ەلباسىنىڭ «100 ناقتى قادام» ۇلت جوسپارىندا مەملەكەت-جەكەمەنشىك ارىپتەستىگىن دامىتۋعا ايرىقشا كوڭىل ءبولىنگەن. ارىپتەستىكتىڭ الەۋەتىن ارتتىرۋعا باعىتتالعان قادامدار اتىراۋ وبلىسىندا دا جۇزەگە اسىپ كەلەدى. بۇل جاڭا ءۇردىس تاربيە سالاسىندا ءتيىمدى جوباعا اينالدى. وعان جەكەمەنشىك مەكتەپكە دەيىنگى ۇيىمداردىڭ جۇمىسى دالەل بولا الادى. قازىر مۇنايلى ايماقتا 164 بالاباقشا بار, ونىڭ ىشىندە 30 بالاباقشا جەكەمەنشىك ۇلەسىندە.
وبلىستىق ءبىلىم بەرۋ باسقارماسىنىڭ باسشىسى نۇرساۋلە سايلاۋوۆانىڭ ايتۋىنشا, وتكەن جىلى 8 بالاباقشا پايدالانۋعا بەرىلگەن. قازىر 13 مەكتەپكە دەيىنگى مەكەمەنىڭ قۇرىلىسى ءجۇرىپ جاتىر. سونىڭ وزىندە كەزەكتە تۇرعان سابيلەردىڭ 85 پايىزى عانا بالاباقشامەن قامتىلعان. قالعاندارى, ياعني ءۇش مىڭنان استام بالا ۇيدە تاربيە الۋعا ءماجبۇر. بۇل پروبلەمانى شەشۋ ءۇشىن مەكتەپكە دەيىنگى ۇيىمدار جەلىسىن دامىتۋ, وزگە ماقساتتاعى عيماراتتاردى جاڭارتۋ, جاڭا قۇرىلىستار سالۋ, مەملەكەت-جەكەمەنشىك ارىپتەستىگىن ورىستەتۋ كەرەك.
الايدا, زامان تالابىنا ساي جاڭا ءىس باستاۋعا اۋىل تۇرعىندارى قىزىعۋشىلىق تانىتپاي وتىر. ايماقتاعى 30 جەكەمەنشىك بالاباقشانىڭ 28-ءى اتىراۋ قالاسىندا, قالعانى جىلىوي مەن ماقات اۋداندارىندا اشىلعان. قالعان اۋدانداردا ازىرگە جەكە بالاباقشا جوق. وسى جايتتى قاپەرگە العان وبلىس اكىمى نۇرلان نوعاەۆ ماقات اۋدانىندا وتكەن كوشپەلى كەڭەستە حالىقتى بالاباقشا بيزنەسىمەن اينالىسۋعا شاقىردى. «مەملەكەت بالاباقشالار مەن مەكتەپتەردى كوپتەپ سالىپ جاتىر. بىراق كەزەك ماسەلەسىن تەزىرەك شەشۋ ءۇشىن بۇل ىسكە جەكە كاسىپكەرلەردى تارتۋ جۇمىسىن كۇشەيتۋ كەرەك. بيزنەس باستايمىن دەگەن ازاماتتارعا مەملەكەت قولداۋ كورسەتىپ وتىر», – دەدى ايماق باسشىسى.
باقىتگۇل باباش,
«ەگەمەن قازاقستان»
اتىراۋ