وڭتۇستىك قازاقستان وبلىسىندا وتكەن «قازاقستان-تۇركيا ينۆەستيتسيالىق فورۋمىنىڭ» اياسىندا دەلەگاتسيا قۇرامى وقو-نىڭ تاريحي جەرلەرىنە ساياحات جاسادى, دەپ حابارلادى وقو اكىمىنىڭ ءباسپاسوز قىزمەتى. اتاپ ايتقاندا, تۇرىك كاسىپكەرلەرى وتىرار اۋدانىنداعى «وتىرار توبە» قالاشىعىنا باردى. مۇنان سوڭ, «ارىستان باب» كەسەنەسىنە زيارات جاسالىپ, بابا رۋحىنا دۇعا باعىشتالدى.
مارتەبەلى مەيمانداردى ارنايى كۇتىپ العان اۋدان اكىمى ەرلان ايتاحانوۆ دەلەگاتتاردى بولاشاقتا اۋداندا جۇزەگە اسىرىلاتىن جوبالارىمەن تانىستىرىپ, باۋىرلاس ەلدىڭ وكىلدەرىن ءوڭىردىڭ تۋريزم سالاسىنا ينۆەستيتسيا سالۋعا شاقىردى. اۋدان باسشىسىنىڭ مالىمەتىنشە, وتكەن جىلى «وتىرار توبە» قالاشىعىنا 110 مىڭنان استام تۋريست كەلسە, ونىڭ 5 مىڭى شەتەلدىك ساياحاتشىلار ەكەن.
بۇل كۇنى دەلەگاتتار تۇركىستان قالاسىنداعى قوجا احمەت ياساۋي كەسەنەسىن دە ارالادى. ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىندە بولدى. ءوڭىردىڭ تۋريستىك الەۋەتىمەن تانىسقان شەتەلدىك قوناقتار وبلىستىڭ تاريحي جەرلەرگە باي ەكەنىن ايتىپ, جوعارى باعالاپ, سوعان ساي بولاشاقتا مۇنداعى تۋريزم سالاسى ودان ءارى دامي بەرەتىنىنە سەنىم ءبىلدىردى.
بۇكىل الەمدىك مادەني مۇرا تىزىمىندەگى يۋنەسكو-نىڭ قۇرامىنا كىرەتىن ماۆزولەي ەلىمىزدەگى تۋريستەر ەڭ كوپ كەلەتىن ايماقتاردىڭ ءبىرى بولىپ تابىلادى. وتكەن جىلدارى كيەلى مەكەنگە ءبىر جىلدا 1ملن. 60 مىڭ تۋريست كەلسە, 245 مىڭى شەتەل ازاماتتارى ەكەن.