باتىستىڭ كەيبىر كينوسىنشىلارى مونعولياداعى بۇركىتشى قازاق قىزى ايشولپان تۋرالى ءفيلمنىڭ شىنىمەن دە دەرەكتى ەكەنىنە كۇمان كەلتىرۋدە. بۇل تۋرالى بۇگىن BBC News جازدى. اتالعان تۋىندى دۇيسەنبى كۇنى Bafta بايقاۋىنا ۇسىنىلدى.
اكەسىنەن قۇسبەگىلىكتى ۇيرەنگەن 13 جاسار ايشولپان نۇرعايىپ مونعوليانىڭ وڭتۇستىك باتىسىنداعى بايان ولگەي ايماعىندا تۇرادى. ايشولپان تۋرالى رەجيسسەر وتتو بەللدىڭ دەرەكتى فيلمىنە باتىس كينوتانۋشىلارى "دەرەكتەن گورى ارەكەتى كوپ فيلم", "ەرتەگىدەن تۇراتىن دەرەكتى فيلم" دەگەن باعالار بەرسە, كەي ساراپشىلار "كوشپەندى قازاقتاردىڭ تابيعاتىن اشا الماعان, شيكى تۇسىرىلگەن" دەيدى.
امەريكالىق تاريحشى ادريەن مامور "ەر ادامنىڭ ۇستەمدىك قۇرعان سوڭعى 2000 جىلدا العاش رەت قىز بالا ەرلىگىنىڭ وسىنداي بيىككە كوتەرىلىپ دارىپتەلۋىن" جوعارى باعالايدى. دەگەنمەن, مامور ايشولپاننىڭ قۇسبەگىلىكپەن اينالىسۋىن ونىڭ اۋلەتىمەن بايلانىستىرىپ, "12 ۇرپاق بويى قىز بالا سۇيمەگەن اۋلەتتە ايشولپاننىڭ ەر مىنەزدى بولىپ ءوسۋى تاڭ قالارلىق دۇنيە ەمەس" دەيدى.
جالپى, وتتو بەللدىڭ فيلم تۇسىرۋىنە تۇرتكى بولعان يزرايل فوتوگرافى اشەر سۆيدەنسكيدىڭ BBC-گە ارناپ تۇسىرگەن سۋرەتى ەكەن. سۋرەتتى كورگەننەن كەيىن رەجيسسەر 2014 جىلى ايشولپان تۋرالى فيلم تۇسىرۋگە بەكىنىپتى.
فيلم تۋرالى ساراپشىلاردىڭ سىن ايتاتىن تاعى ءبىر تۇسى - فيلمدە ايشولپان راديودان قۇسبەگىلەردىڭ جارىسى بولاتىنىن ەستىپ, وعان قاتىسۋعا اتا-اناسىنان رۇقسات سۇراۋى. كينوتانۋشىلار وسى جەردە ايشولپاننىڭ مىنەزى اشىلماي قالعانىن ايتادى.
كينو سىنشىلارى ايشولپاننىڭ قۇزدان تومەن تۇسەتىن جەرى مەن اكەسىنىڭ جىپپەن دەمەپ تۇراتىن تۇسىن جانە وسى سەكىلدى بىرنەشە اسەرلى جەرلەردى "شىنايى ەمەس, كادردىڭ ادەمى شىعۋى ءۇشىن ادەيى جاسالعان" دەپ سىنايدى. دەگەنمەن, رەجيسسەر بۇل سىنمەن مۇلدە كەلىسپەيدى. "ايشولپاننىڭ ۇيادان بالاپان الىپ تۇسەتىن جەرىن مەن ءبىر دۋبلمەن الدىم. بۇل سپورت ويىندارىنان تىكەلەي حابار تاراتۋمەن پاراپار نارسە", - دەيدى رەجيسسەر. ساراپشىلاردىڭ تاعى ءبىر كۇمانمەن قارايتىن جەرى ايشولپاننىڭ اكەسى اعالايعا قاتىستى. اعالاي ايشولپاننىڭ قۇسبەگىلىكپەن اينالىسۋى ءۇشىن ءوز اكەسىنىڭ باتاسىن الاتىن جەرى شىنايى بولعانىمەن, باتىس سىنشىلارى بۇل كادردىڭ دا فيلم ءۇشىن ادەيى تۇسىرىلگەنىن ايتادى. الايدا, وتتو بەلل بۇل تۇستا دا سىنشىلاردىڭ پىكىرىن جوققا شىعارادى. دەگەنمەن, بەللدىڭ ستسەنارتسيىن ايشولپاننىڭ ءوزى ماقۇلداعان. "مەن 10 جاسىمنان باستاپ قۇسبەگىلىككە قىزىعا باستادىم", - دەيدى ايشولپان BBC-گە بەرگەن سۇحباتىندا. ايشولپاننىڭ ايتۋىنشا, كوپتەگەن ەرەسەك ەر ادامدار قىز بالانىڭ قۇسبەگىلىككە شىققانىنا تاڭىرقاي قاراعان. دەگەنمەن, جارىستى ۇيىمداستىرۋشىلار ايشولپانعا كوپ كومەك بەرگەن.