ەلباسى نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى كەزەكتى جولداۋىنىڭ باسىم باعىتتارىن ءتۇسىندىرۋ جانە ناسيحاتتاۋ ماقساتىندا پارلامەنت ءماجىلىسىنىڭ دەپۋتاتى پاۆەل كازانتسەۆ استانا قالاسى كاسىپوداقتار ورتالىعىندا بولىپ, قالالىق كاسىپوداقتار وكىلدەرىمەن كەزدەستى.
استانا قالاسى كاسىپوداقتار ورتالىعىنىڭ توراعاسى سارسەنباي مىڭباەۆ مەملەكەت باسشىسىنىڭ جولداۋىندا جاڭا جاعدايدا سالا-سالا بويىنشا قانداي اۋقىمدى شارالار اتقارىلۋعا ءتيىس ەكەنىن ايقىنداپ بەرگەنىن ايتا وتىرىپ, بۇل ىستە كاسىپوداقتار بىرلەستىگىنىڭ دە اتقارار ءىسىنىڭ ءبىراز ەكەنىن تىلگە تيەك ەتىپ, ءسوز كەزەگىن پارلامەنت دەپۋتاتىنا ۇسىنىپ, كوپشىلىكتەن پىكىر الماسۋلارىن, كوكەيدە تۇيىندەلگەن سۇراقتارعا جاۋاپ الۋلارىن ايتىپ ءوتتى.
ءماجىلىس دەپۋتاتى پاۆەل كازانتسەۆ: «مەملەكەت باسشىسى نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋى اسا ماڭىزدى ستراتەگيالىق سيپاتقا يە دەپ ايتا الامىز. الەمدىك ەكونوميكاداعى جانە مەملەكەت ىشىندەگى كۇردەلى جاعداي كەزىندە ەلباسىنىڭ وسى جولداۋىن جاھاندىق سىن-قاتەرلەرگە دەگەن ءوزىندىك جاۋاپ جانە «قازاقستان-2050» ستراتەگياسىنىڭ ماقساتى مەن ءمىندەتتەرىن جۇزەگە اسىرۋعا ارنالعان جۇيەلى دە ناقتى جوسپار رەتىندە قاراستىرۋعا بولادى. سوندىقتان دا قازاقستاننىڭ جاڭعىرۋدىڭ جاڭا كەزەڭىنە كوشۋى جولداۋدىڭ نەگىزگى ماقساتى بولىپ وتىر. ال بۇل ىستە ءوزدەرىڭىزدەي ءدۇيىم جۇرتتى بىرىكتىرىپ وتىرعان ۇلكەن ۇجىمعا جۇكتەلەر جاۋاپكەرشىلىك تە اۋقىمدى» دەي كەلىپ, جولداۋداعى تەحنولوگيالىق رەۆوليۋتسياعا توقتالىپ, بۇل ورايدا قازاقستاننىڭ كۇن تارتىبىندە «جاسىل ەكونوميكانى» دامىتۋ, باسەكەگە قابىلەتتىلىكتى ارتتىرۋ مىندەتتەرى تۇرعانىن, وسىعان وراي «تسيفرلىق قازاقستان» باعدارلاماسىن جۇزەگە اسىرۋ باعىتىنداعى «قازاقستاننىڭ ۇلتتىق تەحنولوگيالىق باستامالارى» اتتى جاڭا دامۋ جوسپارى ايرىقشا ماڭىزعا يە ەكەنىن ايتىپ ءوتتى.
سونداي-اق كەزدەسۋ بارىسىندا دەپۋتاتقا كاسىپوداق وكىلدەرى تاراپىنان سۇراقتار قويىلىپ, كەي ماسەلەلەر جونىندە ءوز وي-پىكىرلەرىن ورتاعا سالدى.
بەرىك سادىر, «ەگەمەن قازاقستان»