ەلىمىزدىڭ قوس پالاتالى پارلامەنت دەپۋتاتتارىنا اسا ماڭىزدى مىندەت جۇكتەلىپ وتىر. ولار اقپاننىڭ العاشقى ونكۇندىگىندە وبلىستاردىڭ اۋداندارى, قالالارى مەن شالعاي اۋىلدارىندا بولىپ, ەلباسىنىڭ حالقىمىزعا ارناعان جولداۋىنىڭ باستى باسىمدىقتارىن جانە بيلىك تارماقتارى وكىلەتتىكتەرىن ءبولۋ شارتتارىن جۇرتشىلىق جۇرەگىنە جەتكىزۋگە ءتيىس.
اقمولا وبلىسىنا كەلگەن ءماجىلىس دەپۋتاتتارى ەكى توپقا ءبولىنىپ, جۇمىستى بەلسەندى تۇردە جۇرگىزدى. ەلگە تانىمال ازاماتتار الدىمەن استراحان جانە تسەلينوگراد اۋدانىنىڭ حالىق تىعىز قونىستانعان ءتورت ەلدى مەكەنىندە بولدى. دەپۋتاتتار مۇرات تەمىرجانوۆ, سەرگەي زۆولسكي, مايرا ايسينا, پەتر شاراپوۆ, يرينا ارونوۆا, يرينا ۋنجاكوۆا نوۆوچەركاسسكوە, استراحان, رودينا, اقمول اۋىلدارىندا كوپشىلىك كوڭىلىندەگى كەلەلى اڭگىمە ءوربىتتى.
حالىق قالاۋلىلارى ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىنىڭ ستراتەگيالىق بەس باسىمدىعىنىڭ مازمۇنىن, سوعان بايلانىستى العا قويىلعان مىندەتتەر مەن مۇمكىندىكتەردى سارالاي تالدادى. سونىمەن قاتار, مەملەكەتتىك بيلىك وكىلەتتىكتەرىن ءبولۋدىڭ دەموكراتيالىق قادامداردى قۋاتتاندىرۋداعى ماقساتتارى اشىپ كورسەتىلدى.
جۇرتشىلىقپەن كەزدەسۋلەردەگى پىكىر الماسۋلار بارىسىندا ەل ءىشىن تولعاندىرىپ وتىرعان سۇراقتار قويىلىپ, ناقتى ۇسىنىستار ايتىلدى. ماسەلەن, اۋىل تۇرعىندارى مەملەكەتتىك باعدارلامالاردىڭ ىقپالىن ارتتىرۋ قاجەتتىگىنە نازار اۋداردى. اسىرەسە, «نۇرلى جەر» باعدارلاماسىنىڭ اياسىندا اۋىل تۇرعىندارى ءۇشىن جەكە تۇرعىن ءۇي قۇرىلىسىنا نەسيە قاراجاتىن ءبولۋدى وڭتايلاندىرۋ وزەكتى بولىپ وتىر. بۇل تۇرعىدا «تۇرعىن ءۇي-قۇرىلىس جيناق بانكىنىڭ» الدىن الا قارجى جيناقتاۋ تالاپتارىن قايتا قاراۋ جونىندە وتىنىشتەر ءتۇسىپ جاتتى. جوعارىداعى ءتورت اۋىلداعى كەزدەسۋلەرگە قاتىسۋشىلاردىڭ دەنى شاعىن جانە ورتا بيزنەستى دامىتۋ ءۇشىن ەكىنشى دەڭگەيدەگى بانكتەر نەسيەسىنىڭ قولجەتىمدىلىگىن قامتاماسىز ەتۋ, اۋىلدىق كووپەراتيۆتەردىڭ بولاشاعى, جەكەمەنشىك قۇقىعىنىڭ قورعالۋى, باعا مەن تاريف ساياساتى, قارجىلىق ساۋاتتىلىقتى ارتتىرۋ, ۇشتۇعىرلى ءتىل سياقتى ماسەلەلەردى كوتەردى. بۇعان ءماجىلىس دەپۋتاتتارى تياناقتى تۇسىنىك بەردى.
