بىلتىر كوكتەمدە ساي-سالانى قۋالاي اققان قىزىل سۋ بىرقاتار اۋىلدار مەن وبلىس ورتالىعىنداعى شاعىن اۋدانداردى شايىپ كەتىپ, تۇرعىنداردى الەككە سالعانى بار. بيىل مۇنداي قاۋىپتى بارىنشا ازايتۋدىڭ, بولدىرماۋدىڭ جولدارى الدىن الا قاراستىرىلىپ, ساقتىق شارالارى كۇشەيتىلىپ وتىر. سينوپتيكتەردىڭ بولجامىنا قاراعاندا, قاردىڭ شامادان تىس جاۋى سالدارىنان كوكتەمگى سۋ تاسقىنى تاعى دا ىرىق بەرمەي كەتۋى مۇمكىن.
بۇگىندە بىرنەشە جەدەل توپتىڭ قۇرامىنا ەنگەن ءتارتىپ ساقشىلارى مەن تۇرعىن ءۇي كوممۋنالدىق-شارۋاشىلىق مەكەمەسىنىڭ قىزمەتكەرلەرى جولدار مەن كوشەلەردىڭ جاعدايىنا مونيتورينگ ءجۇرگىزۋمەن شەكتەلمەي باقىلاۋ رەيدتەرىن دە ۇيىمداستىرىپ وتىرادى. كەزەكتى تەكسەرۋلەر بارىسىندا اۋلالاردى, مەكەمە جاندارىن ءۇيىندى قاردان تازالاماعان باسشىلاردى «قارا تىزىمگە» ەنگىزىپ, ىقپال ەتۋ شارالارى قولدانىلدى. ەسكەرتۋلەرگە قۇلاق اسپاعان «تەنتەكتەر» مەن «اقپا قۇلاقتار» قالتالارىنان قاعىلۋعا تۋرا كەلدى. التى كاسىپورىنعا 136 مىڭ تەڭگە ايىپپۇل سالىنىپ, تاۋبەلەرىنە كەلتىردى.
– قاتارىمىزعا پاتەر يەلەرى كووپەراتيۆ مۇشەلەرىن دە تارتىپ وتىرمىز. بىرلەسە جۇمىس ىستەۋدىڭ ارقاسىندا 300-گە جۋىق مەكەمە-ۇيىمعا حابارلاما تاراتىلدى. 235 حاتتاما تولتىرىلدى. ال قار تازالاۋ جۇمىستارى ساپاسىز اتقارىلسا, ەشكىم دە اكىمشىلىك جاۋاپكەرشىلىكتەن قۇتىلمايدى. قاتاڭ تالاپتى بوساڭسىتۋعا بولمايدى. تۇرعىندار كوكتەمدە قارعىن سۋدىڭ زاردابىن تارتپاس ءۇشىن بارلىق كۇش-جىگەردى جۇمىلدىرۋدامىز,– دەيدى قالالىق جەرگىلىكتى پوليتسيا ءبولىمى باستىعىنىڭ ورىنباسارى شامشيدەن اقىشەۆ.
ءومىر ەسقالي,
«ەگەمەن قازاقستان»
پەتروپاۆل