اتىراۋ وبلىستىق ش.ساريەۆ اتىنداعى كوركەمسۋرەت جانە قولدانبالى-ساندىك ونەر مۋزەيىندە سۋلى-باتپاقتى جەرلەر كۇنىنە ارنالعان كورمە ءوتتى. «اقجايىق» مەملەكەتتىك تابيعي رەزەرۆاتىمەن بىرلەسكەن فوتوكورمەدە قورىقتىڭ باستى ەرەكشەلىكتەرى مەن بيوالۋان تۇرلىلىگى تۋرالى اقپارات بەرىلگەن.
مۋزەي باسشىسىنىڭ ورىنباسارى جانىبەك ورىنباساروۆتىڭ ايتۋىنشا, شارانى ۇيىمداستىرۋداعى ماقسات – قورشاعان ورتانى ايالاۋعا شاقىرۋ, ەكولوگيالىق مادەنيەتتى قالىپتاستىرۋ.
– كورمەگە «اقجايىق» رەزەرۆاتىنىڭ سۋداعى جانە قۇرلىقتاعى وسىمدىكتەر توپتاماسى جانە جانۋارلار تۇرلەرىنەن حاباردار ەتەتىن 40-تان استام فوتوسۋرەت قويىلدى, – دەيدى رەزەرۆات قىزمەتكەرى نۇرگۇل ورازعاليەۆا.
ايتا كەتەيىك, جايىق وزەنىنىڭ كاسپي تەڭىزىنە قۇيار اتىرابىنداعى اۋماققا 2009 جىلى «اقجايىق» مەملەكەتتىك تابيعي رەزەرۆاتى اتاۋى بەرىلگەن ەدى. ەرەكشە تابيعي كەشەندە سيرەك كەزدەسەتىن جانە ەندەميكالىق سۋداعى, قۇرلىقتاعى وسىمدىكتەر توپتاماسى مەن جانۋارلار بار. رەزەرۆات تابيعي اۋماقتى قورعاۋمەن بىرگە, عىلىمي زەرتتەۋ جۇمىستارىن, ەكولوگيالىق اعارتۋ, ءتۋريزمدى دامىتۋ ماقساتىندا قىزمەت ەتىپ كەلەدى.
باقىتگۇل باباش, «ەگەمەن قازاقستان»
اتىراۋ