الماتىداعى ۋنيۆەرسيادانىڭ شايبالى حوككەي دوداسىندا قازاقستاندىق شەبەرلەر چەحيا قۇراما كومانداسىمەن مۇز ۇستىندە يمەك تاياق ءتۇيىستىرىپ, قارسىلاستارىنا قاراعاندا, وزدەرىنىڭ شىن مىقتى ەكەندىكتەرىن دالەلدەدى. ءبىزدىڭ حوككەيشىلەردىڭ تەگەۋرىنىنە شىداي الماعان قوناقتار 0:8 ەسەبىمەن ويسىراي ۇتىلۋعا ءماجبۇر بولدى.
«حالىق ارەنا» مۇز سارايىندا وتكەن بۇل ماتچتا كونستانتين ساۆەنكوۆ پەن ارتەم بۋردەلەۆ ەكى رەتتەن شايبا سالدى. سونداي-اق, دميتري گرەنتس, نيكيتا ميحايليس, انتون پەتروۆ جانە كيريلل ساۆيتسكي سىندى ويىنشىلار دا مۇز ۇستىنەن گول سوقپاي كەتپەدى.
بۇعان دەيىن قازاقستان قۇراماسى قىتاي (22:0) مەن شۆەتسيانى (5:0) دا كۇيرەتە جەڭگەن بولاتىن. ءسويتىپ, سەرگەي ستارىگيننىڭ ءۇش كەزدەسۋدە ءوز قاقپاسىنا ءبىر دە ءبىر شايبا جىبەرمەگەن شاكىرتتەرى توعىز ۇپايمەن ءتۋرنيردىڭ پلەي-وفف كەزەڭىنە ءوتتى. شيرەك فينالدا ءبىزدىڭ حوككەيشىلەر ىرىكتەۋ كەزەڭىندە 3-ورىن العان شۆەتسيا قۇراماسىن 4:0 ەسەبىمەن جەڭىپ, جارتىلاي فينالعا جولداما الدى. قازاقستاندىقتار جارتىلاي فينالدا سلوۆاكيانى 4:3 ەسەبىمەن بۋلليت بويىنشا جەڭگەن چەحيا قۇراماسىمەن كەزدەسەدى. ەكىنشى جارتىلاي فينالدىق ويىن كانادا مەن رەسەي قۇرامالارىنىڭ اراسىندا وتەدى.
* * *
وكىنىشكە قاراي, قىزدار اراسىنداعى سىندا قازاقستان قۇراماسى بەسىنشى-جەتىنشى ورىندار ءۇشىن بولعان ماتچتا جاپونيا حوككەيشىلەرىنەن 0:4 ەسەبىمەن ۇتىلىپ قالدى. بۇدان بۇرىن ءبىزدىڭ حوككەيشى قىزدارىمىز ۇلىبريتانيا كومانداسىن 11:0 ەسەبىمەن ۇتىپ, كانادا (0:11) جانە قىتاي (1:4) حوككەيشىلەرىنە ەسە جىبەرگەن بولاتىن.
سونىمەن, قازاقستاننىڭ قىزدار قۇراماسى ۋنيۆەرسيادانىڭ حوككەي سىنىنداعى سوڭعى كەزدەسۋىن بۇگىن ۇلىبريتانيا كومانداسىمەن وتكىزەدى.
قايرات ءابىلدينوۆ, «ەگەمەن قازاقستان»