قازاقستان-رەسەي مەملەكەتتىك شەكاراسى بويىنداعى قازاقستاندىق شەكاراشىلار ەسىرتكىلىك زات – ماريحۋانا وتكىزبەك بولعانداردى ۇستادى, ال ولاردان الىنعان ماريحۋانانىڭ جالپى سالماعى 300 گرامنان استى, دەپ حابارلادى قر ۇقك شق ءباسپاسوز قىزمەتى.
اقتوبە شەكارا وتريادىنا قاراستى «جايساڭ-اۆتو» باقىلاۋ-وتكىزۋ بەكەتىنىڭ شەكارا ناريادى قىزمەتتىك ءيتتىڭ كومەگىمەن «اقتوبە – ورىنبور» باعىتىنداعى جولاۋشىلار اۆتوبۋسىنا شەكارالىق باقىلاۋ وتكىزۋ بارىسىندا 39 جاستاعى قازاقستاندىق ازاماتتى ۇستاۋعا ءماجبۇر بولدى. اتالعان ازاماتتىڭ كۇرتەسىنىڭ قالتاسىنان جاسىل ءتۇستى, وزىندىك ءيىسى بار ەسىرتكىلىك زات – ماريحۋانا تابىلدى.
وسى كۇنى قوستاناي شەكارا وتريادىنا قاراستى «قايراق-اۆتو» باقىلاۋ وتكىزۋ بەكەتىنىڭ شەكارا ساقشىلارى ەكى قازاقستاندىق ازاماتتى ۇستادى.
ۇستالعانداردىڭ ءبىرى – 24 جاستاعى جىگىت قازاقستاننان رەسەي ەلىنە «تويوتا» اۆتوكولىگىمەن ساپار شەگىپ بارادى ەكەن. شەكارالىق باقىلاۋ كەزىندە اۆتوكولىك ىشىنەن ءشامپۋننىڭ قۇتىسى تابىلىپ, ىشىندەگىسى الدىن الا ساراپتاما بويىنشا ماريحۋانا بولىپ شىقتى, سالماعى 25 گرامم ەكەن.
كەلەسى ۇستالعان ازامات «قوستاناي – ەكاتەرينبۋرگ» جولاۋشىلار اۆتوبۋسىنىڭ جولاۋشىسى بولىپ شىقتى. شەكارالىق باقىلاۋ كەزىندە ونىڭ قولىنداعى شىرىن قۇتىسىنان سالماعى 300 گرامداي بولاتىن ماريحۋانا شىعا كەلدى.