ەكاتەرينا ايدوۆا,
قىسقى ۋنيۆەرسيادانىڭ ەكى دۇركىن قولا جۇلدەگەرى:
دارىگەرلەردىڭ ايتقانىن تىڭدامادىم
ححVIII قىسقى ۋنيۆەرسيادادا ونەر كورسەتىپ جاتقان ەكاتەرينا ايدوۆا قازاقستان قورجىنىنا بۇگىنگى كۇنگە دەيىن ەكى قولا مەدال الىپ بەردى. بىزگە بەرگەن سۇحباتىندا جەڭىسكە جەتۋ ءۇشىن العان جاراقاتى كەدەرگى بولعانىن ايتقان كاتيا الداعى جوسپارىمەن دە ءبولىستى.
– ەكاتەرينا, ءسىز ءۇشىن قىسقى ۋنيۆەرسيادا مەن وليمپيادانىڭ ايىرماشىلىعى قانداي؟
– ەكى دودانى ءبىر-بىرىمەن سالىستىرۋعا كەلمەيدى عوي. سوعان قاراماستان, جارىستى وتە جوعارى دەڭگەيدە ۇيىمداستىرا العان ەلىمە قۋانىپ وتىرمىن. مۇنىمەن قازاقستان قىسقى وليمپيادانى تولىققاندى وتكىزە الاتىنىن دالەلدەپ وتىر. مەن ەكى وليمپياداعا قاتىسسام دا, ۋنيۆەرسيادادا ءبىرىنشى رەت باق سىناپ وتىرمىن. بۇل جارىستا ەكى دۇركىن قولا جۇلدەگەر اتانعانىما قۋانىشتىمىن. قوس مەدالىم تورىمدە ءىلىنىپ تۇراتىنى ءسوزسىز.
– ايتقىم كەلگەنى, ستۋدەنتتەر سايىسىندا ءۇشىنشى ورىن الىپ وتىرسىز. ال تاجىريبەلى اككى سپورتشىلارمەن الەم چەمپيوناتى مەن وليمپيادادا باق سىناعاندا ناتيجەڭىز قۇلديلايتىنى ءسوزسىز عوي...
– ءبىر نارسەنى ۇمىتپاۋ كەرەك, بۇل ستۋدەنتتەر سايىسى. سوعان قاراماستان, جارىستا جۇگىرىپ وتكەن ۋاقىتىممەن الەمدىك سايىستاردا ۇزدىك وندىققا كىرۋگە بولادى. اۋا-رايىنىڭ قولايسىزدىعىنىڭ كەسىرىنەن العاشقى اينالىمدا دۇرىس جۇگىرىپ وتە المادىم. ەكىنشى اينالىمدا ناتيجەمدى جاقسارتىپ, جەڭىمپازدار قاتارىنان كورىنە الدىم. سوندىقتان, جوسپاردى ويداعىداي ورىنداي الدىم دەپ ايتا الامىن. ءبىر بىلەتىنىم, مەن بۇل كورسەتكىشپەن توقتاپ قالمايمىن.
– بارەكەلدى! ءسىزدى جاراقات الدى دەپ ەستىدىك, تولىق ايىعا الدىڭىز با؟
– سپورتتى كاسىپ ەتكەندەردىڭ دەنى جاراقات الىپ جاتادى. مەن دە سولاردىڭ قاتارىن تولىقتىردىم. ارقاما وتا جاساعاننان كەيىن, دارىگەرلەر ماعان 6 ايعا دەيىن جاتتىعۋ جاساۋىما تىيىم سالدى. وسىلايشا جاز ايىندا جاسالاتىن دايىندىقتى وتكىزىپ الدىم. بىراق, اق حالاتتىلاردى تىڭداماي 3 ايدان كەيىن كونكيىمدى كيە باستادىم. قازىر دەنساۋلىعىما شاعىم ايتا المايمىن.
– الداعى جوسپارىڭىزبەن بولىسسەڭىز؟
– 7 اقپان كۇنى وڭتۇستىك كورەيادا وتەتىن الەم چەمپيوناتىنا قاتىسامىز. وندا مەن جەكە باعدارلاما بويىنشا سىنعا تۇسەمىن. ارتىنشا جاپونيادا وتەتىن قىسقى ازيا ويىندارىندا باق سىنايمىن. 26-27 اقپاندا كانادانىڭ كالگاري قالاسىندا جالاۋى جەلبىرەيتىن سپرينتتىك سايىستا ونەر كورسەتەمىز.
– قىسقا عانا ۋاقىتتا سونشاما جارىسقا قاتىسىپ, جۇگىرۋ قيىنعا سوقپاي ما؟
– بۇل سپورت قوي. بارلىعى الدىن-الا جوسپارلانعان سايىستار. مەن ءۇشىن جاراقاتىمنان كەيىن كورسەتكىشىمدى جاقسارتۋدىڭ بىردەن-ءبىر جولى وسى عوي دەيمىن. ءسىزدى تاعى ءبىر تاڭعالدىرايىن, كالگاريدەن كەيىن استانادا وتەتىن قازاقستان چەمپيوناتىندا باق سىنايمىن. وسىمەن ءبىزدىڭ ماۋسىم اياقتالادى.
– اڭگىمەڭىزگە راحمەت, بيىك تۇعىردان كورىنە بەرىڭىز!
اڭگىمەلەسكەن
الماس ماناپ,
«ەگەمەن قازاقستان»