ەلباسى نۇرسۇلتان نازارباەۆتىڭ قازاقستان حالقىنا ارناعان جولداۋىن تالقىلاۋ ءۇشىن اۋداندار مەن قالالار اكىمدەرىنىڭ ورىنباسارلارى, كاسىپكەرلەر, شارۋاشىلىق باسشىلارى, ۇكىمەتتىك ەمەس ۇيىمدار وكىلدەرى باس قوسقان كەڭەيتىلگەن ءماجىلىستە وبلىس اكىمى ارحيمەد مۇحامبەتوۆ ەلباسى جولداۋى ەلىمىز دامۋىنىڭ باعىتىن ايقىنداپ جانە ناقتى تاپسىرمالار بەرگەنىن اتاپ كورسەتتى.
– جاس تاۋەلسىز مەملەكەتىمىزدى نارىقتىق ەكونوميكا قۇرۋعا باعىتتاعان ءبىرىنشى جاڭعىرۋ ەلىمىزدە بىرلىك پەن تۇراقتىلىقتىڭ نەگىزىن قالاپ بەردى. «قازاقستان-2030» باعدارلاماسىنىڭ الدىنا جاڭا مىندەتتەر قويعان كەزەڭدە الەمدەگى باسەكەگە قابىلەتتى ەلۋ ەلدىڭ قاتارىنا قوسىلدىق. ءۇشىنشى جاڭعىرۋمەن بايلانىستى جولداۋ ەلدىڭ وسى كەزگە دەيىن باعىندىرعان بەلەستەرىن نىعايتا وتىرىپ, باسەكەلەستىككە قابىلەتتىلىكتى قامتاماسىز ەتەتىن ەكونوميكالىق جاڭا باعدارلاردى قۇرۋعا نەگىزدەلگەن, – دەدى ارحيمەد بەگەجان ۇلى.
تاۋەلسىز ەلىمىزدىڭ اۋىل شارۋاشىلىعىن دامىتۋعا تاجىريبەسىمەن, بىلىكتىلىگىمەن مول ۇلەس قوسقان قازاقستاننىڭ ەڭبەك ەرى سايران بۇقانوۆ جولداۋدا وسى سالانى سەرپىن بەرە دامىتۋ ماسەلەسىنىڭ وتە دۇرىس قويىلعانىنا توقتالدى.
– ەلباسى قازاقستان ەۋرازيانىڭ «نان كارزەڭكەسى» بولۋى كەرەكتىگىن دۇرىس كورسەتكەن. وسى تاپسىرما ۇدەسىنەن شىعۋعا تولىق مۇمكىندىك بار دەپ بىلەمىن. ويتكەنى, ءبىر قوستاناي وبلىسىنىڭ ءوزى جىل سايىن 5 ميلليون توننا استىق وندىرەدى. قازىر ءبىزدىڭ الدىمىزدا شيكىزات وندىرۋدەن وڭدەۋ ونەركاسىبىن دامىتۋعا قاراي جىلجۋ ماسەلەسى تۇر. بۇل بويىنشا وبلىستا جاقسى جۇمىستار ءجۇرىپ جاتىر. ەگىس القاپتارىن ءارتاراپتاندىرۋ, ءسويتىپ قوستانايدا بولاشاقتا جىلىنا 300 مىڭ توننا ماي وندىرە الاتىن زاۋىت ءۇشىن مايلى داقىلدار القابىن كوبەيتە بەرەتىن بولامىز. ول ءۇشىن مەملەكەت تاراپىنان سۋبسيديا ءبولىنىپ, قاجەتتى مۇمكىندىك جاسالۋى كەرەك, – دەدى سايران بالكەن ۇلى.
ەلباسى جولداۋدا «ەكسپورتقا باعدارلانعان ەلەكتروموبيل ءوندىرىسىن ودان ءارى دامىتۋ ماسەلەسىن پىسىقتاۋدى تاپسىرامىن» دەپ مىندەت قويادى. ال ءوتكەن 2016 جىلى قوستاناي قالاسىندا 12 ەلەكتروموبيل ساپقا قويىلدى.
– قازاقستاندا ينفراقۇرىلىمنىڭ ءالى جەتكىلىكسىزدىگىنەن ەلەكتروموبيلدەرگە سۇرانىس ىركىلىپ تۇر. بىراق بۇل مەملەكەتتىك دارەجەدە شەشىمىن تاپپاق. سونىڭ ءىشىندە الماتى قالاسى اكىمدىگى مەن AllurGroup كومپانياسى اراسىنداعى مەموراندۋمعا سايكەس وڭتۇستىك استانادا ەلەكتروموبيلدەرگە ارنالعان 40 توكپەن قۋاتتالاتىن بەكەت اشىلاتىن بولادى. وسىنداي مەملەكەتتىك قولداۋدىڭ ارقاسىندا جاقىن جىلدارى بۇل كولىك قازاقستاندىقتار ءۇشىن ناعىز ءومىر شىندىعىنا اينالادى, – دەدى AllurGroup كومپانياسىنىڭ پرەزيدەنتى ولەگ تسوي.
كەڭەيتىلگەن ءماجىلىستى قورىتىندىلاعان وبلىس اكىمى ارحيمەد مۇحامبەتوۆ جولداۋدا ايتىلعان ەلباسى تاپسىرمالارىنا جەكە-جەكە توقتاپ, ول بويىنشا وبلىستا جۇرگىزىلەتىن جۇمىستاردى تەرەڭ تالداپ كورسەتتى.
ءنازيرا جارىمبەتوۆا, «ەگەمەن قازاقستان»
قوستاناي