نۇرسۇلتان نازارباەۆ چەح رەسپۋبليكاسى پارلامەنتىنىڭ دەپۋتاتتار پالاتاسىنىڭ توراعاسى يان گاماچەكپەن كەزدەستى, دەپ حابارلادى قازاقستان پرەزيدەنتىنىڭ ءباسپاسوز قىزمەتى.
كەزدەسۋ بارىسىندا ەكىجاقتى ىنتىماقتاستىقتىڭ ناتيجەلەرى مەن پەرسپەكتيۆالارى تالقىلاندى.
مەملەكەت باسشىسى پارلامەنتارالىق كووپەراتسيانىڭ ماڭىزدىلىعىن اتاپ ءوتىپ, ەكى ەلدىڭ ەكونوميكا جانە ساياسات سالاسىنداعى قارىم-قاتىناسىن ودان ءارى دامىتۋعا قازاقستاننىڭ ءازىر ەكەنىن جەتكىزدى.
– ءسىزدىڭ ساپارىڭىز وتە ماڭىزدى. چەح رەسپۋبليكاسىمەن ارامىزدا اۋەل باستان-اق دوستىق قارىم-قاتىناس ورنادى. چەح رەسپۋبليكاسىنىڭ پرەزيدەنتى م.زەمان بىزدە قوناق بولدى. ەندى ونىڭ ەكسپو-2017 كورمەسىنىڭ اشىلۋىنا كەلۋىن كۇتەمىز, – دەدى قازاقستان پرەزيدەنتى.
چەح رەسپۋبليكاسى پارلامەنتىنىڭ دەپۋتاتتار پالاتاسىنىڭ توراعاسى 25 جىل ىشىندە قۋاتتى دا تۇراقتى مەملەكەت قۇرعان قازاقستان حالقى تاريحىنىڭ بىرەگەي سيپاتىنا توقتالىپ ءوتتى.
سوڭىندا يا.گاماچەك نۇرسۇلتان نازارباەۆتى تاۋەلسىزدىگىمىزدىڭ 25 جىلدىعىمەن قۇتتىقتاپ, جاس مەملەكەتىمىزدىڭ ودان ءارى ءوسىپ-وركەندەي بەرۋىنە تىلەكتەستىك ءبىلدىردى.
سۋرەت پرەزيدەنتتىڭ ءباسپاسوز قىزمەتىنەن الىندى