مۇنداي وزگەرىستەر ۇكىمەت پەن پارلامەنتتىڭ ءرولىن كۇشەيتىپ قانا قويماي, ولارعا ۇلكەن جاۋاپكەرشىلىك جۇكتەمەك. وسى ورايدا, بيلىك تارماقتارى اراسىندا وكىلەتتىكتەردى قايتا ءبولۋ ارقىلى ولاردىڭ اراسىنداعى تەڭگەرىمدىلىكتى دۇرىس ساقتاي بىلگەن ءجون. دەمەك, ەگەر بيلىكتىڭ ءار تارماعى ءوزىنىڭ جۇمىسىن ناتيجەلى تۇردە اتقاراتىن بولسا, مەملەكەتتىك بيلىك ويداعىداي قىزمەت ەتپەك. مۇنداي جاۋاپكەرشىلىكتى الداعى ۋاقىتتا پارلامەنت دەپۋتاتتارى ايقىن سەزىنەتىن بولادى.
ءلايلا ەدىلقىزى, «ەگەمەن قازاقستان»