قر پرەمەر-ءمينيسترى باقىتجان ساعىنتاەۆ قر ۇكىمەتى وتىرىسى بارىسىندا ەكسپورت جانە يمپورت جونىندەگى ۇلتتىق كومپانيالار قۇرۋ ماسەلەسىن پىسىقتاۋدى تاپسىردى.
قر پرەزيدەنتى نۇرسۇلتان نازارباەۆتىڭ قاتىسۋىمەن قازاقستان ۇكىمەتىنىڭ كەڭەيتىلگەن وتىرىسى ءوتتى, ونىڭ بارىسىندا قر پرەزيدەنتىنىڭ جولداۋىن ورىنداۋ بويىنشا مينيسترلەر كابينەتىنىڭ الدىنا بىرقاتار ناقتى مىندەتتەر قويىلعان بولاتىن.
قر پرەمەر-ءمينيسترى باقىتجان ساعىنتاەۆ وتكەن جىلدىڭ 6 جەلتوقسانىنداعى «يندۋستريالاندىرۋ كۇنىندە» جانە قازاقستان حالقىنا جولداۋىندا مەملەكەت باسشىسى ەكىنشى بەسجىلدىقتىڭ نەگىزگى باسىمدىقتارى – بۇل ونىمدىلىگى جوعارى باسىمدىقتى سالالارداعى ەكسپورتتىق وندىرىستەردىڭ باسەكەگە قابىلەتتىلىگىن دامىتۋدى بەلگىلەگەنىن ەسكە سالىپ ءوتتى.
وسىعان بايلانىستى ب. ساعىنتاەۆ ينۆەستيتسيالار جانە دامۋ مينيسترلىگىنە سالالىق مينيسترلىكتەرمەن جانە اكىمدىكتەرمەن بىرگە پرەزيدەنت بەلگىلەگەن 72 نىساننىڭ ءار قايسىسى بويىنشا پىسىقتاۋدى جانە سايكەس شارالار كەشەنىن ازىرلەۋدى تاپسىردى.
سونداي-اق, قر يدم-گە مۇددەلى مەملەكەتتىك ورگاندارمەن, اكىمدىكتەرمەن جانە ۇلتتىق پالاتامەن بىرگە جاڭا جوبالاردى ىرىكتەۋ بويىنشا ءتيىمدى تاسىلدەردى ازىرلەۋ تاپسىرىلدى.
«مەملەكەتتىك قولداۋدى باسەكەگە قابىلەتتىلىكتى ارتتىرۋعا جانە ەكسپورتتىق نارىقتارعا شىعۋعا ارنالعان ناقتى جوسپارلارى بار جوبالار عانا الۋى ءتيىس», - دەپ اتاپ ءوتتى ب. ساعىنتاەۆ.