قازاقستان وسىدان شامالى عانا ۋاقىت بۇرىن ءوز تاۋەلسىزدىگىنىڭ 25 جىلدىعىن اتاپ ءوتىپ, ورتالىق ازيا ءوڭىرىنىڭ كوشباسشىسى رەتىندە 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىندەگى مىندەتتەرىن اتقارۋعا كىرىستى.
جاقىندا قازاقستان پرەزيدەنتى نۇرسۇلتان نازارباەۆ مەملەكەتتىك ورگانداردىڭ وكىلەتتىكتەرىن قايتا ءبولۋ تۋرالى حابارلادى. بۇل بيلىك تارماقتارى اراسىنداعى ارا-سالماقتىڭ ادىلەتتى ءجۇيەسىن قامتاماسىز ەتۋ ماقساتىندا جاسالىپ وتىر.
قازاقستان باسشىسىنىڭ ەل حالقىنا ارنايى ۇندەۋىنە سايكەس, اتالعان رەفورما پرەزيدەنتتىك وكىلەتتىكتەردىڭ بەلگىلى ءبىر بولىگىن پارلامەنت پەن ۇكىمەتكە بەرۋدى قاراستىرادى. پارلامەنت ۇكىمەت مۇشەلەرىن تاعايىنداۋعا جاۋاپ بەرەتىن بولسا, بۇل ءوز كەزەگىندە مينيسترلەر كابينەتىنىڭ دەپۋتاتتار الدىنداعى جاۋاپكەرشىلىگىن كۇشەيتە تۇسەدى. سونداي-اق, رەفورما پارلامەنت تاراپىنان ۇكىمەتكە سەنىمسىزدىك ءبىلدىرۋ رەسىمىن وڭايلاتا ءتۇسۋدى كوزدەيدى. وسىلايشا, بيلىكتىڭ زاڭ شىعارۋشى تارماعىنىڭ اتقارۋشى ورگانداردى باقىلاۋىن كۇشەيتۋ قامتاماسىز ەتىلەدى.
الەۋمەتتىك-ەكونوميكالىق ماسەلەلەر, مەملەكەتتىك باعدارلامالاردى بەكىتۋ پرەزيدەنتتەن ۇكىمەتكە جانە اتقارۋشى بيلىكتىڭ جەرگىلىكتى ورگاندارىنا بەرىلەتىن بولادى. بۇل ولارعا اتالعان سالالاردا قوسىمشا وكىلەتتىكتەر بەرەدى. بۇدان بولەك, ۇكىمەت ءوزىنىڭ قۇرامىنا ەنەتىن ورتالىق اتقارۋشى ورگانداردى قۇرۋعا جانە تاراتۋعا وكىلەتتى بولادى.
بۇل وزگەرىستەر كونستيتۋتسياعا وزگەرىستەر ەنگىزۋدى تالاپ ەتەدى جانە نۇرسۇلتان نازارباەۆتىڭ تۇسىندىرۋىنشە, زاڭ شىعارۋشى بيلىكتىڭ ءرولىن كۇشەيتىپ, اتقارۋشى بيلىك قىزمەتىنىڭ تيىمدىلىگى مەن ناتيجەلىلىگىن ارتتىرۋعا باعىتتالادى. ياعني, ۇكىمەتتىڭ حالىق الدىنداعى جاۋاپكەرشىلىگى مەن ەسەپتىلىگى جوعارىلايدى. دەي تۇرعانمەن, قازاقستاننىڭ كەم دەگەندە جاقىن بولاشاقتا لاتىن امەريكاسى ەلدەرىندەگى سياقتى باسقارۋدىڭ پرەزيدەنتتىك-پارلامەنتتىك فورماسىنىڭ سپەتسيفيكالىق ءتۇرىن قۇرىپ وتىرماعانىن اتاپ كورسەتكەن ابزال. ءسويتىپ, قازاقستان بۇكىل لاتىن امەريكاسى ەلدەرى سەكىلدى پرەزيدەنتتىك رەسپۋبليكا بولىپ قالادى. اتالعان ورتالىق ازيادا مەملەكەت باسشىسىنىڭ قۇزىرىندا بۇرىنعىسىنشا سىرتقى ساياسات, قاۋىپسىزدىك جانە قورعانىس قابىلەتى سەكىلدى شەتىن ستراتەگيالىق شەشىمدەر قابىلداۋ قۇقى تولىعىمەن ساقتالادى. بۇعان قوسا, مەملەكەت باسشىسى بۇرىنعىسىنشا بيلىك تارماقتارىنىڭ اراسىندا «جوعارعى تورەشى» رەتىندە كورىنۋىن جالعاستىرادى.
ۇكىمەت ورگاندارى مەن جەرگىلىكتى ساراپشىلار نۇرسۇلتان نازارباەۆتىڭ باستاماسى جاھاندىق كوكەيكەستى سىن-قاتەرلەرگە, ونىڭ ىشىندە جەدەل قارقىنمەن ءجۇرىپ جاتقان جاھاندانۋ ۇدەرىستەرى, تەرروريزم قاتەرى, گەوساياسي تۇراقسىزدىق, جالعاسىپ جاتقان ەكونوميكالىق داعدارىس پەن جەمقورلىقپەن كۇرەس بار, پراگماتيكالىق جاۋاپ بولىپ تابىلاتىنىن ايتىپ وتىر. ساراپشىلاردىڭ سوزدەرىنە قاراعاندا, بۇل ساياسي رەفورما ەلدى ءارى قاراي دامىتۋ ءۇشىن قاجەتتى شارالاردىڭ قيسىندى جالعاسى بولىپ تابىلادى. ال رەفورمانىڭ ءناتيجەسى, ءارينە, ونىڭ تابىستى جۇزەگە اسىرىلۋىنا تاۋەلدى بولادى.
قازاقستان پرەزيدەنتىنىڭ اتالعان ماڭىزدى باستاماسىنىڭ قازاقستان-برازيليا قارىم-قاتىناسىنا تىكەلەي ىقپال ەتپەيتىنى انىق, ونىڭ ۇستىنە, بيلىك تارماقتارىنىڭ اراسىنداعى وكىلەتتىكتەردى قايتا ءبولۋ دەموكراتيالىق ينستيتۋتتار قىزمەتى ساياسي جۇيەسىنىڭ ورنىقتىلىعىن قامتاماسىز ەتۋدە جاقسى ۇلگى بولىپ تابىلاتىنى تالاس تۋدىرمايدى.
برازيليا مۋنيتسيپاليتەتتەرىنىڭ قاۋىمداستىعى