باقىتجان ساعىنتاەۆ قر ۇكىمەتى وتىرىسى بارىسىندا مەملەكەتتىك ساتىپ الۋلار جانىنداعى وتاندىق تاۋارلار ۇلەسىن ارتتىرۋدى تاپسىردى, دەپ جازادى pm.kz.
قر پرەمەر-ءمينيسترى ب. ساعىنتاەۆ اۆتوكولىكتەر بويىنشا ورتالىقتاندىرىلعان مەملەكەتتىك ساتىپ الۋلار تەتىگىن ەنگىزۋ وتاندىق وندىرۋشىلەردىڭ الەۋەتىن ارتتىرىپ, ولاردىڭ ءوندىرىسىن جاڭعىرتۋعا مۇمكىندىك بەرگەنىن ايتىپ ءوتتى.
«ءبىز بيىلعى جىلى اتالعان جۇمىستى جيھاز بەن جەڭىل ونەركاسىپتە جۇرگىزۋ جونىندە كەلىسىپ قويدىق. وسىعان ۇقساس ءتاسىلدى ەنگىزەتىن سالالاردىڭ ءتىزىمىن ۇلعايتۋ كەرەك», - دەدى ب. ساعىنتاەۆ.
وسىعان وراي, ينۆەستيتسيالار مينيسترلىگىنە ۇكپ-مەن بىرلەسىپ ءبىر اپتادا اتالعان ماسەلە بويىنشا ناقتى ۇسىنىستار ەنگىزۋ تاپسىرىلدى.
بۇدان وزگە, قارجى مينيسترلىگىنە ءتيىستى مەملەكەتتىك ورگاندارمەن بىرلەسىپ, بارلىق مەملەكەتتىك ساتىپ الۋلاردى جۇرگىزۋ كەزىندە وتاندىق ءونىمدى پايدالانۋ تۇرعىسىنان كونكۋرستىق قۇجاتتامانى تياناقتى تۇردە تەكسەرۋ تاپسىرىلدى.
بۇدان بولەك, ب. ساعىنتاەۆ كۆازيمەملەكەتتىك سەكتوردىڭ ساتىپ الۋ جۇمىسىنا توقتالدى. ول بۇل ماسەلەدە بىرىڭعاي ساياساتتىڭ جوق ەكەنىن ايتىپ, ءبىر اپتالىق مەرزىمدە وسى كومپانيالارعا ارنالعان, ايقىندىق پەن قولجەتىمدىلىك ەسكەرىلگەن, ساتىپ الۋلاردىڭ بىرىڭعاي ەرەجەلەرى بويىنشا ورتاق تاسىلدەمە ازىرلەۋدى تاپسىردى.
«اتالعان تاسىلدەر نەگىزىندە قارجى مينيسترلىگىنە ءبىرىنشى توقساننىڭ سوڭىنا دەيىن ءتيىستى زاڭ جوباسىن ازىرلەۋدى تاپسىرامىن», - دەدى ب. ساعىنتاەۆ.
سونىمەن قاتار, قر پرەمەر-ءمينيسترى ينۆەستيتسيالار جانە دامۋ, قارجى مينيسترلىكتەرىنە ۇكپ جانە ۇلتتىق حولدينگتەرمەن بىرلەسىپ, كۆازيمەملەكەتتىك سەكتور مەن جەر قويناۋىن پايدالانۋشىلاردى قوسىپ, ءتيىستى دەرەكتەر بازاسىن بىرىكتىرە وتىرىپ, ساتىپ الۋلار مەن وندىرۋشىلەردىڭ بىرىڭعاي ءىت-پلاتفورماسىن قۇرۋدى تاپسىردى.
بۇدان وزگە, ينۆەستيتسيالار جانە دامۋ, ەنەرگەتيكا مينيسترلىكتەرىنە «سامۇرىق-قازىنا» جانە اكىمدەرمەن بىرلەسىپ, ءاربىر ءىرى كاسىپورىنمەن جۇمىس جۇرگىزىپ, جەرگىلىكتى قامتۋدى ۇلعايتۋ بويىنشا ماقساتتى ينديكاتوردى بەلگىلەۋ تاپسىرىلدى.
«مەملەكەتتىك ساتىپ الۋلار جونىندەگى ماسەلەلەردى ءوزىم باقىلاۋدا ۇستايمىن», - دەدى ب. ساعىنتاەۆ.