8 جىل ىشىندە الماتى قالاسىنىڭ الاتاۋ اۋدانىنا ينۆەستيتسيالار 32 ەسە ءوستى, دەپ حابارلادى قالا اكىمدىگى.
الماتى قالاسىنىڭ الاتاۋ اۋدانىندا ۋنيۆەرسيادانىڭ باستى نىساندارى – «الماتى ارەنا» جانە اتلەتيكالىق اۋىل سالىندى. «الماتى ارەناعا» تىكەلەي جاقىن ماڭايدا 15,6 مىڭ پاتەرگە ارنالعان شاعىن اۋدان, سونىڭ ىشىندە «ەسكى ۇيلەر» باعدارلاماسى بويىنشا 9 قاباتتى ەكى تۇرعىن ءۇي بوي كوتەرگەن. 3 جىل ىشىندە تاعى 16 مىڭ پاتەرگە ارنالعان 279 ءۇي سالىنباق.
ۋنيۆەرسيادا جانە الەۋمەتتىك ينفراقۇرىلىم نىساندارىنىڭ اۋقىمدى قۇرىلىسى ءۇشىن الاتاۋ اۋدانى ينجەنەرلىك جەلىلەرىنىڭ قۋاتتىلىقتارى ۇلعايتىلعان. ۋنيۆەرسياداعا دايىندىق كەزەڭىندە اۋداندا 160 شم ەلەكتر جەلىسى, 200 شم ماگيسترالدى گاز جەلىلەرى, سونداي-اق 34 شم سۋ قۇبىرى وتكىزىلگەن.
بۇدان بولەك, اكىمدىكتىڭ اقپاراتى بويىنشا, اۋداندا 30 شم جاڭا جول سالىنعان, قولدانىستاعى 70 شم جولعا اسفالت توسەلگەن. جاڭا اكىمشىلىك ورتالىقتىڭ تولىق ينفراقۇرىلىمى قالىپتاستىرىلدى: اكىمدىك, سوت جانە پروكۋراتۋرا, سالىق, ءورت دەپوسى, حقكو, ارنايى حقكو, مۇراعات, ءاىىب. الەۋمەتتىك نىساندار سالىنعان: 4 جاڭا ەمحانا, 9 مەكتەپ, 12 مەملەكەتتىك بالاباقشا. اۋداندى اباتتاندىرۋ جانە كوگالداندىرۋ بويىنشا اۋقىمدى جۇمىستار جۇرگىزىلگەن. «الماتى ارەنا» ساياباقتارى بۇگىندە زاماناۋي سۋارۋ جۇيەلەرىمەن جاراقتاندىرىلعان.
«وسى شارالاردىڭ ناتيجەسىندە الاتاۋ اۋدانىنىڭ ينۆەستيتسيالىق تارتىمدىلىعى ارتتى. 8 جىل ىشىندە اۋدانعا ينۆەستيتسيالار – 32 ەسە, ونەركاسىپتىك ءونىم ءوندىرىسى 12,3 ەسە ءوستى. مەيرامحانالار سانى – 1,7 ەسە, قوناق ۇيلەر 1,5 ەسە ءوستى», - دەلىنگەن حابارلامادا.
وسى رەتتە, سالىق تۇسىمدەرى 3 ەسە 3,7 ملرد تەڭگەدەن 22,5 ملرد تەڭگەگە دەيىن وسكەن.