م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە ءبىلىم الىپ جۇرگەن قانداستارىمىزدىڭ ءبىرى – باعدار اسقاربەكقىزى. ونىڭ ايتۋىنشا, قىتاي ەلىندە ەكى ميلليونعا جۋىق قازاق تۇرادى. داستۇرگە بەرىك اعايىندارىمىز اتاجۇرت دەسە وزەكتەرى ءۇزىلىپ تۇسە جازدايتىن كورىنەدى. بويجەتكەن بۇگىندە «Foundation» فاكۋلتەتىنىڭ دايىندىق كۋرسىنىڭ تىڭداۋشىسى. ءوزدىگىنەن تالاپتانىپ, ورىس ءتىلىن ۇيرەنۋ ۇيىرمەسىنە دە جازىلعان. ونداعى ويى – سولتۇستىك ءوڭىرلەردە ءالى دە باسىم تۇراتىن حالىقتىڭ ءتىلىن مەڭگەرىپ شىعۋ. قازاقستاندا بۇل تىلگە سۇرانىس ءالى جوعارى ەكەن دەگەن تاڭدانىسىن جاسىرمايدى.
«وزگە ەلدە سۇلتان بولعانشا, ءوز ەلىندە ۇلتان بولۋدى» ارمان ەتكەن 30 باۋىرىمىز بىلتىر كليماتى قاتال, دەموگرافيالىق قۇرىلىمى وزگەشە وڭىردە ءبىلىم الۋدى, ورنىعىپ, جۇمىس ىستەۋدى العا ماقسات ەتىپ كەلگەن. ەندىگى تاعدىرلارىن تەك قازاقستانمەن بايلانىستىرۋدى قۇپ كورەدى. كىندىك قاندارى وزگە ەلدە تامسا دا, جۇرەكتەرى قازاعىم, ۇلتىم دەپ سوعاتىن جاستار تۋرالى فاكۋلتەت دەكانى شالاباي قوجاەۆ ۇلكەن ىجداعاتپەن اڭگىمەلەيدى. ەڭسەلى ءبىلىم ورداسىندا بارلىعى 81 شەتەلدىك قازاق بالاسى وقيدى. قاي-قايسىسىنا بولسىن بىلىمگە قۇشتارلىق, ىزدەنىمپازدىق, ەڭبەكقورلىق ءتان. توتە جازۋعا جۇيرىك ولار ءۇشىن كيريلليتسانى ۇيرەنۋ سونشالىقتى قيىن ەمەس. قوعامدىق جۇمىستارعا دا بەلسەنە ارالاسادى.
موڭعوليادان كەلگەن جارقانات قيناۋقان ءبىلىمنىڭ تەگىن ەكەنىن, جايلى جاتاقحاناعا ورنالاسقانىن, بارلىق جاعداي جاسالعانىن ريزاشىلىقپەن ايتادى. اياعىنان تىك تۇرىپ العاننان كەيىن اتامەكەندە وقۋدى, تۇرۋدى ارماندايتىن ءۇش باۋىرىن بايولكە جەرىنەن كوشىرىپ اكەلمەك نيەتىن ايتادى. جاستايىنان ولەڭ شىعارىپ, ماعجان اتاسىنا ۇقساعىسى كەلەدى.
قىتايدان, موڭعوليادان, رەسەيدەن وقىپ جاتقانداردىڭ قاتارىن «سەرپىن-2050» باعدارلاماسى اياسىندا وڭتۇستىك وبلىستاردان كەلگەن ءبىر مىڭعا جۋىق ورەندەر تولىقتىرىپ وتىر.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى