قازاقستاننىڭ بۇۇ جانىنداعى تۇراقتى وكىلى قايرات وماروۆ بۇۇ باس حاتشىسىنىڭ كومەكشىسى, بۇۇ-نىڭ ەۋروپا مەن تمد ەلدەرى بويىنشا دامۋ باعدارلاماسى وڭىرلىك بيۋروسىنىڭ ديرەكتورى, بۇۇ-نىڭ ەكسپو-2017-دەگى كوميسسارى جيحان سۇلتانوعلۋمەن كەزدەستى.
كەزدەسۋ بارىسىندا بۇۇ دامۋ باعدارلاماسىنىڭ قىزمەتى, بۇۇ جۇيەسى قۇرىلىمدارىنىڭ ەكسپو-2017 حالىقارالىق مامانداندىرىلعان كورمەسىنە قاتىسۋى ماسەلەلەرى مەن جاقىندا قازاقستان پرەزيدەنتى نۇرسۇلتان نازارباەۆ ۇسىنعان كونستيتۋتسيالىق رەفورمالار جوباسى تالقىلاندى.
ج.سۇلتانوعلۋنىڭ پىكىرىنشە, وكىلەتتىكتەردى قايتا بولۋگە باعىتتالعان ترانسفورماتسيالار مەن بيلىكتىڭ زاڭ شىعارۋشى تارماعىنا قاراي جاۋاپكەرشىلىكتى ارتتىرۋى – ەلدىڭ ۇستانىمدارىن حالىقارالىق ارەنادا قازىرگىدەن دە بەتەر نىعايتا تۇسۋگە مۇمكىندىك بەرەتىن ايتارلىقتاي سالماقتى قادام.
«ەگەمەن-اقپارات»