قازاقستان پرەزيدەنتىنىڭ بيىلعى جولداۋىن تالقىلاۋ, مەملەكەتتىك بيلىكتىڭ تارماقتارى اراسىندا وكىلەتتىلىكتەردى قايتا ءبولۋ, جاستاردىڭ وتكىر ماسەلەلەرىن ورتاعا سالۋ – وسى كەزدەسۋدىڭ باستى تاقىرىبى بولدى.
ءماجىلىس دەپۋتاتى باقتيار ماكەن وبلىستا وسىعان دەيىن جۇمىسشىلارمەن, زيالى قاۋىم وكىلدەرىمەن, ستۋدەنتتەرمەن بولعان كەزدەسۋلەردەن العان اسەرىن باياندادى.
– جاستارمەن جۇزدەسۋگە مەن ءارقاشان اسىعىپ تۇرامىن. بۇگىن جاڭگىر حان اتىنداعى اگرارلىق ۋنيۆەرسيتەت ستۋدەنتتەرىمەن كەزدەستىك. وتە ورىندى, ۇتىمدى ۇسىنىستار ايتىلدى. «بولاشاق» قاۋىمداستىعىنىڭ وسى وڭىردەگى ءبولىمشەسىنە دە ءدان ريزامىن. ءاردايىم ۇيىمشىل, ەل تاعدىرى شەشىلەتىن ماسەلەلەرگە سەرگەك قاراپ, باستاماعا ءۇن قوسىپ وتىرادى. ونىڭ ۇستىنە باتىس قازاقستان وبلىسىن باسقارىپ وتىرعان التاي كولگىنوۆ تە «بولاشاق» باعدارلاماسىنىڭ تۇلەگى عوي. سوندىقتان, بۇل وڭىردە جاستار پىكىرىنە, جاستار ماسەلەسىنە ەرەكشە كوڭىل بولىنەدى, – دەدى دەپۋتات.
باقتيار ماكەن كونستيتۋتسياعا ەنگىزىلەتىن وزگەرىستەر, بيلىك ءبولىنىسى سەكىلدى تاقىرىپتارعا جەرگىلىكتى جاستاردىڭ كوزقاراسىن ءبىلۋ دەپۋتاتتار ءۇشىن وتە ماڭىزدى ەكەنىن ءمالىمدەپ, بۇرىن ەلىمىزدە بولعان «جاستار پارلامەنتى» جوباسى قايتا جانداناتىنىن ايتتى. جاستار پارلامەنتىنە ساياسي كوزقاراسى قالىپتاسقان كوشباسشى جاستار ىرىكتەلىپ الىنباق. ولار جالاڭ ۇرانمەن جۇمىس ىستەمەي, زاڭ تەتىكتەرىنە قاتىستى ناقتى ۇسىنىستار ايتا الاتىنداي كۇش بولۋى ءتيىس. جوباعا ءوڭىردەگى «بولاشاق» تۇلەكتەرى كوبىرەك تارتىلماق.
كەزدەسۋدە اقجايىق وڭىرىندە قىزمەت ەتىپ جۇرگەن بولاشاقتىق ماماندار, جاستار سەركەلەرى اشىق-جارقىن وي ءبولىسىپ, كوپتەگەن ۇسىنىستى ورتاعا سالدى.
«بولاشاق» قاۋىمداستىعى بقو بويىنشا فيليالىنىڭ جەتەكشىسى سالتانات تۇمەنباەۆانىڭ ايتۋىنشا, بۇگىندە وڭىردە «بولاشاق» باعدارلاماسىنىڭ 140-تان اسا ءتۇلەگى ءارتۇرلى سالادا ەڭبەك ەتىپ ءجۇر.
قازبەك قۇتتىمۇرات ۇلى, «ەگەمەن قازاقستان»
ورال