كەشە ۇكىمەت ۇيىندە پرەمەر-مينيستر كارىم ءماسىموۆ پاكستان يسلام رەسپۋبليكاسىنىڭ پرەمەر-ءمينيسترى سايەد يۋسۋف رەزا گيلانيمەن كەزدەستى. ەكى ەل ۇكىمەت باسشىلارىنىڭ كەزدەسۋى اياسىندا ەلىمىزدىڭ ساۋدا ونەركاسىپ پالاتاسى مەن پاكستان ساۋدا ەكونوميكالىق پالاتالارى فەدەراتسياسىنىڭ اراسىندا ءوزارا ىنتىماقتاستىق تۋرالى كەلىسىمگە قول قويىلدى.
كەزدەسۋدەن كەيىن جۋرناليستەرمەن جۇزدەسكەن پاكستان يسلام رەسپۋبليكاسىنىڭ پرەمەر-ءمينيسترى سايەد يۋسۋف رەزا گيلاني ەكىجاقتى كەلىسسوزدەر كەزىندە قوس مەملەكەت اراسىنداعى ىنتىماقتاستىقتى جاڭاشا دەڭگەيگە كوتەرۋ ماسەلەسى ءسوز بولعانىن ايتا كەلە, ارىپتەستىككە جاڭاشا سەرپىن بەرەتىن ۋاقىت كەلگەنىن جانە كەلىسسوزدەر بارىسىندا وسى ماسەلەلەرگە باسا نازار اۋدارىلىپ, ەكىجاقتى ىقپالداستىقتى كۇشەيتۋ ءۇشىن تۇراقتى كەڭەستەر وتكىزۋ ۇيعارعاندىعىن جەتكىزدى. سونداي-اق ول كولىك جانە كوممۋنيكاتسيا سالاسىندا, ونىڭ ىشىندە تەمىر جول, اۆتوجول جانە اۋە قاتىناستارىن دامىتۋعا مۇمكىندىك مول ەكەنىن دە نازاردان تىس قالدىرمادى. پاكستان ۇكىمەتى باسشىسى, سونىمەن قاتار, «ءبىز ەنەرگەتيكا سالاسىنداعى زور الەۋەتىمىزدى يگەرۋىمىز كەرەك. بۇدان وزگە ءبىز ەكونوميكا, ساۋدا, ونەركاسىپ, اۋىل شارۋاشىلىعى, قورعانىس ونەركاسىبى سەكىلدى وزگە دە اۋقىمدى ماسەلەلەر بويىنشا ورتاق شەشىمگە كەلدىك. سايىپ كەلگەندە, مەنىڭ جۇمىس ساپارىم تابىستى وتۋدە», دەدى.
ءابدىراحمان قىدىربەك.