قاراعاندىلىقتار ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» تاقىرىبىنداعى جولداۋىن وبلىس اكىمىنىڭ اكتيۆىندە تالقىلادى.
ءوڭىر باسشىسى نۇرمۇحامبەت ابدىبەكوۆ ءبىرىنشى كەزەكتە جولداۋ مىندەتتەرىن ورىنداۋدا قاراعاندى وبلىسىنىڭ ءرولى مەن الەۋەتىنە توقتالدى. سونداي-اق, ول قازاقستاننىڭ ءۇشىنشى جاڭعىرۋىنا كومىرلى ايماق بىرقاتار جەتىستىكتەرىمەن كەلگەنىن اتاپ ءوتتى.
ايماق باسشىسىنىڭ ءسوزىنە قاراعاندا, جىل قورىتىندىسى بويىنشا ايماقتىق جالپى ءونىمنىڭ ارتۋى 1,3% دەڭگەيىندە. اۋىل شارۋاشىلىعىنىڭ جالپى ءونىم شىعارۋ كولەمى جىل قورىتىندىسى بويىنشا 108,6% دەڭگەيىندە قامتاماسىز ەتىلگەن. شاعىن جانە ورتا بيزنەس شارۋاشىلىق سۋبەكتىلەرىنىڭ سانى 7%-عا ارتىپ وتىر. نەگىزگى كاپيتالعا 315,4 ملرد تەڭگە ينۆەستيتسيا سالىنىپ, 2 809 پاتەر پايدالانۋعا بەرىلگەن. جۇمىسسىزدىق دەڭگەيى 4,9% قۇراعان. 2016 جىلى يندۋستريالاندىرۋ كارتاسىنىڭ جالپى قۇنى 100 ملرد تەڭگەنى قۇرايتىن 10 جوباسى ىسكە اسىرىلعان. مىڭعا جۋىق جۇمىس ورنى اشىلعان.
قارمتۋ رەكتورى, تەحنيكا عىلىمدارىنىڭ دوكتورى مارات يباتوۆ عالىمدار قاۋىمداستىعى مەملەكەت باسشىسى ۇسىنعان قازاقستان ەكونوميكاسىن جاڭعىرتۋدىڭ ۇدەمەلى تەحنولوگياسىن تولىق قولدايتىنىن جانە يندۋستريانى دامىتۋعا عىلىمنىڭ يننوۆاتسيالىق ۇلەسىن ارتتىرۋعا, قاجەتتى مامانداردى دايىنداۋ بويىنشا مىندەتتەمەنى ساپالى ورىنداۋعا ەرەكشە جاۋاپكەرشىلىك سەزىنىپ وتىرعانىن ايتتى.
جينالىستا جەزقازعان قالالىق ءماسليحاتىنىڭ دەپۋتاتى, ءبىلىم بەرۋ سالاسىنىڭ مەتسەناتى, وبلىستىق قازاقستان حالقى اسسامبلەياسىنىڭ جەزقازعان قالاسىنداعى قوعامدىق كەڭەسىنىڭ ءتوراعاسى بەكزات التىنبەكوۆ, «قازاقمىس كورپوراتسياسى» جشس نۇرقازعان كەن بايىتۋ فابريكاسىنىڭ ديرەكتورى مۇرات بورىباەۆ, «گيپپوكرات» جشس ديرەكتورى نادەجدا حوحلوۆا, «كاسىپكەرلىكتى قولداۋ جانە دامىتۋ قورى» كورپوراتيۆتى قورىنىڭ ديرەكتورى مىندەتىن اتقارۋشى سايران سىزدىقوۆ جانە شەت اۋدانى «اقاتان» شق باسشىسى ءبىرجان يمانوۆ ءسوز الدى. ماسەلەن, ءبىرجان يمانوۆ ءوز كەزەگىندە بۇل جولداۋ اۋىل ەڭبەككەرلەرىنە ۇلكەن رۋح بەرگەنىن, مەملەكەت قولداۋىنىڭ ارقاسىندا ءوز شارۋاشىلىعىنا رەسەيدەن 200 باس ءىرى قارا ساتىپ الىنعانىن, اۋداندا 28 ءۇي شارۋاشىلىعى بىرىگىپ, «العا» كووپەراتيۆىن قۇرعانىن, اۋىل شارۋاشىلىعىنداعى سۋبسيديالاردى ءبولۋ جاعدايلارىن قايتا قاراۋ, نەسيەلىك جەڭىلدىكتەر, وزگە دە ماڭىزدى شارالار شىن مانىندە ءوز تيىمدىلىگىن كورسەتىپ وتىرعانىن جەتكىزدى.
كەزدەسۋدى قورىتىندىلاعان ن.ابدىبەكوۆ وبلىستىڭ ءاربىر تۇرعىنىنا وسى قۇجاتتىڭ ءمانىن ءتۇسىندىرۋ كەرەكتىگىن, مۇندا ەلىمىزدىڭ الداعى ۋاقىتتاعى ءارى قارايعى ءىس-ارەكەتىنىڭ بارلىق باعدارلاماسى كورسەتىلگەنىن, وسى ورايدا قاراعاندىلىقتار دا ەلباسى جولداۋىندا بەلگىلەنگەن مىندەتتەردى ءساتتى ورىنداۋ ءۇشىن بار كۇشىن سالاتىنىنا سەنىم بىلدىرەتىنىن ايتتى.
سونداي-اق, وبلىس باسشىسى جاڭا نارىققا شىعۋ, ساپاسى جوعارى ونىمدەر ءوندىرۋ, ونىڭ ىشىندە, كومىردى تەرەڭ وڭدەۋ بويىنشا تەحنولوگيالار مەن كومىر حيمياسى وندىرىستەرىن قۇرۋ قاجەتتىگىنە نازار اۋداردى. جيىن سوڭىندا ن.ابدىبەكوۆ باسقارمالارعا, قالالار مەن اۋداندار اكىمدەرىنە ناقتى تاپسىرمالار بەردى.
ميراس اسان, «ەگەمەن قازاقستان»
قاراعاندى