مۇرات تەمىرجانوۆ: قازاقستان پرەزيدەنتى نۇرسۇلتان نازارباەۆتىڭ جاڭا جولداۋىندا سىزدەردى مازالايتىن سۇراقتارعا جان-جاقتى جاۋاپ قايتارىلعان. ەلىمىزدى تۇبەگەيلى جاڭعىرتۋدىڭ ءۇشىنشى كەزەڭى وسى ماسەلەلەردىڭ كەشەندى شەشىلۋىنە دە بايلانىستى بولماق. سايلاۋشىلارىمىزدىڭ 40 پايىزى اۋىلدىق جەرلەردە تۇراتىندىقتان, ءوزىم دە وسى سالانىڭ وكىلى بولعاندىقتان, ەلباسى جولداۋىنداعى «اگرارلىق سەكتور ەكونوميكانىڭ جاڭا درايۆەرىنە اينالۋى كەرەك» دەگەن باسىمدىقتى مەرەيلى مىندەت سانايمىن. بۇل قوعامنىڭ ورتاق كۇش-قارىمىمەن جۇزەگە اسپاق. ونىڭ ءتيىمدى جولدارى اشىپ كورسەتىلدى. «Made in Kazakhstan» برەندى الەمنىڭ كوپتەگەن مەملەكەتتەرىنە بەلگىلى. ايتكەنمەن, ديقاندارىمىز تاۋەكەلشىلدىكپەن جۇمىس ىستەيدى. سۋبسيديالاۋ جالعاسىن تاباتىن بولادى. بىراق, اۋا رايىنا تاۋەلدىلىك ساقتاندىرۋ ماسەلەسىن جەتىلدىرۋدى تالاپ ەتۋدە. ەندىگى جەردە وندىرىلگەن ءونىمدى ساقتاندىرۋ ءتارتىبى كەپىلدى وتەمدى قامتاماسىز ەتۋمەن قاتار, شەتەلدىك ساقتاندىرۋ كومپانيالارىنىڭ قىزىعۋشىلىعىن ارتتىرادى دەگەن ويدامىن.
ءۇي شارۋاشىلىعى مەن فەرمەرلىك قۇرىلىمداردى كووپەراتيۆتەرگە بىرىكتىرۋدىڭ اقمولالىق تاجىريبەسى نازار سالارلىقتاي. قارجىلاندىرۋ ماسەلەسى دە ارتىپ كەلەدى. مەملەكەت بۇرىنعى 3 ميلليون تەڭگەلىك شاعىن نەسيەنى 16 ميلليونعا جەتكىزۋ ارقىلى كاسىپكەرلىكتى بارىنشا دامىتۋعا جول اشىپ بەرىپ وتىر. بۇل قالا مەن اۋىل تۇرعىندارىنىڭ بىردەي مۇمكىندىككە يە ەكەندىگىن كورسەتەدى.
مايرا ايسينا: «جاڭعىرۋ 3.0» جولداۋىنىڭ بارلىق باسىمدىقتارى قازاقستان حالقىنىڭ, مەملەكەتىنىڭ ابىرويلى دامۋىن كوزدەيدى. مۇندا يندۋسترياعا تسيفرلىق تەحنولوگيانى ەنگىزۋ اسا ماڭىزدى. مەملەكەت باسشىسى العاشقى باسىمدىقتار قاتارىندا ۇكىمەتكە ءىت-ستارتاپتار حالىقارالىق تەحنوپاركىن قۇرۋدى تاپسىرۋى جاڭا ءداۋىر تالاپتارىمەن ۇندەس كەلەدى. بۇل ەكونوميكانى بارىنشا دامىتۋمەن بىرگە قولدانىستاعى قۇرىلىمداردى جەتىلدىرۋگە مۇمكىندىك بەرەدى. وتباسىلىق بيزنەس, قارجىلىق ساۋاتتىلىق, تاعى باسقا قاجەتتىلىكتەر وسىدان باستالادى. ءومىر ساپاسىن ارتتىرۋ ءوز قولىمىزدا دەگەنىمىز دە وسى.
بالالارىمىز بازالىق ءبىلىم الىپ قانا قويماي, ونى ءتيىمدى پايدالاناتىن تۇلعا دارەجەسىنە كوتەرىلۋى كەرەك. ءبىز جەدەل بانكينگ, ەلەكتروندى قىزمەتتى پايدالانۋىمىز قاجەت. جاڭا ءداۋىر ادامدارى ەندىگى جەردە سىرتتاي بايقاۋشى بولا المايدى. وسى جەردە كەڭ ۇعىمداعى تاربيە ءىسىنىڭ اۋقىمى ارتاتىندىعىنا, وعان بارشامىزدىڭ قاتىسۋىمىز كەرەكتىگىنە نازار اۋدارعىم كەلەدى.
باقبەرگەن امالبەك, «ەگەمەن قازاقستان»
اقمولا وبلىسى