«نۇر وتان» پارتياسى كوكشەتاۋ اۋماقتىق فيليالى «دەنساۋلىق» باستاۋىش پارتيا ۇيىمىنىڭ جينالىسى بولىپ, وندا مەملەكەت باسشىسى ن.ءا.نازارباەۆتىڭ بيلىك تارماقتارى اراسىنداعى وكىلەتتىكتەردى قايتا ءبولۋ جانە باستاۋىش پارتيا ۇيىمىنىڭ جۇمىسى تۋرالى ماسەلەلەر قارالدى.
پارتيانىڭ العا قويعان ءمىندەتتەرىنە ساي باستاۋىش پارتيا ۇيىمىنىڭ جۇمىسى تۋرالى بايانداپ بەرگەن «اقمولا وبلىسى دەنساۋلىق ساقتاۋ باسقارماسى» قب جەتەكشىسىنىڭ ورىنباسارى, پارتيا مۇشەسى سەرگەي كيلاسەۆ دەنساۋلىق ساقتاۋ سالاسىنا بولىنگەن قارجى 35,6 ملرد تەڭگەنى قۇراعاندىعىن جانە ول تولىق يگەرىلگەندىگىن ەرەكشە اتادى. ونىڭ ايتۋىنشا, 2016 جىلى 8 جاڭا نىسان قولدانىسقا بەرىلسە, بيىلعى جىلى دا بىرقاتار نىساندار سالىنادى. جالپى, وبلىس بيۋدجەتىنەن بولىنگەن قارجىعا 274 دانا مەديتسينالىق قۇرال-جابدىق پەن 12 سانيتارلىق اۆتوكولىك ساتىپ الىنعان. وڭىردە 1804 دارىگەر جانە 6074 ورتا مەديتسينالىق قىزمەتكەر جۇمىس ىستەيدى ەكەن. وتكەن جىلى مەديتسينالىق ۇيىمدارعا 359 مەديتسينالىق قىزمەتكەر كەلسە, ونىڭ 70-ءى دارىگەر.
ايتسە دە كەلگەن قىزمەتكەرلەردىڭ تەك 74-ءى عانا باسپانامەن قامتاماسىز ەتىلگەن. سونىڭ ىشىندە 34 جاس مامانعا باسپانا ساتىپ الۋ ءۇشىن 106 ملن تەڭگە نەسيە بولىنگەن. س.كيلاسەۆتىڭ مالىمەتىنە قاراعاندا, وبلىستا اۋرۋدى انىقتاۋدىڭ التى ءتۇرى بويىنشا 388 مىڭ سكرينينگتىك زەرتتەۋلەر جۇرگىزىلىپ, ناتيجەسىندە 6 مىڭداي سىرقات انىقتالعان. وڭىردە بالا تۋ سانى ارتىپ, ءولىم-ءجىتىم ازايعاندىعى دا اتالماي قالمادى. تۋبەركۋلەزبەن اۋىراتىندار سانى ازايعانىمەن, تۇرمەدەن بوساپ شىققانداردى ەمدەۋ ماسەلەسى ءالى دە وتكىر تۇرعاندىعى اشىپ ايتىلدى. پارتيانىڭ اقمولا وبلىستىق فيليالى توراعاسىنىڭ ورىنباسارى, وبلىستىق ءماسليحات دەپۋتاتى عالىم بەكماعامبەتوۆ زالدان قويىلعان سۇراققا بەرگەن جاۋابىندا جاس مامانداردى باسپانامەن قامتاماسىز ەتۋ ماسەلەسى تەك زاڭ اياسىندا شەشىمىن تابۋى تيىستىگىنە ەرەكشە نازار اۋداردى. باسپانانى تەگىن بەرۋ دەگەن ماسەلە قازىر جوقتىعىن العا تارتقان ول تۇرعىن ءۇي سالۋ جىلدان جىلعا ارتىپ كەلە جاتقاندىعىن ءتىلگە تيەك ەتتى. دەپۋتات كوكشەتاۋ قالاسىندا 9 مىڭ ادام مۋنيتسيپالدى تۇرعىن ءۇي كەزەگىندە تۇرعاندىعىن دا قاپەرگە سالا كەتتى. سونىڭ 4 مىڭى الەۋمەتتىك از قامتىلعان تۇرعىندار سانالادى. جالپى, نۇروتاندىقتار وسىنداي بىرقاتار ماسەلەلەر بويىنشا پىكىر الىسىپ, ەسەپ بەرگەننەن كەيىن پارتياعا جاڭادان قابىلدانعاندارعا مۇشەلىك كىتاپشالارىن سالتاناتتى تۇردە تابىس ەتتى.
اسقار تۇراپباي ۇلى, «ەگەمەن قازاقستان»
اقمولا وبلىسى