«نەيروسكاي» دەگەن قۇرىلعى ءبىزدىڭ ميىمىزداعى سيگنالدى قابىلداپ, كومپيۋتەرگە شىعارادى, دەپ جازادى 24.kz.
«ارنايى باعدارلامانى مەڭگەرۋ ۇستىندەمىز. بۇل بىزگە بولاشاقتا ءتىپتى ادامنىڭ ويىن وقۋعا مۇمكىندىك بەرەدى. «نەيروسكاي» دەگەن قۇرىلعى ءبىزدىڭ ميىمىزداعى سيگنالدى قابىلداپ, كومپيۋتەرگە شىعارادى. ول ميىمىزدىڭ جۇمىسىن, نە ويلايتىنىمىزدى كورسەتەدى. بولاشاقتا وسى تەحنولوگيالار, مىسالى, مۇعالىم ساباق بەرگەندە وقۋشىنىڭ تىڭداپ-تىڭدامايتىندىعىن كورىپ بىلە الادى. قازىرگى ۋاقىتتا ميىم جۇمىس ىستەپ جاتىر, بىراق تا شارشادىم, سونى كورسەتىپ تۇر», - دەيدى ستۋدەنتتىك كونسترۋكتورلىق بيۋرونىڭ مۇشەسى امىر قامي.
تەحنولوگيا سالاسىنداعى تاجىريبە الەمدىك دەڭگەيدەگى ۇزدىكتەرمەن تەرەزە تەڭەستىرۋ ءۇشىن قاجەت. بۇل جەردە بەرىلگەن ءبىلىم جاستاردىڭ مەكتەپ پەن جوعارعى وقۋ ورنىندا العان ءبىلىمىن بەكىتۋگە جاردەمدەسەدى. باسەكەگە قابىلەتتى ماماندار كەيىن قۇرىلىس پەن ءوندىرىس, روبوت تەحنيكالارىن قۇراستىرۋ, مەديتسينا جانە ەلىمىزدىڭ كيبەر كەڭىستىگىن قورعاۋ سالاسىنا ۇلەس قوسپاق.
ء"بىز نەگىزگى ەكى باعىت بويىنشا جۇمىس ىستەيمىز. سونىڭ ءبىرى شەت تىلدەرىن مەڭگەرۋ بارىسىندا پايداعا اسادى. ماسەلەن, ارنايى كوزىلدىرىكتى كيگەن ستۋدەنتتىڭ الدىنا ءبىر نارسەنى قويامىز. سول كەزدە ارنايى باعدارلاما ونىڭ شەت تىلىندەگى اۋدارماسىن كورسەتەدى. وقىتۋدىڭ مۇنداي تىڭ ءادىس-تاسىلدەرى ۇيرەنۋشىنىڭ قاجەتتى سوزدەردى ۇمىتىپ قالماۋىنا كومەكتەسەدى", - دەيدى ۋنيۆەرسيتەت پروفەسسورى سەرگەي كيبالنيكوۆ.
جىلدىڭ باستى قۇجاتىندا پرەزيدەنت تسيفرلىق تەحنولوگيانى قولدانۋ ارقىلى قۇرىلاتىن جاڭا يندۋستريالار وركەندەۋى ءتيىس ەكەندىگىن ايتتى. ياعني ەلىمىزدىڭ ءبىلىم بەرۋ مەن مەديتسينا سالاسىندا تەحنولوگيا جەتىستىكتەرى كەڭىنەن قولدانىلۋى قاجەت. «ءبىزدىڭ باستى ماقساتىمىز – وسى باعىتتا تىڭ جاڭالىقتار اشۋ», - دەيدى ۋنيۆەرسيتەت رەكتورى.
"بۇكىل الەمدە ۇلكەن داعدارىسقا ۇشىراپ جاتقان ۋاقىتتا ءبىزدىڭ قازاقستان قالىپتى, جوسپارلى, بەدەلدى كۇيىندە تۇر. سونىڭ ىشىندە ءبىز بىرنەشە مودەرنيزاتسيادان ءوتىپ جاتىرمىز. مىنە, IT تەحنولوگيا دەيمىز. باستى باعىتىمىز – سول cاندىق تەحنولوگيامەن باسەكەگە قابىلەتتى, الەمدەگى ەڭ مىقتى مەملەكەتتەردىڭ قاتارىنا كىرۋ", - دەيدى قازاقستان يتج ۋنيۆەرسيتەتىنىڭ رەكتورى اقسارىك ءايتىموۆ.
ۋنيۆەرسيتەتتە 12 مىڭداي ستۋدەنت ءبىلىم الىپ جاتىر. ولار مەڭگەرەتىن 20 ماماندىقتىڭ تەڭ جارتىسى قازىردىڭ وزىندە يننوۆاتسيالىق تەحنولوگيا سالاسىندا قولدانىستا. ماسەلەن, ىزدەنۋشى جاستار 3D پرينتينگ ارقىلى مودەلدەۋ تاسىلدەرىن ۇيرەنەدى. ولاردىڭ بىرقاتار IT جوبالارى بيىل EXPO 2017 كورمەسىنە قاتىسپاقشى.