بارشا قازاقستاندىق اسىعا كۇتەتىن ەلباسىمىز ن.ءا.نازارباەۆتىڭ حالىققا ارناعان ءاربىر جولداۋى, ساياسي-ەكونوميكالىق جانە الەۋمەتتىك تۇرعىدا اسا تەرەڭ ءمانى مەن مازمۇنى بار تاريحي قۇجات. ويتكەنى, وندا باعىندىرعان بەلەستەر زەردەلەنىپ, الىنار اسۋلار سارالانادى.
پرەزيدەنت جولداۋى – ءار جىلدىڭ ەڭ باستى ساياسي قۇجاتى. ءوز جىلناماسىن, سوناۋ 1997 جىلدان باستاعان جولداۋلار ىشكى قيسىنى تۇرعىسىنان دا, ءمانى مەن مازمۇنى جاعىنان دا بىرىمەن-ءبىر ۇندەس ءارى ساباقتاس.
ەڭ العاشقى «قازاقستان-2030» دەگەن اتاۋمەن قابىلدانعان ستراتەگيالىق باعدارلامانىڭ مەرزىمىنەن بۇرىن ورىندالىپ, سۇيىكتى وتانىمىزدىڭ مەيلىنشە دامىعان 50 ەلدىڭ قۇرامىنا كىرۋىنە بايلانىستى جاڭا ستراتەگييالىق باعدارلاما قابىلداۋ قاجەتتىلىگى تۋىنداعان ەدى. وسىعان وراي, «قازاقستان-2050» اتتى جاڭا باعدارلاما ومىرگە كەلدى. باعدارلاما مەجەسى – 2050 جىلعا قاراي, دامىعان 30 ەلدىڭ قاتارىنان كورىنۋ. ايتۋعا وڭاي بولعانمەن, بۇل دەگەن اسا اۋقىمدى, وتە كۇردەلى مىندەت ەكەندىگى بەسەنەدەن بەلگىلى. مىنە, وسى كۇرمەۋى قيىن, بىراق مەيلىنشە وزەكتى, ءارى كوكەيكەستى مىندەتتى شەشۋ تەتىكتەرىن, ەلباسى ءوزىنىڭ سوڭعى جولداۋلارىندا ايقىنداپ بەرىپ كەلەدى.
«قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى بيىلعى جولداۋىندا ەلباسى الەمدىك داعدارىستان تۋىنداعان ەلىمىزدەگى ەكونوميكالىق جانە قارجىلىق داعدارىسقا قارسى باعىتتالعان, وتانىمىزدىڭ كەمەلدى كەلەشەگىن قامتاماسىز ەتەتىن ءمىندەتتەردى ايشىقتاپ بەردى. بۇل مىندەتتەردىڭ تۇپكى ماقساتى – 100 ناقتى قادامنان تۇراتىن ۇلت جوسپارىن جۇزەگە اسىرىپ, اسقاق ماقساتىمىز الەمدەگى بارىنشا دامىعان 30 ەلدىڭ ورتاسىنان ويىپ تۇرىپ ورىن الۋ. ماڭگىلىك ەل يدەياسىنىڭ سالتانات قۇرۋىن قامتاماسىز ەتۋ. وسىناۋ ايرىقشا ءمانى بار ستراتەگيالىق جوسپاردى جۇزەگە اسىرۋ ءۇشىن تەرەڭ ءبىلىمدى ءارى جوعارى بىلىكتى كادرلاردىڭ قاجەتتىلىگى ايتپاسا دا تۇسىنىكتى.
وسىعان بايلانىستى مەن, ۇستازدار قاۋىمىنىڭ وكىلى رەتىندە 5 نەگىزگى باسىمدىقتان تۇراتىن جولداۋدىڭ «ادامي كاپيتال ساپاسىن جاقسارتۋ» دەپ اتالاتىن 4-ءشى باسىمدىعىنا ەرەكشە توقتالعىم كەلىپ تۇر. ويتكەنى, يننوۆاتسيالىق ەكونوميكا مەن شيكىزاتتىق ەمەس سەكتوردى قۇرۋدىڭ نەگىزگى تەتىگى – جوعارى بىلىكتى كادرلار. سوندىقتان دا ەلباسى ءبىلىم بەرۋ مەن دەنساۋلىق ساقتاۋ سالالارىن جەتىلدىرۋگە ارنالعان بۇعان دەيىنگى باعدارلامالاردىڭ ورىندالۋ كەرەكتىگىن ەسكە سالا وتىرىپ, ويىن «ءبىلىم بەرۋ جۇيەسىنىڭ ءرولى وزگەرۋى ءتيىس» دەپ تۇيىندەيدى. ءۇش ءتىلدى وقۋعا كەزەڭ-كەزەڭىمەن كوشۋ كەرەكتىگىن ايتا كەلىپ, قازاق ءتىلىنىڭ باسىمدىعى ساقتالاتىنىن, ونىڭ ودان ءارى وركەندەي دامۋىنا زور كوڭىل بولەتىنىن اتاپ وتەدى.
ءسوزدىڭ رەتى كەلگەندە ايتا كەتەيىك, ءۇش تىلدە وقىتۋعا كوشۋ تۋرالى ماسەلە قوعامدا ءبىرشاما پىكىرتالاس تۋعىزعانى انىق. قولداۋشىلار دا, سىناۋشىلار دا بارشىلىق. ماسەلەگە سىني تۇرعىدا قارايتىندارعا ايتارىمىز, سىننىڭ بارىنشا ادىلەتتى بولعانى دۇرىس, سوندا عانا ونىڭ تاربيەلىك ءمانى بولادى. اتام قازاق «سىن تۇزەلمەي, ءمىن تۇزەلمەيدى» دەپ بەكەر ايتپاعان. ال ادىلەتسىز سىن «جاپتىم جالا, جاقتىم كۇيەنىڭ» كەرى بولىپ شىعادى.
سونىمەن, جولداۋ جاريالاندى. الدىمىزداعى باعىندىرار بيىكتەر مەن الىنار اسۋلار ايشىقتالدى. ەندىگى جەردەگى بارشامىزدىڭ مىندەتىمىز – وسىناۋ اسقاق مۇرات-ماقساتتاردى جۇزەگە اسىرۋ ءۇشىن ايانباي ەڭبەك ەتۋ.
ساتتار قۋاشباي,
وڭتۇستىك قازاقستان وبلىستىق ءماسليحاتىنىڭ دەپۋتاتى, ەكونوميكا عىلىمدارىنىڭ دوكتورى, پروفەسسور