ەستونيالىق «Front Line» ىزدەستىرۋ توبىنىڭ جەتەكشىسى اندرەي ءلازۋريننىڭ ايتۋىنشا, تانەنبەرگ شەكاراسىندا لەنينگراد مايدانىنىڭ جاۋىنگەرلەرى جاۋعا قارسى 9 اي بويى شايقاسىپتى. قىزىلاسكەر نيكولاي سوروكين وسى جەردە ەستونيانى نەمىس-فاشيست باسقىنشىلارىنان ازات ەتۋ بارىسىندا ەرلىكپەن قازا تاپقان.
– ءبىز 14 جىل بويى ىزدەستىرۋ جۇمىستارىمەن اينالىسىپ كەلەمىز, – دەدى اندرەي لازۋرين, – وسى ۋاقىت ىشىندە بەلگىسىز 958 جاۋىنگەردى تاۋىپ, انىقتاپ, قايتا جەرلەۋ راسىمىنە قاتىستىق. بىراق, قازاقستانعا ءبىرىنشى رەت كەلىپ تۇرمىز. سەمەي قالاسىن العاشقى رەت كورۋىمىز. ەندى مىنە, ەستونيا-رەسەي-قازاقستان حالىقارالىق جوباسىمەن جۇمىس ىستەۋدى باستادىق. وسى جوبا ارىلى سەمەيگە سوروكيننىڭ مۇردەسىن جەتكىزۋگە رەسەيلىك ءبىر مەتسەنات كومەكتەستى.
– سوعىستا ەرلىكپەن قازا تاپقان نيكولاي سوروكيننىڭ دەنەسىن قازاقستان ەلشىسى ارقىلى تۋعان جەرىنە 73 جىلدان كەيىن جەتكىزۋگە مۇمكىندىك تۋدى, – دەيدى سەمەي قالالىق ىشكى ساياسات ءبولىمىنىڭ مامانى مەيىرجان امانگەلدى. بەيمالىم جاۋىنگەردىڭ دەرەگى قالتاسىنداعى №811663 «ەرلىگى ءۇشىن» مەدالى ارقىلى انىقتالعان. ىزدەستىرۋشىلەر رەسەي قورعانىس مينيسترلىگىنە حات جازىپ, مەدال يەسىن سۇراعاندا, بۇل 124-ءىنشى اتقىشتار ديۆيزياسى 781 پولكىنىڭ قاتارداعى جاۋىنگەرى, 1912 جىلى تۋعان نيكولاي فەدوروۆيچ سوروكيندىكى دەگەن انىقتاما جىبەرگەن. ول سەمەيدىڭ وكتيابر اۋداندىق اسكەري كوميسسارياتى ارقىلى 1941 جىلى 23 تامىزدا ءاسكەر قاتارىنا شاقىرىلعان ەكەن.
– اكەمىزدى مايدانعا اكەتكەندە نەبارى ءبىر جاستا بولدىم, ال اپكەم ءۇش جارىم جاستا ەدى, – دەپ اڭگىمەلەيدى مايدانگەردىڭ كىشى قىزى گالينا مۋراشكينا. – انامنىڭ ايتۋىنشا, ول كەمە جاساۋ زاۋىتىندا, شارۋاشىلىقتا جۇمىس ىستەگەن. اكەمىز سوعىستا ءىز-ءتۇزسىز كەتتى دەگەن قاعازدى الساق تا, سەنبەي ءومىر بويى ىزدەدىك. تەك 73 جىلدان كەيىن عانا دەرەگىن تاپتىق.
راۋشان نۇعمانبەكوۆا,
جۋرناليست
سەمەي