مەملەكەت باسشىسى ن.ءا.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىن ىسكە اسىرۋ ماقساتىندا اقتوبە وبلىسى اكتيۆىنىڭ جينالىسى ءوتكىزىلدى. قازىردىڭ وزىندە ءوڭىردە جىلدىڭ باستى قۇجاتىن تالداپ ءتۇسىندىرۋدىڭ كەڭ اۋقىمدى ءىس-شارالارى بەكىتىلدى.
مەملەكەت باسشىسى قازاقستان حالقىنا ەل ءۇشىن ءمانى مەن ماڭىزى اسا جوعارى ەكى جاعدايعا بايلانىستى ءسوز ارنادى. ونىڭ ءبىرىنشىسى بۇعان دەيىن پرەزيدەنتتىڭ قولىندا شوعىرلانىپ كەلگەن بىرقاتار وكىلەتتىكتەردى بيلىكتىڭ تاعى ءبىر تارماقتارى –ۇكىمەت پەن پارلامەنتكە اۋىستىرۋ ماسەلەلەسىنە ارنالدى. ونىڭ ەلىمىز ءۇشىن تاريحي ماڭىزى بار.
ودان كەيىن ەلباسى قازاقستان حالقىنا بيىلعى جولداۋىن جاريا ەتتى. ءار جىل سايىن قازاقستان حالقى پرەزيدەنت جولداۋىن ەلەڭدەپ كۇتەتىنى ءداستۇرگە اينالىپ كەلەدى. وسى ورايدا, بيىلعى جولداۋعا ءتان باستى ەرەكشەلىكتەر – ەلىمىزدىڭ باسەكەگە قابىلەتتىلىگىن كوتەرۋگە ارنالعانى, يننوۆاتسيا مەن جاڭا تەحنولوگيالاردى ەنگىزۋگە باسىمدىق بەرگەنى دەۋگە بولادى. اكتيۆتە ءسوز العان اقتوبە وبلىسىنىڭ اكىمى بەردىبەك ساپارباەۆ ءوز ءسوزىن وسى ارنادان ساباقتادى.
قازىرگى كۇنى اقتوبە ايماعىندا مەملەكەت باسشىسىنىڭ بەرگەن تاپسىرمالارىن جەدەل ءارى ساپالى تۇردە ورىنداۋ ماقساتىندا ىرگەلى ىستەردى جولعا قويۋ بەلگىلەنگەن. اسىرەسە, سونىڭ ىشىندە گەولوگيالىق بارلاۋ جۇمىستارىن ودان ءارى جانداندىرۋعا باسا كوڭىل ءبولىنگەن. پرەزيدەنت جولداۋىندا اۋىل شارۋاشىلىق كووپەراتيۆتەرىن قۇرۋ ىسىنە جاڭا بەتبۇرىس جاساۋ كەرەكتىگى كورسەتىلگەن. سونداي-اق, ءونىمدى ءوڭدەۋ كورسەتكىشتەرى دەڭگەيىن كوتەرۋ كوزدەلگەن. بۇگىنگى كۇنى وبلىستا 104 كووپەراتيۆ قۇرىلعان. ال تاياۋ ۋاقىتتا ءوڭىردە اۋىل شارۋاشىلىق كووپەراتيۆتەرى نەگىزىندە ءسۇت ءجانە ەت ونىمدەرىن وڭدەۋ تسەحتارىن قۇرۋ بەلگىلەنىپ وتىر.
سونىمەن بىرگە, ايماقتا اۋىل شارۋاشىلىعى سالاسىنا جاڭا تەحنولوگيالاردى شۇعىل ەنگىزۋ جانە سۋارمالى جەرلەردىڭ كولەمىن كوتەرۋ ءجونىندە دە ايقىن ماقسات قويىلعان. ەگەر ناقتى دەرەكتەرگە سۇيەنسەك, 2015 جىلى ونىڭ كولەمى 12 مىڭ گەكتار قۇراسا, ءوتكەن جىلى بۇل اۋماق 18 300 گەكتارعا دەيىن ۇلعايعان. مۇنىڭ سىرتىندا 19 500 گەكتار جەردىڭ قۇنارىن كوتەرۋ مەن قالپىنا كەلتىرۋ جونىندە جوبالاۋ-سمەتالىق قۇجاتتار جاسالعان. ال الداعى 2018 جىلى وبلىستا سۋارمالى القاپتاردىڭ اۋماعىن 40 مىڭ گەكتارعا دەيىن ۇلعايتۋ كوزدەلگەن.
تەمىر قۇسايىن, «ەگەمەن قازاقستان»
اقتوبە