جوعارى حوككەي ليگاسىنداعى قازاقستاننىڭ قوس كلۋبى جانكۇيەرلەرىن قۋانتۋدان تانباي كەلەدى. بۇرناعى كۇنى وتكەن تۋردا وسكەمەننىڭ «تورپەدوسى» «ەرماك» (انگارسك) كومانداسىن 6:2 ەسەبىمەن ويسىراتا ۇتسا, قاراعاندىنىڭ «سارىارقاسى» ءوز ايدىنىندا «سوكولدان» (كراسنويارسك) باسىم ءتۇستى. ەسەپ – 3:2.
«تورپەدو» مەن «ەرماك» كوماندالارى اراسىنداعى كەزدەسۋدە دجوردون ساۋتورن, ۆلاديمير كوروتكوۆ, ەۆگەني رىمارەۆ, تالعات جايلاۋوۆ جانە الەكساندر ارحيپوۆ سىندى وسكەمەندىك حوككەيشىلەر گول سوعىپ, ورتاق جەڭىسكە سۇبەلى ۇلەس قوستى. ال قوناقتار تاراپىنان ارتۋرس وزولينش پەن سەرگەي لەسنۋحين «تورپەدو» قاقپاسىنان ساڭىلاۋ تابا ءبىلدى.
وسى جەڭىسىنەن كەيىن شىعىسقازاقستاندىق كلۋب ۇپاي سانىن 100-گە جەتكىزىپ, تۋرنير كەستەسىندە جەكە-دارا كوش باستاپ كەلەدى. قازىرگى تاڭدا ولار وزدەرىنىڭ قىر سوڭىنان قالماي كەلە جاتقان «سكا-نەۆا» (سانكت-پەتەربۋرگ) كومانداسىنان ءتورت ۇپايعا ۇزاپ كەتتى.
كەلەسى ويىنىن «تورپەدو» 13 اقپان كۇنى ءوز ايدىنىندا «بۋران» (ۆورونەج) حوككەي كلۋبىمەن وتكىزەدى.
قايرات ءابىلدينوۆ, «ەگەمەن قازاقستان»